Ioera 1 - Te B'aib'ara

¹ Boni Ngai Ioera ae natin Betuera te m'aane. Aio te rongorongo ae E anganai te UEA.

Rabunakin Aon Te Aba Irouia Rookati

² Kakauongo, ngkami aika taani kairiiri ao aomata nako aika i nanon te aba. Iai te b'ai ae e a tia n riki ae aron aei mai m'aaina?

³ Tuangiia natimi! Tataekinna nakoia tibumi ao natiia tibumi naba.

⁴ A tia n roko taanga n rookati te korakina i mwiin te korakina n tiring arokara, ma ni kang b'aai ni kabane ake a noori.

⁵ Katoka mangingimi taan manging! Takaarua mani kaananau n tang; E a bane nimami te wain.

⁶ E a tia te botannaomata ae e korakora ma ana taanga ni buaka ae e aki konaa n warekaki ni buakana abara. Iai irouia wiin ma m'angain taian raian aika a korakora.

⁷ A bane ni ngaongao ara kureebe ma ara biiku; a bon ti tiku naba taian m'aanga aika akea b'ain aoia.

⁸ Kam na nanokawaki kaanga te ateiaine ae e tang i bukin buuna ae e a tib'a mare ma ngaia.

⁹ A aki manga oki n uotaki nakon ana Tembora te UEA taian angab'ai ake taian uita ma te wain. A rangi n nanokawaki Ana tia m'akuri ake taian ibonga.

¹⁰ A tang taian tawaana aika akea arokana; a bue ma ni b'atakataka.

¹¹ Kam na tang i bukin ara tabo n ununiki ao ara nne n aroka ni kureebe! Ai akea te uita ke te b'aare ni maiu i nanon taian tawaana.

¹² A tia ni m'autakataka taiani kureebe ao ai uana naba ma taian aroka nako aika biiku ma bomkuranete, taian baam ao taian aboro. A mauna nako taian kukurei ni kabane.

Okira Te Atua

¹³ Taang, ngkami aika ibonga aika kam m'akuri n ana baonikarea Atuau. Kangainaa ao kabongnga ni waea te kunnikai ae e mangaingai. A na aki manga uotaki nakon ana Tembora te UEA taian angab'ai are te uita ma te wain.

¹⁴ Tuangiia taani kairiiri ao aomata b'a a na bootaki n au Tembora. Tuangiia b'a a na aki am'aam'arake ao a na tataro ni kakorakoraia.

¹⁵ Ti a reke n te kaangaanga! E nang karokoa te kabuanib'ai te UEA are Moan te M'aaka n te tai ae e aki maan.

¹⁶ A tia ni bane karara; akea riki manga te bootaki ni kukurei n ana Tembora Atuara.

¹⁷ A m'au taian ati i nanon te tano; e aki konaa ni manga reke tain te tai. A aki raoiroi ara auti ni uita, ao akea te uita ae e na kaawakinaki iai.

¹⁸ A tiotio nako ara nanai ni kao n aki akaaka, ma n tangitang b'a akea te uteute, ao a kainano naba taian tiibu.

¹⁹ I tangi ni weteiko te UEA. A kanaki taabo n uteute ao taiani buakonikai n te ang ae e kabuebue.

²⁰ A akea te ran i bukiia maan aika a aki manana i bukimi; a m'auteretere taiani karaanga ma taian raanga n ran, ao a rangi ni m'auteretere taian uteute.