Iobi 8 - Te B'aib'ara

Ana Taeka Biretata

¹ E taku Biretata,

² Tao ana maanra ngkoe ngkana ko taetae ao n taekina te akea?

³ E bon aki kona ni minota te eti te Atua; E aki kona ni b'aka man karaoan te raoiroi.

⁴ A boni bae n tia ni bure natim nakon te Atua, ma ngaia are, E katuuaia ni uaan aia m'akuri.

⁵ Ma rairaki ngkai, ao ononiia te Atua ae moan te m'aaka;

⁶ Ngkana ko taku b'a ko raoiroi ma ni kokoaua, ao E na roko te Atua ni buokiko ma ni manga anganiko kaain am auti n aron are mai m'aina b'a kaniwangam.

⁷ Kaub'aim ni kabane ake a tia ni bua a na bon aki kona ni kabotauaki ma kaub'aim akana E na anganiko te Atua n taai aika na roko.

⁸ Tanrikaaki teutana n tarai aia taeka n rabakau ake rimoa, ao karaua ni iangoi koaua ake a tia n atai ara ikawai.

⁹ A kimototo maiura, ao akea te b'ai teuana ae ti ataia. Ti m'ananga i aon te aonnaba kaanga te nu.

¹⁰ Ma ngaia are, reireiniko i rouia aomata ake ngkoa, ao kakauongo nakon te b'ai ae a kataia n taekinna.

¹¹ A bon aki kona ni maiu taian maunei n te tabo ae akea te ran iai; a bon aki kona n nooraki n te tabo ae aki aoneinei.

¹² Bon ngaiia aika a na moan rai ngkana akea te ran, e ngae ngkana a uarereke b'a a tuai n tai n te koreaki ni kamanenaaki.

¹³ Ai aroia maunei aikai aomata aika akea atuaia, n te tai are a m'aninga iai taekan te Atua.

¹⁴ A onimakina karain ngaon ten takareau.

¹⁵ E kona ni kateimatoaia ngaon ten takareau ngkana a mwiokoia? E kona ni buokia ngaon ten takareau ngkana a nimtia?

¹⁶ Aomata aika buakaka kaanga ai aroia uteute aika akea bonganaia aika taakini baaia i aan te riringa ma ni kaona nanon te onaroka.

¹⁷ A rab'ati taian atiibu wakaaia, ao a taui ni kamatoai taiani b'a ni kabane.

¹⁸ Ao i mwiina, a taekaki nako man te tabo are a mena iai, ao akea temanna ae ataia b'a a mena ngkoa ikanne.

¹⁹ Eng, bon ti anne kukureia aomata aika buakaka; ma a roko tabeman n tuki aia tabo.

²⁰ Ma e na bon aki kitana te aomata ae kakaonimaki te Atua, ke ni buoka te aomata ae buakaka.

²¹ E na manga kangareko n takaarua te Atua,

²² Ma e na karokoa te kamamaaeaki i aoia aomata aika riribaiko, a na mauna nako aia auti aomata aika buakaka.