Iobi 6 - Te B'aib'ara

Ana Kaeka Iobi nakon Eribati E boni kanganga

¹ Ao e taku Iobi,

² Moan te kanganga b'a n na katinea au kangaanga ma rawawatau!

³ ao a na bon rawawata riki nakon tanon taari, ma ngaia ae I a tia n taetae ma te aki iango moa.

⁴ E a tia te Atua ni katebeai n taian kainikatebe, ao e buta i nanon rab'atau boitinna. E katauraoa buakanakiu te Atua.

⁵ E rauaki te aati ngkana e am'arake, ao e aki kakarongoa te kao ngkana e am'arake n te uteute.

⁶ Ma antai ae kona ni kana te am'arake ae akea kangkangina, ao e aki taoro? Tera kangkangin marain te bunimoa?

⁷ Bon akea kukurein nanou n te aekaki n am'arake anne, ao I a aoraki ni b'aai ni kabane ake I kang.

⁸ E aera ngkai E aki anganai te Atua te b'ai ae I butiia? E aera ngkai E aki kaeka au tataro?

⁹ Tera ngke E tiringai ngkai!

¹⁰ Ngkana I ataia b'a E na karaoa aei, ao N na bon kibakibarake ni kukurei, I aki tabe ma korakoran marakiu. I ataia b'a E tabu te Atua; I bon tuai man kakaitarai Ana babaire.

¹¹ Tera korakorau ae N na kona ni kateimatoa iai maiu? E aera ngkai I teimatoa ni maiu ngkai akea au kantaninga?

¹² Ai raon ae e karaoaki rab'atau man te atiibu, ke te biti?

¹³ Bon akea riki nikiran korakorau are N na kamaiua iai rab'atau; bon akea te tabo riki teuana are N na kona n rairakiia i bukin buokakiu.

Raoraou, Ai Bon Akea Au Kantaninga.

¹⁴ I tangiriia raao ni koaua i nanon te kangaanga n aron aei, e aoria ngkana I kiitana te Atua ke I aki.

¹⁵ Ma ngkami raoraou, kam kam'aneai kaanga taian karaanga n ran aika b'atakataka ngkana e aki b'ab'aka te karau.

¹⁶ A rabunaki taian karaanga n ran n te tinoo ma te aiti,

¹⁷ ma a mauna nako n te kabuebue, ao e a tangenge kabin te karaanga ni m'autakataka.

¹⁸ A b'ara nanoia taan m'ananga i aon kamero i bukin kakaaean te ran; a tiotio nako ni mate i nanon te rereua.

¹⁹ A kakaea te ran taani m'am'ananga i aoia kamero mai Teba, Tema,

²⁰ ma e a toki aia kantaninga i rarikin taian karaanga n ran aika m'autakataka.

²¹ Kaanga ai aroia taian karaanga n ran aikai ngkami nako Iu; kam noora te b'ai ae riki nako Iu, ma kam kararoai ngkami.

²² I a tia ni butingkami b'a kam na anganai te kaniwanga, ke ni butingkami b'a kam na kamaraa aton temanna i buku,

²³ ke ni butingkami kamaiuau mairouia kairiribai tabem'aang, ke taan karawawata te aba?

²⁴ E raoiroi, reireiai, tuangai au kairua. N na aki kakarongoa, ao N na kakauongo nako imi.

²⁵ Taetae aika koaua a nang anainano, ma kam taetae n nanobaba.

²⁶ Tao kam taku b'a I taetae n akea nanona kaanga te ang, ao tera bukina ngkai kam kaekai au taetae ni b'aeb'aeti?

²⁷ Ane kam na karaoa te katekeraoi i aoia ataei aika akea aia karo i bukin anaakia b'a ami toro, ao kam na karekea kaub'aimi mairouia raoraomi ni koaua!

²⁸ Tara raoi matau, I bon aki kewe.

²⁹ Kam a rangi n tibanako. An tai manga taekini taeka aika aki raoiroi. Tai kabuakakaai, b'a I bon tei n te eti.

³⁰ Ma kam taku b'a I kewe kam taku b'a I aki kona n taekina te eti man te kaairua.