Iobi 39 - Te B'aib'ara

¹ Ko ataia b'a a bung ningai kootin maunga? Ko a tia ni matakuakina te ria ae katam'anti ngkana e bungiia natina?

² Ko ataia b'a maanra ni uouotia natiia? Ko ata aia tai are a bung iai?

³ Ko ata aia tai are a na karinanoi bukiia iai kooti aine ni bungiia natiia nakon te aonnaba?

⁴ a rikirake ni marurung natiia i nanon te buakonikai; A kitaniia tinaia, ao aki manga okiria.

⁵ Antai ae anganiia taian aati aika katam'anti inaomataia? Antai ae kab'ara kabaeana ma ni kanakonakoa?

⁶ Bon Ngai ae I anganiia te rereua b'a mwengaia, ao I kamaekaia i aon taabo aika aoraoi.

⁷ A kararoaia man kaawa aika buubura aika karongoa, ao bon akea ae kona ni kamananaia ma ni kam'akuria.

⁸ A riki taiani maunga b'a aia tawaana n uteute ike a am'am'arake iai, te tabo ike a ukoukori iai baika kiriin b'a a na kang.

⁹ E kona ni m'akuri te kaom'aane ae katam'anti i bukim? ke n tiku n te tabo ni kam'arake man ni katoa tairiki?

¹⁰ Ko kona n rooa temanna ma ni kam'akuria b'a e na kamaraua te tano? Ke ko kabaea te kai ae e buubura ma ngaia b'a e na katikitikia ni kaboraoa te tano?

¹¹ Ko kona ni mwiokoa korakorana ma ni kantaningaia b'a e na karaoi am m'akuri aika rawawata?

¹² Ko kantaningaia b'a e na uoti rikaaki am tai, ma ni boboti taian uita ake n am tabo n oro uita?

¹³ E ubouboi baina ni kiba te aotitereti ma te kakatonga, ma e aki kakatonga i bukiia natina.

¹⁴ E kitana bunimoana te aotitereti i aon te tano b'a e na kaabueaki ni kabuebuen te tano.

¹⁵ Ao e aki raraomaeakina touakina n te wae, ke uruakina i rouia maan aika katam'anti.

¹⁶ E karaoa aron ae kaanga tiaki bunimoana, ao e aki tabe ngkana e a tia ni banebuaka korakorana iai.

¹⁷ Boni Ngai ae I kananobaba, ma n aki anganna te wanawana.

¹⁸ Ma n te tai are e biri iai, ao e ngareakina te tia toka i aon te aoti ae birim'aaka.

¹⁹ Ngkoe Iobi ae ko karaoi ngkoa taian aoti b'a a na korakora, ma n anganiia naba buraen roroaia aika tamaroa?

²⁰ Ngkoe ae ko karaoia b'a a na kiba n aroia taian taake ma ni kakamaakuia aomata n tangitangin ikeikeia?

²¹ A rangi ni ingainga nanoia ni kan biri; A kabane korakoraia ni biri nako buakon te bo ni buaka.

²² A babanga ni maaku, ao bon akea te kabaang ae kona ni kaokiia rikaaki.

²³ A kekeruatai ma n raaitiiti i aan ootan taai b'aai ni buaka ake e uoti te tia toka i aon te aoti.

²⁴ A kabane biriia n rimoa taian aoti ma te ingainga n nano; ao aki kona n tei n aki kakam'akuri ngkana e a tang te bu.

²⁵ A katoa tangin te bu ma tangin ikeikeia; ao a kaman aroka boin te bo ni buaka i m'aain rokona, ao a ataa naba takaruan te mataniwi nako ia ana tautia.

²⁶ E koaua b'a e reireinna ni kiba te aoki mai roum, ngkana e kiba nakoaiaki?

²⁷ E kona n tataninga am kaetieti te ikare b'a e na karaoa ngaona i eta i aon taian maunga?

²⁸ E karaoa mwengana i aon taian b'a aika rietaata ma ni kariki b'a nonona?

²⁹ Ao e taratarai taabo aika kaan ma aika raroa i bukin baika e na tiring ni kang.

³⁰ A ikotaki taian ikare ni katobibia te mate, ao a nima te raraa taian ikare aika uarereke.