Iobi 38 - Te B'aib'ara

E taetae te UEA Mai buakon te Angibuaka

¹ Ao e taetae te UEA nakon Iobi mai buakon te angibuaka ni kaangai:

² Antai ngkoe ngkai ko nanououa ni wanawanau, n aron am taeka aika akea nanoia?

³ Teirake ngkai n aron te aomata, ao kaekai titiraki aika N na titirakiniko iai.

⁴ Ko mena ikekei ngke I karaoa te aonnaba? Ngkana e bati am atatai i aon anne, ao taekinna nako Iu.

⁵ Antai ae baairea buburana? Antai ae katika te kora ni kaeti i aona? Ko atai kaekaan akanne ni kabane?

⁶ A tei i aon tera taiani boua ake a kamatoa te aonnaba? Antai ae kawenei atiibun koonan te aonnaba?

⁷ A ikotaki n anene itoi ni karangainan te bong arei, ao a takaarua ni kukurei b'ain karawa.

⁸ Antai ae kaina te mataroa n tuuka rinin taari ngkana a b'aroa aonteaba?

⁹ Boni Ngai ae I rabuna marawa n taian nang ma n niniria n te rotongitong.

¹⁰ I korea tian marawa, ao I katikua i tinanikun te mataroa ae rokanaki n taiani b'auti.

¹¹ Ao I kaangai nako ina, “Bon aio tokin naom aika korakora.”

¹² Iobi, Ko a tia n tuanga te kaarangaina b'a e na kainga mainiku i nanon maium?

¹³ Ko a tia n tuanga ootan te moaningabong b'a e na kanakoi buraen taurani matana ni kaota te aonnaba?

¹⁴ Ao i mwiina, e na kaota raoi te aonnaba ni katereterea kanga te kunnikai ae m'arairai ae matan te rooti, n ai aron tereteren te kanikina i aon te b'atua?

¹⁵ E rangi n raka raneanean te ngaina i rouia aomata aika buakaka n te aro are e tuukia man kaikoakaia aomata.

¹⁶ Ko a tia n roko ni koburaken taari are i kabin marawa ake i nano? Ko a tia n nakonako i kabin marawa?

¹⁷ Iai ae a tia ni kaoti nako im mataroan abaia maate ake a rotongitong?

¹⁸ Ko ataia b'a buburara te aonnaba? Ko na kaekaai ngkana ko ataia

¹⁹ Ko ataia b'a e nako mai ia te oota, ke tera oin rikin te rotongitong?

²⁰ Ko kona ni kaotia nako ia b'a ab'akira kawaia, ke ni manga konaa ni kaokia?

²¹ I taku b'a ko a boni kona, b'a ko a kara, ao I taku naba b'a ko mena naba ikekei n te tai are E karaoa iai te aonnaba!

²² Ko a tia n rin n taian ru ni kaawakinib'ai, ike I kaawakina iai te tinoo ma te karau te atiibu?

²³ I kakaawakini i bukin taai ni kangaanga, aika taai n un ao taai ni buaka.

²⁴ Ko a tia n roko n te tabo are e waerake mai iai taai, ke te tabo are e kaakare mai iai te ang mainiku?

²⁵ Antai ae kakaraoa kawain te karau are e b'aro rikaaki iai ma ni kaitiaka m'aain kawain te baa?

²⁶ Antai ae kab'aka te karau n te tabo are akea ae maeka iai?

²⁷ Antai ae teboka te aba ae b'atakataka ma ni m'auteretere, b'a aonga ni bwebwerake taian uteute?

²⁸ E koaua b'a iai taman te karau ma te aoi?

²⁹ Antai tinan te aiti,

³⁰ are e onika te ran nakon te atiibu, ao e kab'anina aontari?

³¹ Ko kona ni kabaea itoin Nei Auti ni ikoti, ke ni kabaea te Itua n Rereba?

³² Ko kona n tuangiia taian itoi te tai are a riai n otioti iai, ao ni kaeta aron te Bea are buubura ma bunna?

³³ Ko atai taian tua ake a kaira aron karawa, ao ko kona ni kamanena naba nakon te aonnaba?

³⁴ Ko kona n takaarua n anga am taeka nakon taian nang b'a a na kam'aim'aiko n te karau?

³⁵ Ngkana ko kanakoa b'anaam nakon te iti ni karawa b'a e na itiiti, e kona ni kawariko man kaangai, “Ngaia.”

³⁶ Antai ae tuanga te mannikiba ae te aibiti b'a e na kaota te karaanga ae na taorake?

³⁷ Antai ae rabakau ni wareki m'aitin taian nang ma ni karangai ni kab'aroi b'a taiani karau,

³⁸ te karau are kamatoa te tano b'a te b'ai ae b'anin?

³⁹ Ko kakaea te am'arake i bukiia taian raian b'a a na kanna ma ni katoki bakiia taiani bun n raian

⁴⁰ ngkana a karabaia i nanoni b'angaia te nangananga ni b'a, ke a wene n tataninga i nanon nneia?

⁴¹ Antai ae kakam'arakeia taian reben ngkana a kakaaenako ma bakiia, ngkana a tangira kanaia nako Iu natiia aika uarereke?