Iobi 33 - Te B'aib'ara

Ana taeka Eriu nakon Iobi b'a e na kakauongo raoi.

¹ Ao ngkai, Iobi, ko na kakauongo raoi nakon au taeka ni kabane.

² Nooria, I a kauka wiiu man taekin b'aai ni kabane ake a mena i nanou.

³ A eti raoi am taeka, ao a koaua.

⁴ E karaoai Tamnein te Atua, ao E kamaiuai ikeiken Teuare Moan te M'aaka.

⁵ Kaekaai ngkana ko kona, baairei raoi am taeka i matau ao kamatoako raoi.

⁶ Ti te bo arou ma ngkoe i matan te Atua, ti kaai ni karaoaki man te tano.

⁷ Ma ngaia are, bon akea bukina b'a ko na maakai; N na bon aki taobekaiko nako.

⁸ Ao aei te b'ai are ko taekinna are I ongo,

⁹ “I aki bure; I tuai karaoa te b'ai ae bure. Bon tiaki te tia bure ngai, ao bon akea te bure i Rou.

¹⁰ Ma E kakaea te anga teuana te Atua are E na buakanai iai, ao E karaoai b'a kaanga te kairiribai.

¹¹ E kabaei waeu n te taurekereke, E noori b'aai ni kabane aika I karaoi.”

¹² Ma I tuangko Iobi, b'a ko bure. E korakora riki te Atua nako ia aomata nako.

¹³ E aera ngkai ko bukina te Atua b'a E aki kaekaekai ngurengureia aomata?

¹⁴ E ngae ngke E aki toki n taetae te Atua n taai nako, ma bon akea ae katabea nanona n te b'ai ae E taekinna.

¹⁵ Ngkana a matu aomata, ao E taetae te Atua n taiani mii ma kaotioti.

¹⁶ E kauki taningaia b'a a na ongo baike E taekin, ao a na maaku n Ana taeka n reirei.

¹⁷ E taetae te Atua nako ia b'a aonga n toki man aia bure, ao ma ni kamaiuia man te aro ni kainikatonga.

¹⁸ E aki kona ni kariaia b'a a na tiringaki; E kamaiua man te mate.

¹⁹ E reireia te aomata te Atua ngkana E karokoa te aoraki ma te maraki i aon rab'atan te aomata.

²⁰ E a bua kan kanakin te am'arake are kani kaakanna, ao e na riba te am'arake are rangi ni kangkang.

²¹ A tangenge riina b'a ai ti te kun i aon te ri.

²² E a kaan rokona i abaia maate.

²³ E na mena ngkoa, ao e a roko naba te anera ni buokia are temanna mai buakoia Ana anera te Atua ake te ngaa, ake a kakauringiia aomata nako tib'angaia.

²⁴ E na nanoangaia te anera, ao e na kaangai, “Kainaomata! A aki riai b'a a na nako abaia maate. A na bon kainaomataaki.”

²⁵ A na manga okira aia bong n rikirake ma ni manga marurung;

²⁶ E na ongo te Atua i rouia ngkana a tataro; A na taromauriia te Atua ma te kukurei; E na manga kanakoraoi b'aai te Atua i bukiia.

²⁷ Ane a na taetae i mataia aomata ni kaangai, “I a tia ni bure, I a tia ni karaoa te b'ai ae aki raoiroi, ma e aki katuaaeai te Atua ngke I bon riai ni katuaeaki.

²⁸ E kaawakinai b'a N na aki roko i abaia maate, ao ai ngaia ae a riki n teimatoa iai maiu.”

²⁹ E karaoi b'aai ni kabane aikai te Atua n taai nako;

³⁰ E karekea maiun te aomata, ao E anganna kakukurein te maiu.

³¹ Ao ngkai Iobi, ko na ongora nakon te b'ai ae I taekinna; tai karongoa b'a N na taetae.

³² Ma ngkana iai te b'ai ae kona taekinna, ao taekina b'a N na ongora. I kani kakoaua raoi b'a ko eti ke ko aki.

³³ Ao ngkana akea te b'ai ae ko kan taekinna, ao tai karongoa ma ongora i Rou, b'a N na reireiniko arom ae ko na wanawana iai.