Iobi 31 - Te B'aib'ara

Aikai ana kabanea n taeka Iobi.

¹ I a tia ni karaoa te berita ae matoa b'a N na aki manga taratara te ataei n aine ma te kaitataan.

² Tera ae na karaoia te Atua ae m'aaka nako Iu? E na kanga ni kabooa mwiin ana m'akuri te aomata?

³ E karokoa te kangaanga ma te urub'ai te Atua ae m'aaka i aoia aomata aika buakaka.

⁴ E atai b'aai ni kabane aika I karaoi te Atua, ao E atai naba rangatan waeu.

⁵ I boni koaua b'a I bon tuai karaoa te m'akuri ae buakaka, ao I tuai naba ma ni manibuakaia tabem'aang.

⁶ Ke E katineai te Atua n te b'ai n tau rawawata ae koaua, ao E na noorai iai te Atua b'a bon te aomata ngai ae akea au bure.

⁷ Ngkana tao arona b'a e a tia ni bure kawaiu, ke tao n anaaki nanou n te buakaka. Ngkana tao e a tia ni kabarekaaki baiu n te bure,

⁸ ao ke e kamaunaaki arokau, ke ni kanaki uaan arokau i rouia tabem'aang.

⁹ Ngkana tao I a tia ni b'aka i roun buun te aomata ae I tabon auti ma ngaia, ke tao I a tia n torotoro ni karabaai i tinanikun ana mataroa neierei,

¹⁰ ao ke e kuukana kanan te m'aane temanna buu, ke ni wene n ana kainiwene te m'aane temanna.

¹¹ E na riai ni katuaaeaki te m'akuri ae moan te buakaka n aron anne n te mate.

¹² E na bon riki b'a te ai ae kamamate nako Iu are e na kabuokai ma au b'ai ni kabane.

¹³ Ngkana e ngure nako Iu au tia m'akuri, ao N na bon ongora i rouna ma ni karaoa ae raoiroi nako ina.

¹⁴ Ao ngkana I aki karaoa aei, N na kanga ni itaramata ma te Atua? Ao tera ae N na taekinna ngkana E roko ni motika taekau?

¹⁵ Te Atua are E karikai boni Ngaia naba are karika au tia m'akuri.

¹⁶ I bon tuai man rawa ni buoka te aomata ae kananoanga, ao I aki naba kariaia aine aika akea buuia b'a a na kainano,

¹⁷ ke ni kariaia ataei aika akea aia karo b'a a na baki ngkana I am'arake.

¹⁸ I tararuaia ma ngke ataei ngaiia kaanga ni kabane maiu, ao I kaawakiniia ma ngke a moan otinako man biroton tinaia.

¹⁹ Ngkana I noora te aomata ae kainano, ae e rangi ni kainano n te aro are aki kona naba ni kabooa ana kunnikai,

²⁰ ao N na bon anganna kunnikaina ae karaoaki man buraeia au nanai n tiibu, ao e na neboai ma nanona ni kabane.

²¹ I tuai man katea te ataei ae akea ana karo n te bowi ni kaburebure, e ngae ngke I ataia b'a N na tokanikai i aona n te kabowi,

²² ao ke a m'aotoua angani baiu ma n taenako baiu man rab'atau.

²³ I bon aki kona ni karaoa aei, i bukina b'a I maaka Ana katuua te Atua.

²⁴ I bon tuai man onimakina te kaub'ai;

²⁵ I bon tuai naba mani kainikatonga i bukin te kaub'ai ae bati i nanoni maiu.

²⁶ I tuai man taromauriia taai i bukin ootana, ke n taromauriia nam'akaina i bukin tamaroana ni kabane.

²⁷ I tuai naba man burebureaki ni bobaraaki ni karineia ni kaboria ma baiu n anga karineaia.

²⁸ Bon te bure ae ab'ab'aki karaoan aei nakon te Atua, ao e na katuaaeaki te aba iai i rouia taani moti.

²⁹ I bon tuai man kukurei ngkana a karawawataaki au kairiribai, ke ni kukurei ngkana a kaaitibo ma te kangaanga.

³⁰ I tuai naba ma ni bure n tataro b'a a na mate.

³¹ A bane n ataia aomata ake a m'akuri i rou b'a I teimatoa ni bubutim'aia iruwa.

³² I kakamotirawaia taani m'ananga n au auti, ao I aki kariaia b'a a na matu n aki akaaka.

³³ A kaakarabai aia bure aomata tabem'aang, ma I bon tuai man karabai au bure ngai.

³⁴ I aki tabe ni baika a na taekin aomata; I tuai naba mani kaina wiiu n taetaekinan te koaua, ao I aki naba titiku n te auti i bukin maakakin aia b'ab'ainingare.

³⁵ Bon akea temanna ae kan ongora ni baika I taekin. Ma I bon berita b'a a koaua au taeka ni kabane. Ke E kaekaai te Atua,

³⁶ ao N na bon katokai i aon angau, ma ni manga tabeki ni katokai i aon atuu b'a au bau ni uea.

³⁷ Ao i mwiina, N na tuanga te Atua b'aai ni kabane ake I a tia ni karaoi, ao N na roko i matana ma te aki maaku kaanga te nati ni uea.

³⁸ Ngkana tao I a tia ni iraea te aba are I unika aona, ma n anaia mai roun te tia b'aib'ai ni koaua.

³⁹ Ngkana tao I a tia ni kana te am'arake ae reke maikekei, ma ni karika te tia ununiki are e unikia b'a e na mate ni baki i bukin anne,

⁴⁰ ao ke a bwebwerake iai taian uteute aika kateketeke, n onei mwiin taian uita ma b'aare. E aki manga taetae Iobi.