Iobi 29 - Te B'aib'ara

Ana kabanea ni ngurengure Iobi.

¹ E a manga taetae riki Iobi, ao e taku,

² “Ai tera ngke I kona ni manga okiri au bong ake ngkoa, ake taai ake E tararuaai iai te Atua.

³ Ngke e kakab'aiaai iai te Atua ni kaota Ana taura i aoni kawaiu. E kairirai Ana taura i buakon te roo.

⁴ Bon aikai ngkoa au bong are e mari iai maiu, ao E kaawakina au auti ana iraorao te Atua.

⁵ Ao E mena te Atua i rarikiu, ao I a otab'aniniaki i rouia au koraki n ataei.

⁶ A rangi ni m'aiti aia miriki au kao ma au kooti, ao a bwebwerake naba arokau taian oriwa i aon te bon ae te kabanea n ririb'a.

⁷ Ngkana a bootaki unim'aanen te kaawa, ao ngai naba i buakoia.

⁸ A koerikaaki rorobuaka mai m'aaiu n te tai naba are a noorai iai, ao a teirake unim'aane ni kaota te karinerine nako Iu.

⁹ A toki n taetae aia mataniwi aomata;

¹⁰ a aki kakarongoa naba aomata aika a rangi kakannato.

¹¹ Ngkana a ongo ke a noorai aomata nako, ao a tataekinai ni kamoamoaai ma n taekini b'aai ake I karaoi.

¹² Ngkana e tang te aomata ae kainano, I buokia; ao I anga te i buobuoki nako ia ataei ake akea aia karo, ake akea te tabo ae a na nako iai.

¹³ A neboai aomata ake a mena i nanon te rawawata ae moan te korakora, ao I buokia aine aika mate buia ni karekea te kukurei nako ia.

¹⁴ I aki toki ni kakaraoa te eti ma te riai.

¹⁵ I riki b'a mataia aika mataki, ao waeia aika m'auku.

¹⁶ I riki b'a kaanga te karo nakon te aomata ae kainano, ao I tei i bukiia iruwa n tain te kangaanga.

¹⁷ I katoki maakuia aomata aika iowawa ma ni kamaiuia ake a m'ane i nanoni baiia.

¹⁸ I aki toki ni kaantaningaia b'a e na teimatoa maiu, ao N na mate n au auti ma te rau.

¹⁹ I riki ngkoa b'a kaanga te aroka aika teimatoa wakaana ni mena i nanon te ran, ao aki toki ni m'aim'ai baana n te aoi.

²⁰ A bane aomata ngkoa n neboai, ao a kakoroaki bukin au iango ni korakorau.

²¹ A bane n aki kakarongoa aomata ngkana I anga au kaetieti, ao a kakaauongo raoi nakon te b'ai are I taekinna.

²² Bon akea riki te b'ai ae a na manga taekinna ngkana a bane au taeka. A timtim au taeka i aoia kaanga b'akan te karau i aon te tano ae m'au.

²³ A bane ni butim'aai kaanga butim'aean te karau n tain te aumeaang i roun te tia ununiki.

²⁴ Ngkana I matangare nako ia, ao a kakorakoraaki nanoia iai.

²⁵ I riki b'a te mataniwi, ao I karaoi taiani babaaire; I kairiia n ai aron te uea ngkana e kairiia ana taanga ni buaka, ma ni karekea te mwengaraoi n aia tai ni kainano.