Iobi 19 - Te B'aib'ara

Ana taetae ni kawai Iobi nakon Biretata. Tao Manra riki am tai ni kamarakai?

¹ Ao e taku Iobi,

² “Tao ana maan ra karawawatan nanou n ami taeka?

³ E aki tau tebwina te tai ni kamamaaeai? ma kam aki mamaa iai?

⁴ E ngae ngkana tao I bure, ma kam aki maraki iai.

⁵ Kam taku b'a kam raoiroi riki nako Iu, ao kam tarai au kangaanga b'a taiani b'ai ni kakoaua i bukin au bure.

⁶ Kam aki ataia b'a bon te Atua ae karaoa aei? E a tia ni katauraoa te kai ni kab'aru i bukin kam'aneau.

⁷ Nooria, I totokoa aron ana kamwengabuaka, ao bon akea ae kakauongo; akea ae ongo tangiu i bukin te eti.

⁸ E a tia ni kaina te kawai te Atua, ao I aki kona n rin iai; E a tia ni karaba kawaiu n te rotongitong.

⁹ E a tia n anai kaub'aiu ni kabane, ao E kamaunaa karineau.

¹⁰ E oreai n aki akaaka, E kouwakaaea au kaantaninga, ao E katukai b'a N na rai ma ni mate.

¹¹ E un te Atua ao E rangin korakora unna nako iu; ao ni karikai b'a ana kairiribai ae moan te buakaka

¹² E kanakoa Ana taanga ni buaka ni buakanai, ao a otab'aninia au auti n rianna.

¹³ E a tia te Atua ni karaoia au utu b'a a na kiitanai; a manga aki kinaai aomata ake a bon kinaai ngkoa.

¹⁴ A bane n tia n nako au koraki ma raoraou nako.

¹⁵ A manga m'aninga taekau aomata ake I kairuwaia ngkoa n au auti, ao au toro te aine, e a manga karaoai b'a kaanga te iruwa ao te ianena.

¹⁶ E aki kaekaai te toro ngkana I weweteia e ngae ngkana I bubutiia b'a e na buokai.

¹⁷ E aki kona moan boiraan ikeikeu bu, ao e kararoa teuare tariu mai rarikiu.

¹⁸ A b'ainingareai taian ataei, ao a ngareakinai ngkana a noorai.

¹⁹ A taraai raoraou ma te mata n riribai. A manga taboribaai raoraou ake I tangitangiri ma ngaiia ngkoa.

²⁰ A b'arukuruku kuniu i aon riiu, ai ti terekena maiu.

²¹ Nanoangaai! Bon raoraou ngkami! E a tia n oreai te Atua ni kab'akaai ni baina.

²² E aera ngkai kam na b'ainikirinai n ai aron are E karaoia naba te Atua nako Iu? E tuai man toki nanomi ni kamarakai?

²³ Ai tera ngke iai te aomata temanna ae uringi au taeka, ao e koroi n taui mwiia n te boki!

²⁴ Ke ni koroi i aon te atiibu n te unika b'a aonga n aki kona ni manga mauna.

²⁵ Ma I ataia b'a n tokin aei, ao iai temanna ae na roko mai karawa n tei i buku.

²⁶ E ngae ngke e a tia kuniu aei ni kanaki n te aoraki ma N na bon noora naba te Atua i nanon rab'atau aei.

²⁷ N na bon nooria raoi ni matau, ao E na aki iruwa i Rou.

²⁸ “Ti na kanga ni kammarakia? ao Ko kakaea aonam ni buakanai.

²⁹ Ma ngkai, Ko riai ni maaka te kabaang te kabaang are uota unin te Atua i aon te bure b'a ko aonga n ataia b'a iai te tia motiki taekaia aomata.