Iobi 10 - Te B'aib'ara

Ana Ngurengure Iobi Nakon Te Atua I a Kua n te Maiu aei

¹ I a kua n te maiu aei! Ongora nakoni ngurengureu ae kai nanou iai.

² Ko na tai kabuakakaai te Atua. Tuangai b'a tera tuuau?

³ E koaua b'a e raoiroi b'a Ko na iowawa? E riai i Roum b'a ko na ribaa te aomata are ko bon karaoia? Ao ni kariaia aia waaki aomata aika buakaka?

⁴ Ti te arona nanom ma nanon te aomata?

⁵ E koaua b'a e uarereke maium n ai arora?

⁶ Tao anne bukina ngkai Ko wareki m'aitin au bure ni kabane, ma ni kakaei au kaairua ni kabane ake I a tia ni karaoi?

⁷ Ko bon ataia b'a I aki bure, ma antai temanna ae kona n tei i buku ni kaaitarako?

⁸ Ko karaoai ma ni buabuaai ni baim, ao ngkai, Ko a manga tiringai ni baim naba akanne.

⁹ Uringnga b'a Ko bon karaoai man te bokaboka, ao Ko nang manga urua rab'atau ni kaokia nakon te tano?

¹⁰ Ko angan tamau te korakora ni karikai, ao Ko karikirakeai i nanon biroton tinau.

¹¹ Ko karaoa rab'atau n taian ri ma taian toma n ri, ao Ko rabun n te ia ma te kun.

¹² Ko a tia n anganai te maiu ao te tangira ae teimatoa, ao e kateimatoa maiu Am kakawakin.

¹³ Ko karaoi b'aai akekei ni kabane, ma I ataia ngkai b'a Ko bon baaireia b'a Ko na kaikoakai.

¹⁴ Ao Ko tataraai b'a Ko taku b'a n na bure, b'a Ko aonga n aki kab'ara au bure.

¹⁵ Ni bon te tai naba are I bure iai, ao e a bon reke naba te kangaanga i marenau ma Ngkoe. Ma ngkana I karaoa ae e raoiroi, ao I aki kubaraki. I taonaki n te nanokawaki, ao I rootaki n te mamaa.

¹⁶ Ao ngkana tao I tokanikai, ao Ko aki ti torokaraniai kaanga te raian, ma Ko karaoi naba taian kakai ni kaikoakai.

¹⁷ Ko aki toki ni karerekei taiani b'ai ni kakoaua i bukin kaaitaraakiu. E rikirake man rikirake unim i rou, ao Ko aki toki ni babaairea aron buakanakiu.

¹⁸ Te Atua, bukin tera ngke Ko kariaia b'a N na bungiaki? N na riai n tia ni mate i m'aain ae noorai temanna.

¹⁹ Te m'ananga mai biroton tinau nakon te ruanimate, kaanga ai aron raoiroin te aki bungiaki i Rou.

²⁰ Tiaki e a bon kaan toki maiu? Katukai n arou! Ani kamaiua nanou n nikiran au bong aika ti tabebong.

²¹ N na waekoa n nako, ao I aki manga oki rikaaki N na nakon te aba ae roo ma n rotongitong,

²² are aban te roo, te nuu, ao te mangaongao, are kanga ai aron te rotongitong otana.