Ioane 8 - Te B'aib'ara

Te Aine are Kuneaki ni Wene ni Bure

¹ Ao Iesu e nako n te maunga are Oriweta.

² Ngke e a tib'a moa n ingabong, ao E a manga oki nakon te Tembora. A bane nakoina aomata, ao Ngaia E tekateka ao E reireiia.

³ Iai te aine temanna ae kuneaki ngke e wene ni bure. A kairia taani koroboki ma B'aritaio, ao a kaaki i nukaia aomata.

⁴ Ao a taku nakoina, “Te Tia Reirei, e kuneaki neiei n te tai are e karaoa iai te wene ni bure.

⁵ E tuangiira Mote n te Tua, b'a a na karebanaki akana a karaoa aron anne. Tera Ngkoe am taeka i bukin neienne?”

⁶ A atonga aei b'a a kani kam'anea, b'a e aonga n reke bukinana iai i rouia. E b'aoua ni baraaki Iesu, ao E koroboki n tabonibaina i aontano.

⁷ Ngke a aki toki n titirakinna, ao E teirake, ao E taku nakoia, “Ane tuai meni bure i buakomi, ao e na karea moa neiei n te atibu!”

⁸ Ao E a manga b'aoua ni baraaki riki ao E koroboki n tabonibaina i aontano.

⁹ Ngke a ongo aomata ana taeka Iesu, ao a oti nako n tatabemaniia, ni moa mairouia unimm'aane ni karokoa ae a bane aia koraki. E tiku Iesu n ti Ngaia, ao e tiku naba te aine arei ni nena are e tei iai.

¹⁰ E teirake Iesu ao E taku nakoina, “Neiko, a nga aomata? Akea i rouia ae e taku b'a ko bure?”

¹¹ Ao e taku neierei, “Te Uea, akea.” E taku ngkanne Iesu nakoina, “Ao Ngai I aki motika naba taekam; ko na nako, ao tai manga bure.”

Ootan Aonnaaba Iesu

¹² E a manga taetae Iesu nakoia aomata, ao E taku, “Ngai te oota nakoia aomata i aonnaba. Ane irai, ao e na bon aki nakonako n te roo, ma e na reke i rouna te oota are na anganna te maiu.”

¹³ Ma ngaia are, a taku B'aritaio nakoina, “Ko boni kaotiota arom i bon iroum; akea koauan am taeka!”

¹⁴ E kaekaia Iesu ao E taku, “Ao ngkana I kaotiota arou i bon irou, ao bon iai naba koauan au taeka: b'a I ata ike I nako mai iai, ao I ata ike N na nako iai; ma ngkami kam aki ata ike I nako mai iai, ao ike N na nako iai.

¹⁵ Kam b'aina te nano n aomata n ami motiki-taeka; akea ae I motika taekana.

¹⁶ Ma ngke arona b'a I motika taekan te aomata, ao e bon eti au moti, b'a tiaki ti Ngai ni katia au moti; bon raou te Tama are kanakomaiai.

¹⁷ E koreaki n ami tua ae kaangai b'a ngkana e bo raoi aia kaotioti taani kakoaua aika uoman, ao e koaua aia kaotioti.

¹⁸ Te tia kakoaua Ngai bon i buku, ao te tia kakoaua naba i buku bon te Tama are kanakomaiai.”

¹⁹ A taku ngkanne nakoina, “E nga Tamam?” E kaekaia Iesu ao E taku, “Kam aki ataai ao kam aki ata naba Tamau.”

²⁰ E atongi taeka aikai Iesu n te Tembora n te ru are a mena iai b'aoki ake a nneaki iai b'aai n tangira. Akea irouia aomata ae e taua ni kaburea, b'a E tuai ni bo ana aoa.

Kam aki kona n Roko ike N na nako iai

²¹ E a manga taku naba Iesu nakoia, “N nangi nako, ao ane kam na ukoukorai, ma kam na mate i buakon ami bure. Ike N na nako iai, ao kam aki kona n roko iai.”

²² Ma ngaia are, a taku I-Iutaia, “E na bakabureia ngkae E kaangai, Kam aki kona n roko ike N na nako iai?”

²³ E taku Iesu nakoia, “Kaain aon te aba ngkami, ma Ngai kaain eta. Ana b'ai te aba aei ngkami, ma tiaki ana b'ai te aba aei Ngai.

²⁴ Ao anne bukin are I kaangai iai nakoimi b'a kam na mate i buakon ami bure; b'a kam na boni mate i buakon ami bure ngkana kam aki kakoauaai b'a boni Ngaia Ngai.”

²⁵ A titirakinna ngkanne ni kaangai, “Antai Ngkoe?” E kaekaia Iesu ao E taku, “Boni ngaia are I a tia n taekinna nakoimi ma ngke I moa n taetae.

²⁶ A bati baika I kona n taekin b'a taekami, ao baika I kona ni kaoti b'a aromi aika bubuaka. E taekina te koaua Teuare kanakomaiai, ao are I taekinna nakoia aomata i aonnaba bon ti are I a tia n ongo mai Rouna.”

²⁷ A aki ataia b'a E taekina te Tama nakoia.

²⁸ Ma ngaia are, E taku Iesu nakoia, “Ngkana kam a tia n tabeka rake Natin te Aomata ni katinea i aon te kaibangaki, ao kam a ataia iai b'a boni Ngaia Ngai, ao akea te b'ai ae I karaoia n oin nanou; ma I atongi baikai n ai aron reireiau iroun te Tama.

²⁹ E memena irou Teuare kanakomaiai; E aki kitanai ni katukai n ti Ngai, i bukina b'a I aki toki ni kakaraoa te baere E kukurei iai.”

³⁰ A m'aiti aomata aika ongo ana taeka Iesu aikai, ao a kakoauaa.

E na Kainaomataingkami te Koaua

³¹ E taku ngkanne Iesu nakoia I-Iutaia ake a kakoauaa, “Ngkana kam teimatoa n ongeaba nakon au taeka, ao bon au reirei ni koaua ngkami iai;

³² ao kam na ata te koaua, ao e na kainaomataingkami te koaua.”

³³ A taku nakoina, “Kanoan Aberaam ngaira, ao akea ae ti a tia n toronaki i rouna. Tera ngkanne nanon am taeka, ngke Ko kaangai: Kam na kainaomataki?”

³⁴ E kaekaia Iesu ao E taku, “Bon te koaua ni koaua ae I a tuangngkami b'a ane karaoa ae buakaka ao e toronaki iroun te buakaka.

³⁵ E aki tiku ni maan te toro b'a kaain te utu, ma e tiku te nati b'a kaaina n aki toki.

³⁶ Ma ngaia aei, ngkana E kainaomataingkami te Nati, ao kam na bon inaomata.

³⁷ I ata ae kanoan Aberaam ngkami. Ma e boni ngae n anne, ao kam ukoukora kamateau i bukina b'a kam rawa ni butim'aea au taeka n reirei.

³⁸ I taekini baika I noori ma Tamau, ma ngkami kam karaoi baike e tuangngkami tamami.”

Te Riaboro Tamami

³⁹ A kaekaa ao a taku, “Ara bakatibu Aberaam.” E taku ngkanne Iesu, “Ngke arona b'a kanoan Aberaam ngkami, ao kam karaoa are e karaoia Aberaam.

⁴⁰ Ma ae kam ukoukora naba kamateau, Ngai ae te aomata ae I tuangngkami te koaua are I ongo mairoun te Atua; e aki karaoa aei Aberaam.

⁴¹ Kam karaoa are e karaoia tamami.” A taku nakoina, “Tiaki natintam'a ngaira; ti temanna Tamara, b'a te Atua.”

⁴² E taku Iesu nakoia, “Ngke arona b'a te Atua Tamami, ao kam na tangirai, b'a I nako mairoun te Atua. I aki nako mai n oin nanou, ma E kanakomaiai.

⁴³ E aera ngkai kam aki ata nanon te bae I taekinna? Aio bukina, b'a kam rawa ni kan ongo au taeka n reirei.

⁴⁴ Natin tamami are te riaboro ngkami, ao nanomi ti te kani karaoa are e tangiria tamami. Te tia kamaamate ngaia ma rimoa, ao e aki b'ab'aina te koaua, b'a akea te koaua i nanona. Ngkana e kewe, ao e boni kaota anuana: b'a te tia kewe ngaia, ao boton te kewe.

⁴⁵ Ma, i bukina ngkai I taekina te koaua, ao kam aki kakoauaai.

⁴⁶ Antai iroumi ae kona ni motika taekau b'a I bure? Ngkana I atonga te koaua, ao kam aera ngkai kam aki kakoauaai?

⁴⁷ Ane mairoun te Atua, ao e ongo ana taeka te Atua; ma tiaki mairoun te Atua ngkami, ma ngaia ae kam aki kan ongo.”

Iesu ao Aberaam

⁴⁸ A kaeka I-Iutaia ao a taku nakon Iesu, “Tiaki b'a e eti ara taeka ngke ti taku b'a te I-Tamaria Ngkoe, ao iai iroum te taimonio?”

⁴⁹ E kaekaia Iesu ao E taku, “Akea te taimonio irou; ma I karinea Tamau, ao ngkami kam aki karineai.

⁵⁰ I aki ukoukora neboakiu. Ma iai ane ukoukoria, ao E motiki-taeka.

⁵¹ Bon te koaua ni koaua ae I a tuangngkami, b'a ane ongeaba nakon au taeka n reirei, ao e na bon aki mate.”

⁵² A taku I-Iutaia nakoina, “Ti a ataia raoi ngkai b'a iai iroum te taimonio! E mate Aberaam, ao a mate naba burabeti; ao Ngkoe ko kaangai, Ane ongeaba nakon au taeka, ao e na bon aki mate.

⁵³ Ko kakannato riki nakon Aberaam are ara bakatibu, are mate? Ao a mate naba burabeti! Ko taku b'a antai Ngkoe?”

⁵⁴ E kaekaia Iesu ao E taku, “Ngkana I neboai, ao akea bonganan neboau. Ae neboai bon Tamau, are kam taku b'a Atuami.

⁵⁵ Kam aki ataia; I ataia Ngai. Ngkana I taku b'a I aki ataia, ao N na riki b'a te tia kewe Ngai n ai aromi; ma I ataia ao I ongeaba nakon ana taeka.

⁵⁶ E kim'areirei ami bakatibu are Aberaam ni kan nora te bong are N na roko iai; ao e a kaman noria, ao e kakatonga iai.”

⁵⁷ A taku ngkanne nakoina I-Iutaia, “A tuai ni koro nimangaun am ririki ni maiu, ao Ko a tia n nora Aberaam?”

⁵⁸ E taku Iesu nakoia, “Bon te koaua ni koaua ae I a tuangngkami, b'a bon iai Ngai ma ngkoa i m'ain Aberaam.”

⁵⁹ Ma ngaia are, a anai atibu b'a a na karebanaia, ma E karabaa Iesu, ao E kitana te Tembora.