Ioane 7 - Te B'aib'ara

A aki Kakoaua Iesu Tarina

¹ I mwin arei ao E m'am'ananga Iesu i aoni Kariraia; E aki kona ni m'am'ananga i aon Iutaia i bukina ngke a kani kamatea I-Iutaia.

² E a kaan roko tain aia botaki I-Iutaia teuana are te Toa are te Um'anrianna.

³ A kaangai ngkanne tarin Iesu nakoina, “Kitana ikai ao nako i Iutaia, b'a a aonga n noori m'akuri aika Ko karaoi am reirei.

⁴ B'a akea te aomata ae karaba ana m'akuri ni karaoia ngkana iai i nanona te kan ataaki irouia aomata. Ngkai Ko karaoi baikanne, ao kaotiko nakoia aomata nako!”

⁵ Akea onimakinana naba irouia tarina.

⁶ E taku Iesu nakoia, “E tuai ni bo au tai; ma ngkami, e a tau naba iroumi te tai n aki akaaka.

⁷ Akea bukin ae kam na ribaaki iai irouia aomata nako; ma iai bukin ribakiu i rouia, b'a I aki toki n tuangiia b'a a bubuaka aia m'akuri.

⁸ Kam na nako ni kaea te botaki. I aki nako Ngai ni kaea, b'a e tuai ni bo au tai.”

⁹ E atongi baikai nakoia, ao E tiku naba i Kariraia.

E Roko Iesu n te Toa are te Um'anrianna

¹⁰ Ngke a tia n nako tarina nakon te Toa are te Um'anrianna, ao Ngaia E nako naba, ma E karaba n nako n te aro ae akea ae ataia.

¹¹ A ukoukoria I-Iutaia n te Toa, ao a taku, “E nga Teuarei?”

¹² E bati te maningongoo irouia aomata i bukina. A taku tem'angina, “Te aomata Ngaia ae e raoiroi,” ao tem'angina a taku, “Tiaki; bon te tia burebureia aomata.”

¹³ Ma akea ae kanenea b'anaana n taekinna irouia aomata, b'a a makuia I-Iutaia.

¹⁴ Ngke tao e a bo nukan tain te Toa, ao E nako n te Tembora Iesu, ao E reirei iai.

¹⁵ A mimi i rouna I-Iutaia, ao a taku, “E kanga n reke rabakaun te aomata aei, ao E aki rereireiaki?”

¹⁶ Ma ngaia are, E taku Iesu nakoia, “Tiaki au b'ai au reirei, ma ana b'ai Teuare kanakomaiai.

¹⁷ Ane kukurei ni karaoa nanon te Atua, ao e na ataia iai b'a te b'ai ae I anga b'a au reirei e nako mairoun te Atua, ke e nako boni man au iango.

¹⁸ B'a te aomata ane taetae n oin nanona, ao e kataia ni karekea kamoamoana bon i bukina. Ma te aomata ae tangira kamoamoakin Teuare kanakomaia, ao E kaotia b'a e taekina te koaua, ao tiaki te kairua.

¹⁹ Tiaki e anganingkami te Tua Mote, ao akea temanna i buakomi ae toua mwina? Kam aera ngkai kam ukoukora kamateau?”

²⁰ A kaeka aomata ao a taku, “Iai iroum te burababa; antai ae ukoukora kamateam?”

²¹ E kaekaia Iesu ao E taku nakoia, “I karaoa te m'akuri teuana ae kamimii, ao kam bane ni mimi iai.

²² E anganingkami Mote te tua i bukin te korotabonimm'aane (ma n te koaua tiaki mairouni Mote b'a mairouia bakatibu), ao kam korotabonim'anea te aomata n te Taabati.

²³ Ngkana e korotabonim'aneaki te aomata n te Taabati, n te aro ae e aki uruaki iai te tua are e anga Mote, ao tera bukin ae kam na un iai irou ngkai I kamaiua te aomata n te Taabati?

²⁴ Kam na aki kairaki n ami motiki-taeka n taraan te b'ai, ma kam na kairaki n ami motiki-taeka n te eti.”

Te Kristo Teuaei?

²⁵ A taku I-Ierutarem tabem'aang, “Tiaki aei Teuare a ukoukora kamateana?

²⁶ Noria, E taetae i mataia aomata, ao a aki taetae nakoina aia mataniwi I-Iutaia. Tao a bon ataia ae te Kristo Teuaei?

²⁷ Ma ngaira ti ata te tabo are E nako mai iai Teuaei; ma ngkana E roko te Kristo, ao akea ae e ata te tabo are E nako mai iai.”

²⁸ Ma ngaia are, ngke E reirei Iesu n te Tembora, ao E kanenea b'anaana ao E taku, “Kam ataai, ao kam ata naba te tabo are I nako mai iai? Ma I aki nako mai n oin nanou. Iai iroun Teuare kanakomaiai, are kam aki ataia, bon te onimakinaki raoi.

²⁹ Ma I ataia Ngai, b'a I nako mai mai Rouna, ao Ngaia ae kanakomaiai.”

³⁰ A ukoukora te anga ae a na taua iai, ma akea temanna ae roko baina i aona, i bukina b'a e tuai ni bo ana tai are E na tauaki iai.

³¹ Ma a m'aiti i buakoia aomata aika kakoaua Iesu. A taku, “Ngkana E roko te Kristo, ao E na karaoi m'akuri aika kamimii ni kabatiai riki nakon ake E karaoi Teuaei?”

A Kanakoaki Bureitiman b'a a na Taua Iesu

³² A ongo taekan Iesu aikai B'aritaio n aia wirikiriki aomata, ma ngaia are i mwin reken aia iango ma ibonga ake mataniwi, ao a kanakoia bureitimanin te Tembora b'a a na taua Iesu ni kaburea.

³³ E taku Iesu, “N na kamaanai ni mena iroumi teutana riki, ao i mwina N na kitaningkami nakon Teuare kanakomaiai.

³⁴ Ane kam na ukoukorai, ma N na aki reke iroumi, b'a kam aki kona n roko n te tabo are N na mena iai.”

³⁵ A taku I-Iutaia ngkanne i bon i rouia, “E nga te tabo ae E na nako iai ngkai E na aki reke iroura? E na nako n aia kaawa I-Erene ike a maeka iai kaain ara botannaomata, b'a E na reireiia I-Erene?

³⁶ Tera nanon ana taeka are kaangai, Ane kam na ukoukorai, ma N na aki reke iroumi, b'a kam aki kona n roko n te tabo are N na mena iai.”

Karaanga n ran ni Kamaiu

³⁷ N te kabanea ni bong ae kakannato n tain te Toa are te Um'anrianna, ao E teirake Iesu, ao E kanenea b'anaana ni kaangai, “Ane kani mooi, ao ke e nako iu b'a e na moi!

³⁸ Ane onimakinai, ao a na raanga nako karaanga n ran ni kamaiu mai nanona, n ai aron taekana n te B'aib'ara.”

³⁹ E taekina aei Iesu b'a taekan te Tamnei are Tabu, are a na anganaki akana onimakinna: b'a e tuai anganaki te aba te Tamnei are Tabu, i bukina b'a E tuai ni bo ana tai Iesu n neboaki.

A Untaba aia Iango aomata n taekan Iesu

⁴⁰ Iai tabeman i buakoia aomata ake a bati aika ongo ana taeka Iesu aikai, ma ngaia are a taku, “Teuaei bon te Burabeti!”

⁴¹ Ao tem'angina a taku, “Boni Ngaia te Kristo!” Ma a taku ake tem'angina, “B'a E na kaoti te Kristo mai Kariraia?

⁴² Tiaki e taku te B'aib'ara b'a E na riki te Kristo man ana kariki Tawita, ao E na kaoti mai Betereem, are ana kaawa Tawita?”

⁴³ Ma ngaia are, a aki boraoi aia iango aomata n taekan Iesu.

⁴⁴ Iai tem'angina i buakoia aomata ake a bati aika kan taua Iesu, ma akea i rouia ae e roko baina i aona.

A aki Kakoaua Iesu aia Mataniwi I-Iutaia

⁴⁵ A oki bureitimanin te Tembora nakoia ibonga ake mataniwi ma B'aritaio; ao ngaiia a taku nakoia bureitimanin te Tembora, “Kam aera ngkai kam aki kairiia mai?”

⁴⁶ A kaekaia bureitiman ao a taku, “Akea ma ngkoa ae aron Teuaei ngkana E taetae!”

⁴⁷ A taku ngkanne B'aritaio nakoia, “Ao ngkami, kam m'am'anaki naba i rouna?

⁴⁸ Iai aika kakoaua Iesu i buakoia aia mataniwi I-Iutaia ma B'aritaio?

⁴⁹ Ma aomata aika m'aiti aikai, aika aki ata te tua, ane a na reke kaiia!”

⁵⁰ Ao Nikotemo ae te B'aritaio naba, are kawara Iesu rimoa, e taku nakoia aomata,

⁵¹ “Tiaki b'a e kaangai taekan ara Tua: b'a e aki kona ni motikaki taekan te aomata ni karokoa ae e a tia moa n ongora te aba mai rouna ao n ataaki b'a tera ae e karaoia.”

⁵² A kaeka ao a taku nakoina, “Te I-Kariraia naba ngkoe? Ko na ukeuke n te B'aib'ara, ao ko na noria iai b'a akea taekan te burabeti ae na kaoti mai Kariraia.”

⁵³ A bane aomata n okiri aia auti.