Ioane 6 - Te B'aib'ara

E Kaam'arakeia Aomata aika Nimangaa Iesu

¹ I mwini baikekei ao E ri nanon namani Kariraia Iesu, are e aranaki naba b'a naman Tiberia, nakon iterana are teuana.

² A iria aomata aika rangi ni m'aiti i bukina b'a a tia n noori ana m'akuri aika kamimii ni kamaiuaia aoraki.

³ E ararakea te maunga ae aki rietaata Iesu ma ana reirei, ao a tekateka iai.

⁴ E a kaan tain te Toa are te Riao, are aia botaki ae kakannato I-Iutaia.

⁵ E tabeki matana Iesu ngkanne, ao ngke E nooriia aomata aika rangi ni m'aiti b'a a nakoina, ao E taku nakoni Biribo, “Ti na kabo am'arake ia b'a kanaia aomata aikai?”

⁶ E atonga aei Iesu b'a E kani kataa Biribo: b'a Iesu E a boni kaman ata are E na karaoia.

⁷ E kaeka Biribo ao e taku, “E aki tau uabubua te tenari b'a e na kaboaki iai te am'arake ngkai e na rangi n uarereke ae na reke iai b'a kanan temanna ma temanna?”

⁸ E taku nakoina ana reirei temanna are Anterea, are tarin Timon Betero,

⁹ “Iai te teinimm'aane ikai ae iai i rouna nimaai te kariki are karaoaki mani burawan te b'are, ao uoman te ika; ma tera manenaia nakoia aomata aikai ni kabaneia?”

¹⁰ E taku Iesu, “Tuangiia aomata b'a a na tekateka n rarikiriki.” B'a e bati te uteute n te tabo arei. A bane n tekateka aomata, ao tao nimangaa m'aitiia mm'aane.

¹¹ E anai kariki akekei Iesu, ao E tataro ni katituaraoi, ao E anga b'a a na tib'aki nakoia ake a tekateka. E karaoa naba ae aron aei nakon ika, ao a bane n reke tib'aia n ai aroni m'aitin are a tangiria.

¹² Ngke a ngae, ao E taku Iesu nakoia ana reirei, “Ikoti nikiran am'arake, b'a akea teutana ae na bakataeaki.”

¹³ Ma ngaia are, a ikoti, ao a kaoni b'aene aika tengauni ma uakora ni m'akorokoron nikirani kariki ake nimaai ake a tia ni kang aomata.

¹⁴ Ao aomata ngke a nora te b'ai are kamimii are E karaoia Iesu, ao a taku, “Bon aei te burabeti are nangi roko i aonnaba!.”

¹⁵ Ngke E ataia Iesu b'a a nangi roko aomata n taua ma te matoa b'a a na kauea, ao E a manga oki nakon te maunga, n ti Ngaia.

E Nakonako Iesu i aon te Nama

¹⁶ Ngke e a kani bong, ao a nako ana reirei nakon te nama;

¹⁷ a toka i aon te boti, n ri nanon te nama nako Kaberenaum. E a bong, ao E tuai n roko Iesu i rouia.

¹⁸ E a roko buakan te nama i bukin te ang b'a e korakora karena.

¹⁹ Ngke a tia ni bwenarina i nanon tao nimaua ke onoua te kiromiita, ao a nora Iesu b'a E nakonako i aon te nama, ni kaania te boti; ao a maku.

²⁰ Ma E taku nakoia, “Boni Ngai, tai maku.”

²¹ A kukurei ngkanne ni katokaa Iesu n te boti; ao e waekoa naba n roko te boti i eta n te tabo are a nako iai.

A Ukoukora Iesu Aomata

²² N te bong are i mwina, ao aomata ake a mena i mainikun te nama a tia n noria b'a ti tewaana te booti ikekei, ao a ataia naba b'a E aki toka Iesu i rarikia ana reirei n te boti arei; a tia n nako ana reirei n ti ngaiia.

²³ Ma iai tabewa booti ake a roko mai Tiberia nako rarikin te tabo are a kang kariki iai aomata i mwin ana tataro ni katituaraoi te Uea.

²⁴ Ma ngaia are, ngke a noria te koraki arei b'a E aki mena ikekei Iesu, ao akea naba ana reirei, ao a toka i aoni booti n nako Kaberenaum b'a a na ukoukora Iesu.

Bon te Am'arake ni Kamaiu Iesu

²⁵ Ngke a kunea Iesu te koraki arei i maeaon te nama, ao a taku nakoina, “Te Tia Reirei, Ko roko ikai n ningai?”

²⁶ E kaekaia Iesu ao E taku, “Bon te koaua ni koaua ae I a tuangngkami, b'a kam ukoukorai tiaki i bukina ngke kam noori m'akuri aika kamimii, ma i bukina ngke kam kang kariki ao kam ngae.

²⁷ Kam na aki m'akuri ni karekea te am'arake ae kai buakaka, ma kam na uaiakina reken te am'arake ae teimatoa, ae te am'arake i bukin te maiu are aki toki.”

²⁸ Ma ngaia are, a titirakinna ni kaangai, “Tera ae ti riai ni karaoia b'a ti aonga ni karaoa iai are E tangiria te Atua?”

²⁹ E kaeka Iesu ao E taku, “Te b'ai ae E tangiria te Atua b'a kam na karaoia bon aei: kam na onimakina ae E a tia ni kanakomaia.”

³⁰ Ma ngaia are, a taku nakoina, “Tera te m'akuri ae kamimii ae Ko na karaoia b'a ti aonga n noria, ao ti a kakoauako iai? Tera ae Ko na karaoia?

³¹ A kangi maana ara bakatibu n te rereua, n ai aron are koreaki ni kaangai: ‘E anganiia te am'arake mai karawa b'a kanaia.’ ”

³² E taku ngkanne Iesu nakoia, “Bon te koaua ni koaua ae I a tuangngkami b'a tiaki Mote ae anganingkami te am'arake mai karawa, ma Tamau ae anganingkami te am'arake ni koaua mai karawa.

³³ B'a te am'arake ae E anga te Atua boni Ngaia ae ruo mai karawa, ao E anga te maiu nako aonnaba.”

³⁴ A taku ngkanne nakoina, “Te Uea, Ko na anganganira te am'arake anne n taai nako.”

³⁵ E taku Iesu nakoia, “Boni Ngai te am'arake ni kamaiu; ane nako iu ao e na bon aki manga kona ni baki, ao ane onimakinai ao e na bon aki taka.

³⁶ Ma I a tia n tuangngkami b'a e ngae ngke kam a tia n norai, ma kam na bon aki onimaki.

³⁷ Aomata nako akana E anganai te Tama ao a na bane nako iu. N na bon aki kona n tannako mairoun ane nako iu.

³⁸ B'a I roko mai karawa, tiaki i bukini karaoan nanou, ma i bukini karaoan nanon Teuare kanakomaiai.

³⁹ Aio nanon Teuare kanakomaiai: E tangirai b'a N na aki kabua temanna i buakoia ake E a tia n anganai, ma N na manga kamaiuia ni kabaneia n te kabanea ni bong.

⁴⁰ B'a aio nanon Tamau: b'a ane nora te Nati ma n onimakinna, ao e na reke i rouna te maiu are aki toki; ao N na manga kamaiua n te kabanea ni bong.”

⁴¹ A ngureakinna ngkanne I-Iutaia i bukina ngke E kaangai, “Ngai te am'arake are ruo mai karawa.”

⁴² Ao a taku, “Tiaki Iesu Teuaei, are natin Ioteb'a? Ti kinaa tamana ma tinana. E na kanga ngkanne ni kaangai, I ruo mai karawa?”

⁴³ E kaekaia Iesu ao E taku nakoia, “Kam na katoki ngurenguremi.

⁴⁴ Akea ae kona n riki b'a au reirei ngkana e aki kairaki nako iu iroun te Tama are kanakomaiai; ao N na manga kamaiua n te kabanea ni bong.

⁴⁵ E koreaki irouia burabeti ae kaangai, ‘A na bane aomata nako n reireiaki iroun te Atua. E riki b'a au reirei te aomata ane ongo ma n reirei iroun te Tama.

⁴⁶ Tiaki nanona b'a iai ae e a tia n nora te Tama; ti Teuare mairoun te Atua ae E a tia n nora te Tama.

⁴⁷ Bon te koaua ni koaua ae I a tuangngkami b'a ane onimaki ao e a reke i rouna te maiu are aki toki.

⁴⁸ Ngai te am'arake ni kamaiu.

⁴⁹ A kangi maana ami bakatibu n te rereua, ao a mate.

⁵⁰ Aio te am'arake are ruo mai karawa, are e na kanna te aomata ao e na aki mate.

⁵¹ Ngai te am'arake ae reke te maiu mai iai are ruo mai karawa. Ane kana te am'arake aei, ao e na maiu n aki totoki; ao te am'arake ae N na anga i bukini maiun te aonnaba bon irikou.”

⁵² A kauntaeka ngkanne I-Iutaia i bon i rouia, ao a kaangai, “E na kanga Teuaei ni kona n anganira irikona b'a karara?”

⁵³ Ma ngaia are, E taku Iesu nakoia, “Bon te koaua ni koaua ae I a tuangngkami, b'a ngkana kam aki kana irikon Natin te Aomata, ao kam aki nima raraana, ao akea te maiu i nanomi.

⁵⁴ Ane kana irikou ao e nima raraau, ao e a reke i rouna te maiu are aki toki, ao N na manga kamaiua n te kabanea ni bong.

⁵⁵ B'a bon te am'arake ni koaua irikou, ao bon te ninima ni koaua raraau.

⁵⁶ Ane kana irikou, ma n nima raraau, ao e memena i nanou, ao Ngai i nanona.

⁵⁷ Ngkai E kanakomaiai te Tama are mai Rouna te maiu, ao Ngai I maiu i bukin te Tama, ao te aomata ngkanne ane kanai e na maiu i buku.

⁵⁸ Aei te am'arake are ruo mai karawa; tiaki aron te am'arake are a kanna ami bakatibu, ao a mate i mwina. Te aomata ane kana te am'arake aei, ao e na maiu n aki toki.”

⁵⁹ E atongi baikai Iesu ngke E reirei ni m'aneabaia I-Iutaia i Kaberenaum.

Taeka i bukin te Maiu are aki toki

⁶⁰ Ngke a ongo baikai m'aitiia ana reirei Iesu, ao a taku, “A matoatoa taeka aikai; antai ae kona n ongora iai?”

⁶¹ E ataia Iesu i nanona ae a ngurengure ana reirei i bukin taeka akekei, ma ngaia are E titirakiniia ao E taku, “A uruaki ami onimaki n taeka akekei?

⁶² Iangoia b'a kaanga tera ae na riki ngkana arona b'a kam nora Natin te Aomata b'a E rierake nakon te tabo are E mena iai ngkoa?

⁶³ Ae E anga te maiu bon Tamnein te Atua; akea irouia aomata ae kona ni karaoa aei. A riki taeka aika I a tia n atong b'a kawain rokon te Tamnei ao te maiu iroumi.

⁶⁴ Ma iai i buakomi aika aki onimaki.” B'a Iesu E a kaman ataiia rimoa b'a antai ake aki onimaki, ao antai teuare na kam'anea.

⁶⁵ Ao E a manga taku riki, “Ao aei bukin are I tuangngkami b'a akea te aomata ae kona n riki b'a au reirei, ma ti ngkana e anganaki te kona iroun te Atua.”

⁶⁶ I bukin aei, ao a kitana Iesu ana reirei aika m'aiti n aki manga kan airiiri ma Ngaia.

⁶⁷ E taku ngkanne Iesu nakoia uake tengauni ma uoman, “Kam na nako naba ngkami?”

⁶⁸ E kaekaa Betero ao e taku, “Te Uea, ti na nako n antai? A mena iroum taeka aika e reke mai iai te maiu are aki toki.

⁶⁹ Ti kakoauako ao ti ataiko b'a Teuare Moan te Raoiroi Ngkoe, are Natin te Atua.”

⁷⁰ E kaeka Iesu ao E taku, “Tiaki I rineingkami ngkami aika tengauni ma uoman, ao bon iai te riaboro temanna i buakomi!”

⁷¹ E taekina Iuta are natin Timon Itekariota, are temanna i buakoia uake tengauni ma uoman, b'a ngaia are e na kam'anea.