Ioane 4 - Te B'aib'ara

Iesu ao Ainen Tamaria

¹ Ngke E ataia Iesu b'a a tia n ongo B'aritaio ae E karekeia ana reirei ni kam'aitiia riki nakoni m'aitiia ana reirei Ioane, ao E b'abetitoia n aron naba are e karaoia Ioane nakoia ana reirei

² (ma tiaki Iesu ae b'ab'abetito b'a bon ana reirei),

³ ao E kitana Iutaia, ao E a manga nako Kariraia.

⁴ E riai b'a E na ri nukan Tamaria.

⁵ Ao E roko ni kawana teuana ae arana Tukara, ae kaani ma te aba are e anga Iakob'a nakon natina are Ioteb'a.

⁶ E mena ikekei ana m'anib'a Iakob'a, ao E a kua Iesu imwiin nakonakona, ma ngaia are E tekateka i etan te m'anib'a arei. Tao e a tawanou.

⁷ E roko te aine temanna, ae te I-Tamaria, b'a e na roaa te ran. E taku Iesu nakoina, “Kaamai te ran b'a N na moi.”

⁸ Akea ana reirei Iesu n te tai aei b'a a nako n te kaawa ni kabo kanaia.

⁹ E kaekaa Iesu neierei ao e taku, “Ko kanga ni butiai nimam, ngkai te I-Iutaia Ngkoe, ao ngai ainen Tamaria?” B'a a aki kan reitaki naba teutana I-Iutaia ma I-Tamaria.

¹⁰ E kaeka Iesu ao E taku nakoina, “Ngke tao ko ata ana b'ai n tangira te Atua, ao Teuae kaangai ngkai nako im, Kaamai b'a N na moi, ao ko na kamani butiia, ao Ngaia E a anganiko naba iai te ran ni kamaiu.”

¹¹ E taku neierei nakoina, “Teuaei, akea am b'ai n iti ran, ao e nano te m'anib'a; ko karekea maia ngkanne te ran ni kamaiu?

¹² Ko kakannato riki nakon ara bakatibu are Iakob'a, are anganira te m'anib'a aei, ao e momooi mai iai, ngaia ma natina ma ana man?”

¹³ E kaeka Iesu ao E taku nakoina, “Ane moi n te ran aei ao e na manga taka,

¹⁴ ma ane moi n te ran ae N na anganna, ao e na bon aki manga taka. B'a te ran ae N na anganna, e na riki b'a te m'anib'a n ran i nanona are na koburake ao e na anganna te maiu are aki toki.”

¹⁵ E taku te aine nakoina, “Teuaei, Anganai te ran anne, b'a I aonga n aki manga taka ao n aki manga roko ikai n iti ran.”

¹⁶ E taku Iesu nakoina, “Naako wetea buum ao manga nako mai.”

¹⁷ E kaeka te aine arei ao e taku, “Akea buu.” E taku Iesu nakoina, “E eti ane ko taku b'a akea buum;

¹⁸ b'a niiman ngkoa buum, ao te mm'aane ane ko taanga ma ngaia ngkai bon tiaki buum: te koaua ane ko atongnga.”

¹⁹ E taku te aine nakoina, “Teuaei, I ataiko b'a te burabeti Ngkoe.

²⁰ A tataromauri I-Tamaria ake ara bakatibu i aon te maunga aei; ao ngkami aika I-Iutaia kam taku b'a Ierutarem boni ngaia te tabo are a na tataromauri iai aomata.”

²¹ E taku Iesu nakoina, “Neiko, ko na kakoauaai b'a ane na roko te tai are a na aki taromauria iai te Tama aomata i aon te maunga aei, ke i Ierutarem.

²² Ngkami I-Tamaria kam taromauria ae kam aki ataia; ma ngaira I-Iutaia ti taromauria ae ti ataia: b'a e roko te kamaiuaki ri nanon te botannaomata ae I-Iutaia.

²³ Ma e a tabe n roko te aoa, ao ngaia e a kaman roko, are a na angan te Tama taan taromauri ni koaua taromauriana ni m'akan te Tamnei are Tabu, ao taromauriana n aron are E tangiria: b'a aikai aekan aomata aika E tangiriia te Tama.

²⁴ Te Atua bon te Tamnei: ao akana taromauria e riai b'a a na taromauria ni m'aakan te Tamnei are Tabu, ao n aron are E tangiria.”

²⁵ E taku te aine nakoina, “I ata ae E nangi roko te Mesia (are te Kristo); ao ngkana E roko, ao ane na tuangiira b'aai ni kabane.”

²⁶ E taku Iesu nakoina, “Boni Ngaia Ngai, ae I taetae nako im.”

²⁷ A roko naba ngkanne ana reirei, ao a mimi ngke E taetae ma te aine, ma akea irouia ae kaangai, “Tera ae Ko tangiria?” ke, “E aera ngkai Ko taetae ma ngaia?”

²⁸ E katuka ngkanne nen ana ran te aine arei, ao e nako n te kaawa, ao e taku nakoia aomata ikekei,

²⁹ “Nako mai nora te aomata are tuangai b'aai ni kabane ake I a tia ni karaoi. Tao ngaia te Kristo?”

³⁰ A oti nako aomata man te kaawa, ao a nako n Iesu.

³¹ A butia ngkanne Iesu ana reirei ni kaangai, “Te Tia Reirei, Ko na am'arake.”

³² Ma E taku nakoia, “Bon iai te am'arake irou ae N na kanna ae kam aki ataia.”

³³ Ma ngaia are, a i titiraki i rouia ana reirei ni kaangai, “Iai ae a tia n uota kanana nakoina?”

³⁴ E taku Iesu nakoia, “Kanau bon te ongeaba nakon nanon Teuare kanakomaiai, ao te katia ana m'akuri.

³⁵ Tiaki kam taku, ‘Aua riki te nam'akaina, ao a roko tain uaa n tai ao ni bobotaki.’ Noria, I tuangngkami, Tabeki matami, ao tarai taabo aika unikaki, b'a a tai uaa ao a tau nakon te bobotaki!

³⁶ Ane bobooti uaa nakoni neia ngkana a tai ao e kaboaki, ao e boti uaa i bukin te maiu are aki toki; b'a a aonga n uaia ni kim'areirei te tia ununiki ma te tia bobooti uaa.

³⁷ B'a e koaua n aei te taeka are kaangai, ‘E ununiki temanna, ao temanna e bobooti uaa nakoni neia ngkana a tai.’

³⁸ I kanakoingkami b'a kam na bobooti uaa akana tai nakoni neia man taabo n ununiki ake kam aki m'akurii; a m'akuri tabem'aang, ao ngkami kam kareke kab'aiami man uaani mwin aia m'akuri.”

³⁹ A bati I-Tamaria n te kaawa arei ake a onimakina Iesu i bukin ana taeka te aine ake a kaangai, “E tuangai b'aai ni kabane ake I a tia ni karaoi.”

⁴⁰ Ma ngaia are, ngke a roko i rouna I-Tamaria, ao a butiia b'a E na tiku i rouia, ao Ngaia E tiku ikekei uabong.

⁴¹ A bati riki ake a onimaki n ana taeka,

⁴² ao a taku nakon te aine arei, “Ai tiaki i bukin am taeka ae ti onimaki iai, b'a ae ti a bon ongo mai Rouna, ao ti a ataia b'a ngaia bon aei te Tia Kamaiua te aba.”

E Kamaiuaki natin te Mataniwi ae te mm'aane iroun Iesu

⁴³ I mwin uabong ao E kitana ikekei Iesu nako Kariraia.

⁴⁴ B'a E a bon tia Ngaia n taekinna b'a akea karinean te burabeti irouia kaain abana.

⁴⁵ Ma ngaia are, ngke E roko i Kariraia, ao a m'aneia n akoia I-Kariraia, b'a a tia n noori ana m'akuri ake E karaoi i Ierutarem n tain te Toa are te Riao, are a roko naba iai.

⁴⁶ E a manga oki Iesu nako Kana i Kariraia ike E onika ngkoa iai te ran nakon te wain. E mena ikekei te aomata temanna ae m'akuri n te tautaeka ae e aoraki natina te mm'aane i Kaberenaum.

⁴⁷ Ngke e ongo b'a E nako mai Iutaia Iesu nako Kariraia, ao e nakoina ni butiia b'a E na nako Kaberenaum ni kamaiua natina, b'a e a kani mate.

⁴⁸ E taku Iesu nakoina, “Ngkana kam aki noori kanikina ma m'akuri aika kamimii, ao kam rawa n onimaki.”

⁴⁹ E taku te tia m'akuri n te tautaeka nakoina, “Te Uea, Ko na nako mai ngkai e tuai ni mate natiu.”

⁵⁰ E taku Iesu nakoina, “Ko na nako; e na maiu natim.” Ao teuarei e kakoauai ana taeka Iesu ao e nako.

⁵¹ I aoni kawaina n nako, ao a bo ma ngaia ana toro; a tuangnga, “E a marurung natim.”

⁵² E titirakiniia ngkanne b'a te aoa iraua are e moanna iai ni marurung. A taku nakoina, “E toki kabuebuena ngkoananoa, n te aoa teuana n te tanimaeaontaai.”

⁵³ E ataia iai te tama b'a bon te aoa naba are E kaangai iai Iesu, “E na maiu natim.” Ma ngaia are, e onimaki, ao a onimaki naba kaain ana auti ni kabaneia.

⁵⁴ Aei te kauoua ni m'akuri ae kamimii are E karaoia Iesu ngke E roko i Kariraia n ana kauoua n tai ni m'anangana mai Iutaia.