Ioane 10 - Te B'aib'ara

Te Rongorongo ni Kabotau ae Taekan te tia Kawakin-tiibu

¹ E taku Iesu: “Bon te koaua ni koaua ae I a tuangngkami: b'a ane aki rin ni nen te tiibu man te mataroa, ma e tam'arake man te tabo teuana, ao bon te tia iraa ao te tia kam'arua.

² Ma ane rin man te mataroa ao bon te tia kawakin tiibu.

³ E kaukaki te mataroa nakoina iroun te tia tantani n te mataroa; a ongo b'anaana tiibu, ao e weteia ana tiibu n araia nako, ao e kairiia ni kaotinakoia.

⁴ Ngke a bane n oti nako ana tiibu, ao e ri moaia, ao tiibu a iria, b'a a kinaa b'anaana.

⁵ A aki kona n ira te ianena, ma a na biri nako mai rouna, b'a a aki kinai b'anaaia ianena.

⁶ E taekina te rongorongo ni kabotau aei Iesu nakoia, ma a aki oota iai b'a tera ae E nanonna.

Iesu te tia Kawakin-tiibu ae Raoiroi

⁷ Ma ngaia are, E a manga taku Iesu nakoia, “Bon te koaua ae I a tuangngkami b'a Ngai aia mataroa ni koaua tiibu.

⁸ Taan iraa ao taani kam'arua te koraki ni kabaneia ake a roko i m'aiu; ma a aki ongo tiibu i rouia.

⁹ Boni Ngai te mataroa; ngkana e rin te aomata irou, ao e na kamaiuaki: e na rin ao e na oti nako, ao e na karekea kanana.

¹⁰ Bukin rokon te tia iraa bon ti te iraa, te kamaamate ao te urub'ai; ma I roko b'a e aonga n reke i rouia te maiu ae koro raoi arona.

¹¹ Ngai te tia kawakin tiibu ae e raoiroi. E anga maiuna te tia kawakin tiibu ae e raoiroi i bukiia tiibu.

¹² Te aomata ane kaboaki ana m'akuri, ane tiaki te tia kawakin tiibu ao tiaki ana man tiibu, ngkana e nora te man ae tiritiri b'a e roko, ao e biri nako ni kitaniia tiibu; e rawea temanna te tiibu te man are tiritiri n tenaia, ao e kauamaaei ake nikiraia.

¹³ E biri nako i bukina ngke te aomata ngaia ae kaboaki ana m'akuri, ao akea nanona irouia tiibu.

¹⁴ Ngai te tia kawakin tiibu ae e raoiroi; ao I ataiia au tiibu, ao a atai au tiibu,

¹⁵ n ai aron te Tama ngkae E ataai, ao Ngai I ataa te Tama; ao I anga nanou b'a N na mate i bukiia tiibu.

¹⁶ Iai au tiibu tabeman aika aki mena i buakoia tiibu aikai; e riai b'a N na kairiia naba, ao a na ongo b'anaau. N te aro aei, ao a na riki b'a te nanai ae ti teuana, ao ti temanna te tia kawakinia.

¹⁷ Ma ngaia ae E tangirai te Tama i bukina ngkai I anga nanou b'a N na mate, b'a I aonga ni manga uti.

¹⁸ Akea ane anaa maiu mairou. I anga n oin nanou. E mena irou te kona n anga, ao te kona n anaia. I anganaki te mwioko aei iroun Tamau.

¹⁹ I bukin taeka aikai ao a manga aki boraoi naba I-Iutaia n aia iango i bukin Iesu.

²⁰ A m'aiti aomata i buakon te koraki arei ake a kaangai, “Iai i rouna te taimonio, ao e rangirang; kam aera ngkai kam ongora i rouna?”

²¹ A taku tabem'aang i buakon te koraki naba arei, “Taeka aikai bon tiaki ana taeka te aomata ae taniaki iroun te taimonio. E kona te kaure mataia matakii te taimonio?”

E Ribaki Iesu irouia I-Iutaia

²² E a bo tain te Toa are Katabuan te Tembora i Ierutarem; bon tain te kam'aitorotoro te tai arei.

²³ E nanakonako Iesu n te tabo ae aranaki b'a ana kaman Toromon n te Tembora.

²⁴ A otab'aninia Iesu I-Iutaia ao a titirakinna ni kaangai, “Maanra te tai ae Ko na katikuira iai n tataninga i m'ain ae Ko tuangiira te koaua? Tuangiira raoi te koaua: te Kristo Ngkoe?”

²⁵ E kaekaia Iesu ao E taku, “I a kaman tuangngkami, ma kam aki kakoauai. A riki b'a b'aai ni kakoaua i buku baika I karaoi ni m'akan Tamau;

²⁶ ma kam aki kakoauai, b'a tiaki kaain au nanai n tiibu ngkami.

²⁷ A ongo b'anaau au tiibu, ao I kinaia, ao a irirai.

²⁸ I angania te maiu are aki toki, ao a na bon aki mate; ao akea ae kona ni buribaiia mairou.

²⁹ Tamau, are anganai tiibu b'a au tiibu, E korakora riki nakoni b'aai ni kabane; ao akea ae kona n anaiia mairoun Tamau are kakawakiniia.

³⁰ Ti temanna Ngai ma te Tama.”

³¹ A manga anai atibu I-Iutaia b'a a na karebanaia.

³² E taku Iesu nakoia, “I a tia ni kaoti nakoimi m'akuri aika bati aika raraoi mairoun te Tama; e nga i buakoia ae kam na karebanai iai i bukina?”

³³ A kaeka ao a kaangai, “Tiaki i bukin te m'akuri ae e raoiroi ae ti na karebanaiko iai, ma i bukin am taetae ni bakanatua; ao i bukina naba b'a bon te aomata Ngkoe, ao Ko kan riki n Atua.”

³⁴ E kaekaia Iesu ao E taku, “Tiaki e koreaki n ami Tua ae kaangai, I taku, ‘atua ngkami’?

³⁵ Ngkana E atongiia te Atua te koraki ake E anganiia ana taeka b'a atua (ao e aki kona ni katinanikuaki taekan te B'aib'ara),

³⁶ ao e aera ngkanne b'a kam na kaangai, Ko bakanatua, i bukina ngke I kaangai, Natin te Atua Ngai? Ao bon te Tama ae rineai ao E kanakoai nako aonnaba.

³⁷ Ngkana I aki karaoi ana m'akuri Tamau, ao tai kakoauaai;

³⁸ ma ngkana I karaoi, e aoria ngkana kam aki kakoauaai, ma kam na kakoauai au m'akuri, b'a kam aonga n ataia ma ni kakoaua b'a iai te Tama i nanou, ao Ngai i nanon te Tama.”

³⁹ A manga kataia riki b'a a na taua Iesu ni kaburea, ma E aki reke i rouia.

⁴⁰ E kitana ikekei Iesu ao E ri nukan te karaanga are te Ioretan nako tanimainikuna nakon te tabo are e b'ab'abetito ngkoa iai Ioane; ao E tiku ikekei.

⁴¹ A m'aiti aomata ake a roko i rouna; ao a kaangai, “Akea te m'akuri ae kamimii ae karaoia Ioane, ma ana taeka ni kabane ake e atong i bukin Teuaei a bane ni koaua.”

⁴² Ao a m'aiti aomata n te tabo arei ake a onimakina Iesu.