Ieremia 6 - Te B'aib'ara

Te Kauring I bukiia Kaain Ierutarem E taku te UEA:

¹ Biri n rawei maiumi, aomatan Beniamin. Oti nako mai nanon Ierutarem. katanga te bu i Tekoa ao kaura te ai are te kanikina i Beta-Akirem. Ko na oreaki n te tai ae e aki maan n te kabuanib'ai mai meang.

² Bon au tabo n uteute ae e taatangiraki Ierutarem, ma ane a na katobibiko taani kaawakintiibu ma n tib'atib'aiko,

³ ao i mwiina, kam na kang taian uteute ni kabane.

⁴ A na tuangiia aia taanga ni buaka taiani uea ni kaangai, “Ngkana ti roko i Ierutarem n te moaningabong, ao ti na buaka n te tawanou. Ma ngkana ti iremwe n roko,

⁵ ao ti na buaka n te roo ma n uruakii nonona.”

⁶ Bon te UEA Ngai ae Moan te M'aaka, ao I tua b'a a na bane taian taanga ni buaka aikai ni koroi aroka ni kabane ma ni katei b'ain ninian nonon Ierutarem. Kaain Ierutarem, N na katuuaingkami i bukin ami motibuaka.

⁷ E raanganako te buakaka man ami kaawa kaanga te ran man te koburake n ran. E na ongo te aba karongoaan taian tiritiri mai nanon oon ami kaawa; A na raea konan te buaka n taabo nako, a ikoaki ao a mate.

⁸ Ongora i Rou, ngkami aika kaain Ierutarem ao kaain Iuta. N na kiitaningkami, ao e na riki abami b'a te rereua ae akea kanoana.

⁹ N na tuangiia ami kairiribai b'a a na katuka ami botannaomata n akea b'ain aona kaanga te kureebe ae e kamraraaki uaana. Bon aei au taeka Ngai ae te UEA ae Moan te M'aaka.

Unin Ieremia

¹⁰ I a tia n tuangiia aomata ae Ko na katuaaia ngkoe ae te UEA, ma a ti ngare ao a rawa n ongo.

¹¹ E ura unim n ekaanako Iuta i nanou ao I aki konaa n taotaonna. Ko na aki tautauai! Ti nang kamaunaia aomata ni kabane— ataei akana a tabe n takaakaro ao ikawai ni kabane, ti te bo ataei ma ikawai.

E Na Kamaunaia Aomata Nako Unin Te UEA E taku te UEA:

¹² N na katuaaia kaain Iuta ma n anga aia auti ma aia tawaana nako ia tabem'aang, ao ai uana naba ma buuia. Bon aei au taeka Ngai ae te UEA.

¹³ A bane aomata n nanonrang ma ni buakaka, te kaub'ai ma te kainano. Ni karokoa naba taian burabeti ao ibonga bon akea naba onimakinaia.

¹⁴ Ti te b'ai ae a konaa n anga nako ia au aomata aika a rangi n ikoaki kantaningaan te rau ae akea nanona.

¹⁵ A riai ni mamaa n aia bure ae moan te ribaaki, ao a aki roko naba n te mainarake moaia. Ai ngaia are ngkana I katuaaea Iuta, ao a na bane n toki i aon aontano, ni mate kaanga aekaia aomata nako. Bon aei au taeka Ngai ae te UEA.

A Katinanikua Maiun te Atua Kaain Iuta

¹⁶ E taku te UEA: Au aomata, ngkana kam tei n taian tutani kawai, I tuangkami ni kaangai, “Ira te kawai are a m'ananga naba iai ami bakatibu, ao e na reke iroumi te rau.” Ma kam rawa.

¹⁷ I bon kanako ia naba taiani burabeti b'a a na kauringngkami i bukin te kabuanib'ai, ma ngke a katang te b'ai ni kauring, ao kam bon aki kan tabe iai.

¹⁸ Ai ngaia are I tuangiia botannaomata nako n te aonnaba ni kaangai, “Mataku n te b'ai ae N nang karaoia!

¹⁹ A kakeaa bonganau Au aomata ao a katinanikui au tua nako. A baaireia b'a a na karaoi m'akuri aika a buakaka, ao ngkai, te buakaka are a baaireia e na manga bon riki nako ia.”

²⁰ Kaain Iuta, kam uoti nako iu taiani b'ai ni kaboiarara mai Tieb'a ao b'ai ni kangkangian te am'arake man aaba aika a raroa. Kam karean aekaki ni man ni kabane. Ma e aera ngkai kam tabeaianga? I ribaai ami b'aintangira aikai ni kabane!

²¹ Ma ngaia are, N na kaaki te b'ai ni katoki wae i m'aain kawaimi, ao a na bane ni mate, ni karokoa naba tamami ma natimi, kaain rarikimi ao raoraomi nako.

Te Taanga Ni Buaka Mai Meang

²² E taku te UEA, “Taratara nako nako iang, nakon te tabo are e mena iai te botannaomata ae e korakora are e katauraoi nakon te buaka.

²³ A iowawa ana taanga ni buaka aika a toamau ni b'aai ni buaka ao bon akea aia nanoanga. Ti te bo tangitangin aia aoti ma rurungaan naon marawa ngkana a rebwe i aon te bike. A na buakaningkami te taanga ni buaka aei, ngkoe ae Ierutarem ae ko tangiraki.”

²⁴ Ao a taku aomata, “Ngkana ti ongo taekaia ao ti a ruru naba ni maaku, ao ti minomino ni maraki kaanga te aine ae e bungiia natina.”

²⁵ E taku te UEA, “Kam na aki m'akuri i nanon ami tawaana nako ke n nakonako i nanon te kawai. E rangi ni kamaamate. A rangi toamau kairiribai ni b'aai ni buaka

²⁶ ao a buaka n aki anga te katauraoi. Ma ngaia are, kam na tang ngkami aika au aomata, n ai aron ae e a tia ni mate natimi. Karin kunnikai aika a karaoaki n taian kunnikai aika a mangaingai ao kam na rabinobino nako nanon te b'ariko ni mannang.”

A Na Riai Ni Kataaki Ana Aomata Te UEA E taku te UEA:

²⁷ Ieremia, kataia au aomata kaanga aongkoa te biti ngaiia.

²⁸ Ao ane ko na kuneia b'a ti te bo matoaia ma kaanga te buraonti ao te biti. Bon taani kakaitaraai aika a taningamatoa ngaiia, ao a aki toki n tataekin taiani kewe.

²⁹ E konaa ni manga kaitiakaki te tirewa n te ai ae e uram'aaka,

³⁰ ma a bon rangi ni buakaka au aomata n te aro are a aki konaa ni manga kabouaki, ao I a tia ni katinanikuia.