Ieremia 52 - Te B'aib'ara

Rongorongon Riki B'akan Ierutarem Teuana Reken Ierutarem

¹ Ai tib'a uabwi ma teuana ana ririki ni maiu Tetekia ngke e rineaki b'a te uea i aon Iuta, ao e tautaeka mai Ierutarem i nanon tebwi ma teuana te ririki. Tinana are Nei Amutara bon natin Ieremia te aine, Ieremia are man te kaawa are Ribena.

² E aki ongotaeka Tetekia i roun te UEA, n aron naba are e karaoia Ieoiakim,

³ ao bon Tetekia are e a manga kakaitaraa Nebukaneta n te kabanea n tai. A a tia kaain Iuta ao Ierutarem n rangi ni kauna te UEA n te aro are n tokina e a tannako mairouia. Ao bon anne bukina are e riki iai b'aai aika a rangi ni kakamaaku.

⁴ N ana karuaiwa n ririki ni uea Tetekia, n te katebwina n nam'akaina, e a kairiia ana taanga ni buaka ae e b'anin Nebukaneta mai B'aburon ni buakana Ierutarem. A katea aia kaemb'a te taanga ni buaka arei i tinanikun te kaawa ao a katei b'ain tam'arakean oon nako te kaawa.

⁵ Ao a katobibia ni karokoa ana katebwi ma teuana n ririki Tetekia ni uea.

⁶ N te karuaiwa ni bongin te kaaua n nam'akaina n te ririki naba anne, ngke e a roko ni korakorana te rongo ao akea kanaia aomata,

⁷ ao e a uruaki oon te kaawa. Ni bon te tairiki naba anne, a kataia Etekia ni biri nako man mataroan te kaawa are i rarikin ana nne n aroka te uea, e ngae ngke a bon ataia b'a e katobibiaki te kaawa irouia aia kairiribai. E biri nako ni kaineta te M'arua are Ioretan,

⁸ Ma a kakioa te uea are Tetekia ana taanga ni buaka B'aburon, ao a reke i rarikin Ieriko, ma a bane ni birinako ana tautia ni uamaae nako nakon taabo aika a kakaokoro.

⁹ E uotaki Tetekia nako Ribena n te aba are Amata, ike e a baairea iai taekana Nebukaneta ao e reke n te bure.

¹⁰ A tiringaki natin Tetekia mm'aane ao taian mataniwi bon i matana,

¹¹ ao i mwiina, a autii kanoan matana ni kanakoi. E kabaeaki n taian tiein, ao i mwiina, a uaakinna nako B'aburon ao a kaawakinna n te karabuuti ni karokoa matena.

¹² E reke Ierutarem i nanon ana katebwi ma ruaiwa n ririki Nebukaneta ni uea i aon B'aburon. E kaaniia te nam'akaina i mwiina, e roko i Ierutarem ana mataniwi Nebukaneta are e tararuaia taan tei. Arana bon Nebutaratan.

¹³ E kabuoka Ana Tembora te UEA, ao ana bareti te uea, ao auti ni kabane aika a kakannato i nanon te kaawa.

¹⁴ Ao i mwiina, e tuangiia tautian B'aburon b'a a na urui oon nako Ierutarem.

¹⁵ E kairiia nako aomata ake taiani nikira n te kaawa, n reitaki ma aomata ni kabane ake a kakaonimaki ngkoa nakon Nebukaneta, ao ai nikiraia taani m'akuri aika a m'aatai, ao bon tabeman naba kaain Iuta aika a kainano.

¹⁶ Bon ti aomata aika a rangi ni kainano aika a tiku b'a a na m'akuri n te nnenikureebe ao taian tawaana.

¹⁷ A urui taian boua ake taian buraati kaain B'aburon ao taiani kaintei ake a buubuti ake a mena n te Tembora, n reitaki naba ma te boora are e buubura are e aranaki b'a Taari, ao a uoti taiani buraonti ni kabane nako B'aburon.

¹⁸ A bon uoti nako naba taian tiabora ao baanin te ai, b'aintiringan te taura, taiani boora ni katimtim, rauraun te b'ai ni kaboiarara, ao b'aai ni kabane ake tabeua ake a kamanenaaki n te Tembora.

¹⁹ A anai b'aai ni kabane ake a karaoaki man te koora ma te tirewa: taiani boora, baanin te ai, taiani boora ni katimtim, taiani baan, kaintei ake a buubuti, taian raurau i bukin te b'ai ni kaboiarara, ao m'angkon te wain.

²⁰ A a aki konaa ni katineaki b'aai ake a karaoaki n te buraonti ake e a tia ni karaoi te Uea are Toromon i bukin te Tembora, boua ake uaai, kaintei ake a buubuti, te boora are e buubura are e aranaki b'a Taari, ao taiani kaomm'aane ake tengaun ma uoman ake a riki b'a kainteina.

²¹ A rangi n ab'ab'aki boua akekei b'a e nakon wanua te miita ab'akiia ao nimaua te miita mronroniia n teaina. A b'angab'anga nanoia, ma e nakon itibwi ma nimaua te mirimiita matenin te buraati.

²² Bon iai b'araia ni kauaai ae uoua te miita rietaia ae e katamaroaaki n te banna aika taian buraonti. Tabeua taian banna aikai ti te bo ma taian tiein ao tabeua kaanga taian bamkuranete.

²³ Bootan m'aitin taiani bamkuranete aika a karauaki raoi ni baaireaki marangaia bon ruabwi ma onoua, ni katobibia taian boua ake uaai, ao tebubua bootan m'aitin taiani bamkuranete i aon taian tiein.

Uotakinako ia Kaain Iuta Nako B'aburon

²⁴ I mwiina, a katiki Teraia are te mataniwi ni ibonga ma te tia buokia are Teb'ania, ao mataniwiin te Tembora aika teniman i roun Nebutaratan

²⁵ Ao i mwiina, e katika temanna mai buakoia mataniwiin te taanga ni buaka, itiman mai buakoia ana taan iango te Uea are Tetekia, ao te aobitia are e tararua aron ikotakiia te taanga ni buaka i bukin te buaka. E kuneia naba onongaun riki tautia aika a mena naba i Ierutarem.

²⁶ Ao e anaia Nebutaratan nakon te uea i B'aburon, are e mena n te kaawa are Ribera

²⁷ n te aba are Amata. Ao e a anaaki i roun te uea ikekei ma n oreaki ni karokoa matena. A uotaki nako kaain Iuta mai abaia nakon te kataenikaiaki.

Uotakinako ia Kaain Iuta b'a taenikai

²⁸ Aikai m'aitiia ma araia koraki ake a uotaki nako i roun Nebukaneta b'a taenikai: n ana kaitiua n ririki ni uea e uotia nako 3,023;

²⁹ ao n ana katebwi ma wanua n ririki, mai Ierutarem;

³⁰ ao n ana kauabwi ma tenua n ririki, 745, a uotaki nako i roun Nebutaratan. Bootaia bon 4,600 m'aitiia aomata aika a uotaki nako.

³¹ Bon te taenikai Ieoiakin i B'aburon i nanon tenibwi ma itiua te ririki. Ao i mwiina, e a uea te Merotaka te Buakaka i aon B'aburon, ao n ana moan ririki n tautaeka, n te kauabwi ma nimaua ni bongin te kauabwi n nam'akaina, e a kaotinakoa Ieoiakin man te karabuuti.

³² Merotaka te Buakaka e nang akoi nakon Ieoiakin ao e karinea riki nako ia aia uea ake tabeman ake a karabuutinaki ikekei.

³³ E kariaiakaki Ieoiakin ni kunnikainna n aron kunnikaia aomata ao ai tiaaki te kaboraoi ni bure, ao e bon am'arake naba n ana taibora te uea ni katoa bong.

³⁴ E bon kabooaki Ieoiakin ni katoa bong, e anganaki ana m'ane b'a e na karekei baike e bon kainanoi.