Ieremia 51 - Te B'aib'ara

Uruakakin B'aburon

¹ Boni Ngai ae te UEA, ae I kanakoa te ang b'a e na uruaniia kaain B'aburon ma B'aburon, are atuun kaawan te tautaeka.

² Ane a na roko aia tautia ianena man taabo nako, ao e na akea kaain B'aburon, ao e na akea manenana ngkana e a toki te kabuanib'ai.

³ N na taetae ni kaangai nako ia tautia aikai, “Buaka ni kawaekoa, i m'aain ae a kanakoi kanoan aia bana ke a karin aia b'ai ni buaka kaain B'aburon. Tiringiia aia tautia ake a bane aroia ao kamaunaa aia taanga ni buaka!”

⁴ Ane a na b'aka ni ikoaki aia taanga ni buaka i nanoni kawain nako nuukan B'aburon.

⁵ A bane ni bure aomata ni kabane i Iteraera ma Iuta. Ma I bon tuai ni kiitaniia Ngai ae te UEA ae Moan te m'aaka, te Atua ae e mimitong.

⁶ Otinako mai B'aburon! Biri n rawei maiumi! Kam na mate, ngkana kam tiku ngkana I kaoka te kai nakon te kaawa aei ma ni katuaaea i bukin ana bure nako.

⁷ B'aburon bon Au m'angko te koora ae e kanoaaki ni wainin uniu. A na manging n te wain aei botannaomatan nako te aonnaba ao a na rangirang.

⁸ Ma e na rina ni b'aka B'aburon ao e na uruaki. Boni Ngai ae te UEA ae I tuangiia ianena ake a maeka ikekei ni kaangai, “Taang i bukin te kaawa! karekea te b'ainaoraki i bukin ikoakina; tao a na bae n raoiroi.”

⁹ Ao a kaeka ianena ni kaangai, “Ti a tia ni kataia ni b'ainaorakiia ikoakin nako B'aburon, ma a bon aki buokaki. Nako mai, ti a okiri mwengara n oin abara nako. Bon akea te b'ai ae e tiku i B'aburon; a bane n uruaki b'aai nako.”

¹⁰ A taku Iteraera, Tuangiia kaain Tion ni kabane! E a tia te UEA n irantaanga i bukin te b'ai are e karaoia B'aburon nakoira.”

E Tangiria Ni Kamaunaa B'aburon Te UEA

¹¹ Boni Ngai ae te UEA, ae I tangira B'aburon b'a e na kamaunaaki, i bukina ngke a urua au Tembora ana taanga ni buaka. Ma ngaia are, kam na kakangii ami kanoanikatebe ngkami aika uean Miria, ao anai ami otanga.

¹² Irakea te buraeki are te kanikina ao buakana oon nako te kaawa. Kateirakeia riki taan tei aika a bati. Tuangiia tautia b'a a na tararuaa te kaawa ma ni katea te taanga ni buaka ni bakairaa. I a tia ni karaoa te kawai i bukin uruakakin B'aburon, ao akea te b'ai teuana ae e na konaa ni katokai.

¹³ Kaain B'aburon, kam maeka i mataniwiin te Karaanga are Iuberetiti ao kam katobibiaki n taiani kanare. Kam kaub'ai, ma e a roko te tai are kam na mate iai.

¹⁴ Boni Ngai ae te UEA ae Moan te M'aaka, ae I tuea ni bon oini maiu b'a a na kaona kawain nuukan ami kaawa aia tautia kairiribai kaanga te taanga n rokati. Ane a na takaarua ao a na rungaa aia tokanikai.

Te Anene N Nebonebo

¹⁵ E kamanenaa wanawanana te Atua ao m'aakana ni karika te aonnaba ao n taakin taiani karawa.

¹⁶ A rurunga ranin taiani karawa n Ana taeka. E kariki taian nang b'a a na kaoti; ao E kanakoi taian ang man ana autinib'ai ao E karaoi taian iti i nanon te karau.

¹⁷ A nanobaba aomata aika a karaoi taiani bouannanti! Ane a na b'ara nanoia, i bukina b'a a aki konaa n ikeike antiia.

¹⁸ Bon ti taiani b'ai ni manikangare taiani bouannanti, ma ane a na uruaki, ngkana e roko raoi te tai.

¹⁹ Bon te UEA ae Atuaia Iteraera, ae Moan te M'aaka. E karaoi b'aai ni kabane, ao E rinea Iteraera b'a oin ana b'ai.

E taku te UEA:

²⁰ Kaain B'aburon, bon Au aama ngkami; I kamanenaingkami n oroia botannaomata nako ma n urui taian abanuea,

²¹ ao ni kamaenako ia taan toka i aon taian aoti ao taiani kaanibuaka,

²² ao ai uana naba ma mm'aane ao aine, ataei ao kaara,

²³ taani kaawakin tiibu ma aia nanai, taan ununiki ma aia kaomm'aane, ma koowana ao taan kairiiri.

²⁴ Ma ngkai, a na mataku Au aomata ngkana I anganiko boom i bukin te b'ai are ko karaoia nakon Tion.

²⁵ Kam uruaniia botannaomata ao ko taraa ni marurung kaanga te maunga, ma bon am kairiribai Ngai. N na bon raweiko ao N na karabinoko nako nakon te tabo ae e katati. Ao ngkana e bane karaoan anne irou, ko na riki b'a kaanga te b'ariko ni buriki aika a mannang.

²⁶ E na aki kamanenaaki am buriki atiibu i bukin atiibun taiani koona ke taian aana, ao I berita b'a kam na riki b'a te rereua n aki toki. Bon aei Au taeka Ngai ae te UEA.

E taku te UEA:

²⁷ Aanga te kanikina nako ia botannaomata nako b'a a na tauraoi nakon te buaka. Irakea te buraeki ao katanga te buu. Kanakoa weteaia aia taanga ni buaka kaain Ararata, Minni, ao Atikenati. Rinea te mataniwi; ao kanako ia taani buaka i aoia aoti b'a a na buaka kaanga taanga n rokati.

²⁸ Tuangiia uea ma koowana, taan kairiri ao kaain te abanuea are Miria b'a a na katauraoi nakon te buaka!

²⁹ E unoraki ao e rairaki te aonnaba nakon te kamarakaki ae e korakora, i bukina ngke I iangoia b'a N na karika B'aburon b'a e na rereua ae akea ae e na konaa ni maiu iai, ao I aki konaa ni bita nanou.

³⁰ E a tia ni mauna korakoraia ao ninikoriaia tautian B'aburon. A tiku n aia nono, n aki konaa ni buaka, ngke a roko kairiribai n ninia mataroan nako te kaawa, ma ni kabuoki taiani mwenga ni kabane n te ai.

³¹ A roko taan uarongorongo temanna i mwiin temanna ni katanoataa nakon te uea ae e kaangai, “E a tia n tauaki B'aburon!

³² A teiakina ngkai te ri aon te karaanga kairiribai! A a urarake taabo ake a aom'aim'ai! A a tia ni buannano te taanga ni buaka!”

³³ Boni Ngai ae te UEA ae Moan te M'aaka ae Atuaia Iteraera, ao I karaoa te boraraoi aei “E na kaboraoaki B'aburon ma ni kamanatuaaki kaanga te tabo ni kaaki kun ni uita n tain te tai.”

Ane E Na Kabooa Mwiina B'aburon!

³⁴ Ane a na kaangai kaain Ierutarem, “E kabuai nanora te Uea ae Nebukaneta E kaonna te manikaakang are iroura ma kaub'aira, ao e katikuira n akea ara b'ai e kab'auta te b'ai are e tangiria ao e baawarea nako nikirana.

³⁵ A kaikoakia tabeman maibuakora kaaini B'aburon ao a tiringiia tabem'aang. Ngkai, te UEA, karaoia b'a a na kabooa mwiina!”

E Na Kaoka Nakon B'aburon te UEA

³⁶ Au aomata, I mena n ami itera, N na kaoka te kai nakon B'aburon. N na korouaa ana ran ao e na m'autakataka ana karaanga n ran.

³⁷ E na riki B'aburon b'a te b'ariko n atiibu aika a maaerikiriki ike ti taian tiakaore aika a maeka iai. Ane a na ngare aomata, ma a na aki maaku n nakonako i buakon b'aina aika a uruaki.

³⁸ A bekorara kaain B'aburon ao a kakarongoa kaanga raian ataei.

³⁹ Ao ngkai a kaman baki N na anganiia te baka n am'arake. A na bootaki ni kukurei, a na koro ni manging, ao i mwiina, a na b'aka ni matu, ao a na aki manga uti!

⁴⁰ N na kairiia nakon te mate, kaanga te tiibu, tiibu ataei, ao taiani kooti aika a kairaki nakon te tia tiringiia maan.

⁴¹ A bane n neboa B'aburon botannaomata nako, ma ngkana e tauaki, a na maaku naba botannaomata ake a neboia akekei.

⁴² Ane a na teirake ana kairiribai B'aburon kaanga naon te marawa ao e na kaiekaa te kaawa.

⁴³ E na oroi kaawa akana a uakaan te urub'ai ae e kakamaaku. E na riki te aba b'a te rereua ae akea kain aona, ike akea ae e konaa ni maiu iai ke ni m'ananga iai.

⁴⁴ N na katuaaea Maretuka, are antin B'aburon, ma ni karaoia b'a e na mumutai b'aai nako ake e kab'auti. Ao i mwiin anne, a na aki manga uoti aia b'aintangira botannaomata nakoina, ao a na maerikiriki oon nako B'aburon.

E Anga Te Kaantaninga Te UEA Nakoia Ana Aomata

⁴⁵ Otinako mai B'aburon, Au aomata, ao biiri n rawei maiumi, i m'aain ae I orea te kaawa n uniu!

⁴⁶ Kam na aki maaku ke ni kabuai ami kaantaninga, e ngae ngke iai taian maningongoo ae taekaia taani kairiiri i bukin kairan te waaki i nanon te kaawa ae e buubura ae B'aburon i nanon ririki ma ririki.

⁴⁷ E a roko te tai are N na katauaea iai antin nako B'aburon ni kewe. A na bane ni mate aomata, ao e na b'ainrang te botannaomata ae e b'anin,

⁴⁸ ngkana e a buaka te taanga ni buaka mai meaang ma ni karokoa te urub'ai. Ao i mwiina, a na kukurei aonnaba ma taiani karawa ma b'aai ni kabane ake iai.

⁴⁹ E na karenakoaki, i bukina ngke e tiringiia Au aomata aika Iteraera aika a m'aiti ao a m'aiti naba man botannaomata ake tabeua.

⁵⁰ Au aomata, kam biri nako man te mate ngke e b'aka Ierutarem. Ngkai kam a maeka n raroa ma mwengami, ma kam na riai ni kakoauaai ao kam na iangoa Ierutarem. Kiitana B'aburon! Kam na aki tiku!

⁵¹ Kam na bon mamaa ao kam na b'ainrang, i bukina b'a a tia n rin ianena n au Tembora are e tabu.

⁵² N te tai ae e aki maan N na karokoa te buaka b'a e na katuaai ana bouananti nako B'aburon ma ni katikuia kaaina aika a ikoaki n tang man taabo nako.

⁵³ E ngae ngke a roota karawa oon nako B'aburon, ma e na urua te kaawa ae e buubura aei te taanga ni buaka ae N na karokoa. Bon aei Au taeka Ngai ae te UEA.

E Na Uruaki B'aburon E taku te UEA:

⁵⁴ Ongora nakon te tang ni kani buokaki ae e nako mai B'aburon. E ongo te aba tangin te urub'ai man taabo nako i aon te aba arei.

⁵⁵ Takaaruaia kairiribai, ae kaanga ai aron rebwen naoni marawa, e na kamaunaa tangiia kaain B'aburon ngkana I kabooraoa te kaawa.

⁵⁶ E na buakana B'aburon kairiribai ma n urua. A na tauaki tautiana ao a na uruaki aia b'ai ni buaka, i bukina ngke bon te Atua Ngai ae I kaakaboo kai nako ia botannaomata nako n te b'ai are a karaoia.

⁵⁷ Bon te UEA Ngai ae Moan te M'aaka, te Uea ni koaua, ae I berita b'a a na bane ni manging mataniwi ao taan iango, koowana ma taani kairiiri ao tautian B'aburon, ao a na koronimanging ao a na b'aka ni matu, ao a na aki manga uti.

⁵⁸ A na tabwenaua oon te kaawa ake a matenten, ao a na bane ni bue mataroana ake a totoakaei. A na aetorake b'a te bubu b'aai ni kabane ake a tia ni m'akuri korakora i bukin karekeaia.

Anganakin Teraia Te Niira ni boki Iroun Ieremia.

⁵⁹ E m'ananga nako B'aburon Tetekia n ana kaaua n ririki ni uea i aon Iuta. Ao e iri naba tarin B'aruka are Teraia b'a te aobitia ngaia are e tabe ma baairean taian tabo are a na tiku iai ni kangainaa.

⁶⁰ I m'aain nako ia, I koreia i aon te niira ni boki b'aai ni kabane aika a kakamaaku ake a na riki nakon B'aburon.

⁶¹ I anga nakon Teraia ao I kaangai: Ngkana kam roko i B'aburon, ko na wareka te niira ni boki aei ni kaoa b'anaam,

⁶² ao i mwiina, ko na tataro ni kaangai, “Ara UEA, Ko berita ngkoa b'a Ko na onika te tabo aei nakon te rereua ike akea aomata ke taiani man ae a na maiu iai.”

⁶³ Ngkana e bane am tataro, kabaea te niira ni boki ma te atiibu ao karenakoa nakon te Karaanga are Iuberetiti. Ao i mwiina, ko na kaangai,

⁶⁴ “Aio aron inakon B'aburon ngkana e uruakaki i roun te UEA. A na bane ni mate kaain te kaawa, ao e na aki manga reke korakorana n teirake.” E bane ikai ana koroboki Ieremia.