Ieremia 50 - Te B'aib'ara

E Na Kataenikaiaki B'aburon

¹ Aio te rongorongo ae e anganai te UEA i bukin te kaawa are B'aburon ma kaaina: Taekina te b'ai ae na riki ao tai katuka naba te rongorongo teuana ma iai.

² Anga te kanikina ao katanoataa taian rongorongo! Kam na aki karabaa! E a tia ni b'aka B'aburon! E a tia ni maerikiriki te anti are Merotaka! A kamaamaaeaki bouanantin B'aburon, ao a kamanatuaaki bannaia aika a rangi n ribaaki!

³ E na roko mai meaang buakanakiia kaain B'aburon; a na kaai ni biri nako ma aia man, ma ni katuka te aba ma akea kaaina.

A Na Riai N Okira Abaia Kaain Iteraera Ma Kaain Iuta

⁴ E taku te UEA: Kaain Iteraera ma Iuta, Ngkana a riki baikai ao kam na tang, ao kam na kaai n okira abami n taromauriai, Ngai ae te UEA ae Atuami.

⁵ Ane kam na titiraki i bukin te kawai nako Tion ao i mwiina kam na roko ao kam na raonai ni karaoa te boraraoi ae kam aki urua ke ni m'aninga.

⁶ Au aomata, bon atiibu ngkami aika kam m'arua nako aika a kiitanaki i roun aia tia kaawakintiibu. i aoni maunga. Kam bon aki ururinga naba ami tabo ni motirawa.

⁷ Boni Ngai ami tabo n uteute, te tabo teuana are e anga te kaantaninga nako ia ami bakatibu. Ma kam kiitanai, ma ngaia are, ngkana kam reke irouia ami kairiribai, ao bon akea aia bure iai ngkana a kab'autingkami.

⁸ Biri nako mai B'aburon Au aomata. Otinako man te aba anne! Kam na aki taningaa temanna.

⁹ Mai meaang, N na karokoia botannaomata aika a korakora n ti teuana. A na buakana B'aburon ao a na taua. Ti te bo kanoan aia katebe ma aia kanoa tautia aika a bane aroia ae a bon teeteke naba aia taakete.

¹⁰ E na kataenikaiaki B'aburon, ao ana kairiribai a na uoti nako b'aai ni kabane aika a tangiri.

B'akan B'aburon E taku te UEA nako iu:

¹¹ Kaain B'aburon, kam kukurei ngkoa ni kimoaia Au aomata. E rangi n reke ami tai ngkoa, ni karaoa te karongoaa ae e korakora riki nako ia aoti ma n eweewe rake n aki akaaka kaanga taian kao ataei aika a kanakoa kunin te uita.

¹² Ti te bo te kaawa ae B'aburon ma kaanga te tina nakoim. Ma e nang kab'ainrangaki ao e na riki n akea arona b'a ti te rereua ae akea kain aona.

¹³ E na urua B'aburon uniu, ao bon akea ae e konaa ni maiu ikekei. A na bane aika a rirarikim n tiaoki ngkana a noora te b'ai ae e a tia n riki.

¹⁴ E a tia B'aburon ni kakaitaraai. Taani katebe kakioi nnemi. Kanakoa ami kanoanikatebe nako B'aburon.

¹⁵ Buaka ni iterana ni kabane! Taan taenikai mai B'aburon! A urua oona ma tauana kairiribai ni kab'aka. N nang irantaanga ni karaoa naba nakon B'aburon te b'ai ngkoa are e karaoia nakon kaawa aika a buubura ake tabeua.

¹⁶ Bon akea riki temanna ae e tiku i B'aburon n ununiki ke taia uan taian tawaana. Taiani iruwa naba ake a maeka ngkoa ikekei a tia n okiri oin abaia nako, a maakuia aia taanga ni buaka kairiribai.

¹⁷ Iteraera bon te nanai n tiibu ae e maae nako irouia raian aika a bora ni baki. Uean Aturia boni ngaia te moan kab'autiia Iteraera. Ao i mwiina, Nebukaneta, uean B'aburon, are e kangkanta riin Iteraera.

¹⁸ Boni Ngai te UEA ae Moan te M'aaka, ae Atuaia Iteraera, ae I katuaaea uean Aturia, ao N na bon katuaaea naba uean B'aburon.

¹⁹ Ma N na uota Iteraera ni kaokia nakon oin abana. A na riki aomata b'a kaanga tiibu aika a am'arake ni kaon raoi birotoia i aon te Maunga are Karemera ao i B'atian, n aba are tabukibuki are i Eberaim ao i Kireata.

²⁰ N na kamaiuia ti tabeman mai Iteraera ao Iuta. N na kab'ara raoi aia bure n te aro ae a na bon mauna nako raoi aia bure ma aia kaairua, ao a na aki manga nooraki.

A Na Mwioko Te UEA Nakoia Ana Kairiribai B'aburon

²¹ E taku te UEA: I a tia n tuangiia ana kairiribai B'aburon ni kaangai, “Buakaniia kaain Merataim ao Bekota. Tiringiia ni kabane! Urui aia b'ai nako!”

²² E a konaa n ongo te aba tangin te buaka karongoaan te urub'ai.

²³ Bon te aama B'aburon are e oroi aaba nako, ma ngkai e a wene n uruaki. Ai bon te tiaoki tera nako ia bootanaomatan nako te aonnaba!

²⁴ E kakaewenakoai B'aburon, Ngai ae te UEA ae Moan te M'aaka, ma e aki ataia te botannaomata arei b'a e a reke n te b'ainikam'ane are I a tia ni katauraoia.

²⁵ I a tia ni kaotinakoi Au b'ai ni buaka, ao I kaairi ma te kamaraia i aon B'aburon.

²⁶ Kam roko mai keraroa, ngkami aika ana kairiribai B'aburon! Kab'arikoi taian uita man ana autinib'ai nako, ao kabuoki ni kabane, n reitaki ma b'aai ni kabane.

²⁷ Tiringiia tautian B'aburon, i bukina b'a e a roko te tai are a na katuaaeaki iai.

²⁸ A urua au Tembora ana taanga ni buaka B'aburon, ma N na irantaanga n te tai ae e aki maan. Ao i mwiina, a na taetaekinna i Tion taan rawei maiuia mai B'aburon.

²⁹ Buakana B'aburon, aia taani katebe kairiribai; katea ami autinrianna ni katobibia te kaawa are e buubura, ao tai kabiri nakoa temanna. A kakaotinakoai, Ngai ae te Atua ae e Tabu, ma ngaia are, karaoa nakoina te b'ai are e karaoia nako ia kaawa aika a buubura ake tabeua.

E Na B'aka B'aburon Are Te Kamoamoa

³⁰ Kaain B'aburon, I berita Ngai ae te UEA b'a a na bon wene ni mate naba i nanon kawain te kaawa am tautia aika a bane aroia.

³¹ B'aburon, ko riai n aranaki b'a, “Te aomata ae e kamoamoa.” Ma e a tia n roko te tai are N na katuaaeko iai Ngai ae te UEA ae Moan te M'aaka.

³² Ko kamoamoa, ma ane e na reke waem ao ko na b'aka, ao bon akea temanna ae e na konaa ni buokiko ni kateirakeko. N na kabuoki ami kaawa aika a uarereke n te ai, ao a na bane n urarake akana i rarikim n te ai.

³³ Kam iowawa ngkami aika kaain B'aburon nakon Iteraera ao Iuta. Kam anaia b'a ami bure, ao ngkai kam a manga rawa ni kanako ia.

³⁴ Ma bon Ngai ae te UEA ae Moan te M'aaka, ae N na kamaiuia ma ni kaawakiniia. N na kakoroa te rau i aon abaia ao N na karokoa te kangaanga i aon ami b'ai.

³⁵ I a tia ni katanoataa buakanakim, am mataniwi, ao am taani iango nako.

³⁶ E na kakoauaaki n te buaka aei b'a bon taani kewe ao taian nanobaba ami burabeti. Ao ane e na kakamaakuia ami taani buaka.

³⁷ Ao i mwiina, a na rawa n ira te buaka aotin ami kaanibuaka ma ianena akana i buakoia ami taanga ni buaka, ao a na uotaki nako ni kabane akana kam kaawakin b'a kaub'aimi irouia ami kairiribai.

³⁸ Ane a na mautakataka ami karaanga ma ami kanare nako. A na bane n riki baikai, i bukina b'a e onrake abami n taian bouananti, ao a tia ni kaburababaingkami.

³⁹ Bon akea riki te tai ae e na maiu iai kaain abami bon ti manin te rereua, tiakaore, ao mannikiba aika a baareka.

⁴⁰ I urua Totom ma Komora ao kaawa nako ake i rarikiia, ao N na bon urua naba B'aburon ni kabanea raoi n ai aron naba anne. Bon akea temanna ae e na maiu ikekei.

E A Ekakinako B'aburon E taku te UEA:

⁴¹ N te tabo ae e raroa i meaang, e a tia ni kautaki iai te botannaomata teuana ma botannaomata ake a raonna. A m'aaka ao a tauraoi nakon te buaka.

⁴² A mena i nanoni baiia taiani kainikatebe ao kanoanikatebe ao taiani kabaang. A iowawa tautia ao akea aia nanoanga. A eeko rebwerebwen waeia aia aoti kaanga naoni marawa aika a rebwe i mataniwiin te bike. A tei n te rain ana taanga ni buaka n tataninga te buaka ao a roko b'a a na buakaningkami, kaain B'aburon!

⁴³ E a kaman tia n ongo ami uea taekan te taanga ni buaka aei, e a tia ni mamaara n te maaku; e minominotaki ma n rairaki ma te maraki kaanga te aine ae e bungia natina.

⁴⁴ B'aburon, N na buakaniko kaanga te raian man te rereua, ae e un nako ia tiibu i nanon te tawaana are i mataniwiin Ioretan. A biri nako te nanai n tiibu n te tai naba arei, ao akea naba kaain te aba. Antai ae N na rineia b'a e na buakaningkami? N na karaoia n ti Ngai! Bon akea ae e konaa ni kairoroai b'a N na buaka ke ni kakioai nako.

⁴⁵ Ongora n Au babaaire i bukimi, kaain B'aburon. Ane a na uaakinaki nako natimi, ao e na kamaunaaki abami.

⁴⁶ E na ongo te aba karongoaan uruakakimi i buakoia botannaomata nako, ao e na ruru te aonnaba.