Ieremia 49 - Te B'aib'ara

Ana Taeka Te UEA I bukin Ammon

¹ E taekina te b'ai aei te UEA i bukiia botannaomatan Ammon: A rangi ni m'aiti natiia Iteraera aika a b'aib'ai n te aba. Ma ngaia are, e aera ngkami aika taan taromauria te anti are Mirekom ngkai kam a anai taiani kaawa ao aaba ake aia b'ai kaain te baronga are Kata?

² A na roko boong are N na kanakoa iai te taanga ni buaka b'a e na buakana Rab'a, are ami kaawa n tautaeka. E na tiku n uruaki, ao a na wene ni mannang kaawa aika a uarereke ake i rarikina nako. Kam anai tabeua abaia Iteraera, ma n te bong arei a na anai ami b'ai Iteraera.

³ Kam na tang kaain Etibon: E na riki ami kaawa b'a b'ariko n atiibu aika a maerikiriki. Ane kam na rairaki n aki akaaka, ma a na bonotaki kawaimi. Karin kunnikai n aki akaaka i aomi ao taang, ngkami aika kaain Rab'a, i bukina b'a a na anaaki bouananti ake kam taromauri nako abaia ianena, n reitaki ma ibongana ao mataniwiin ana Tembora.

⁴ Ngkami aika kaain Ammon aika taani kamangao kam onimakin kaub'aimi ao kam titiraki ni kaangai, “Antai ae e konaa ni buakaniira?” Ma I kauringngkami b'a kam na aki kainikatonga ngkana e a tabe ni mauna nako korakorami.

⁵ Bon te UEA Ngai ae Moan te M'aaka, ae I kona ni kanako ia botannaomata akana i rarikimi b'a a na oreingkami n te maaku. Ane kam na uamaaenako, a na akea ae e na tararuaia ami koraki ake taan raweimaiuia.

⁶ Ma e ngae n anne, ao a na roko boong ake n na uotiia iai au aomata nakon mwengaia. Bon aei au taeka Ngai ae te UEA.

Ana Taeka Te UEA I bukin Etom

⁷ Aio te b'ai ae taekinna te UEA ae Moan te M'aaka i bukin Etom: E a tia ni mauna nako te wanawana ma te iango raoi mai Teman. N nang karokoa te kabuanib'ai ni katuaaingkami ngkami aika ana kariki Etau,

⁸ ma ngaia are, e riai n rairaki ni biri nakon Mwengana ane e roko mai Tetan.

⁹ A na katikui tabeua uaan aia kureebe aomata aika a taia uaan aia kureebe i bukiia aika a maiu ni kainano A na ti anai baika a tangiri taani kimoa ngkana a roko ni kimoa n te tairiki.

¹⁰ Ma N na anai b'aai ni kabane aika kam b'ain, ngkami aika kaain Etom, ao n na kaoti taabo nako ike kam kaakarabai. Ao i mwiina, kam na mate, ao ai uana naba ma ami ataei, ami koraki ao kaain rarikimi nako.

¹¹ Ma kam na katikuia ami ataei aika akea tamaia ao aine aika akea buuia.

¹² Ao a na mooi naba ni m'angkon uniu botannaomata aika a aki riai ni katuaaeaki. Ao tera riki ami anga ni biri nako?

¹³ Boni Ngai ae te UEA ae I tuea ni bon arau b'a oin ami kaawa ae Botira ao ami kaawa ni kabane a na bane n karawaawataaki ni katauakiia ae e kakamaaku. A na wene n uruaki n aki totoki, ao aomata ana kabongana te ara ae “Botira” b'a te taeka ni kamaraia

¹⁴ N na kanakoa te tia uarongorongo b'a e na tuangiia botannaomata nako b'a a na katauraoi nakon te buaka ni kaaitaraia kaain Etom.

¹⁵ E na rangi ni uarereke ami botannaomata, ao e na bon ribaaki irouia botannaomata ni kabane.

¹⁶ E burebureingkami te kainikatonga b'a kam na iangoia b'a a taraingkami botannaomata ake tabeua ma te maaku. Kam maeka i buakon taabo aika a katati rikaaki ao i aon taiani maunga kaanga taian ikare, ma bon Ngai ae te UEA ae N na uotiko rikaaki.

¹⁷ Ane a na tiaoki akana i rarikin abam ao a na maaku ngkana a noora te kabuanib'ai

¹⁸ ae kaanga ai aron buakakan te urub'ai nakon ngkoa Totom ma Komora ao kaawa nako ake i rarikiia. E na akea kaain te kaawa ae Etom.

¹⁹ N na buakaningkami kaanga te raian man te buakonikai, ngkana e un nakon te tiibu n te tawaana are i mataniwiin te Ioretan. N te tai are a biri iai te nanai n tiibu, e na akea kanoan te aba. Antai ae N na rineia b'a e na buakaningkami? Boni Ngai! Bon akea ae e konaa ni kairoroai b'a N na buaka ke ni kakioai nako.

²⁰ Kam na ongora nakon Au babaaire i bukimi aika kaain Etom. Ane a na aeaeaki nako natimi ao e na uruakaki abami.

²¹ A roko karongoaan uruam n Taari are Uraura ao e na ioioa te aonnaba.

²² A na kiba rikaaki aiam ni buakaniko kaanga te ikare ae e taakin baina ni kiba ma ni kibakiba i aon Botira. Ane a na tauaki n te maaku am taani buaka.

Ana Taeka Te UEA I bukin Tamateko

²³ E taku te UEA i bukin Tamateko: A a tia n ongo rongorongom ae e aki raoiroi ni kaawa aika Amata ao Arab'ata. A a tia ni bua aia kaantaninga, ao e a taoniia te nanououa kaanga ai aron naon marawa.

²⁴ Ngkami aika kaain Tamateko e a tia ni bua ninikoriami, ao kam na rairaki n iakaka ni biri nako, ma n tauaki n te maaku ao te maraki.

²⁵ I rangi ni kukurei ngkoa n ami kaawa aika a buubura aika tanoata taekaia. Ma I kauringkami, “Biri nako i m'aain ae kam a aki konaa!”

²⁶ N te tai ae e aki maan, a na wene ni mate ami tautia i nanon kawain nako te kaawa. Bon aei au taeka Ngai ae te UEA ae Moan te M'aaka.

²⁷ N na kaura te ai i aon oon nako ami kaawa ma ni kabuoki ni kab'akai taian nono ake karaoi ngkoa te Uea are Benatata.

Nebukaneta Ma Aomatan Te Rereua

²⁸ Aio te b'ai are e taekinna te UEA i bukin baronga are Keta ao kaawa aika a uarereke n te rereua ake a tauaki i roun Uean B'aburon are Nebukaneta: ake a tia n tauaki i roun uean B'aburon are Nebukaneta Ongo, ngkami aika kaain Keta ma baronga ake te korakina ake n rereua i mainiku. I a tia n tuanga Nebukaneta b'a e na buakaningkami ma ni kamaunaingkami.

²⁹ Ane ana katobibiaki irouia ana taanga ni buaka aika akea maakuia, ma n anai ami autinrianna ma ami b'ai, ami tiibu ao ami kaamero nako.

³⁰ Biiri ni karabaingkami, ngkami aika kaain te rereua aika kam maeka n taiani kaawa aika a uarereke! Iai ana babaaire ae e buubura Nebukaneta i bukimi.

³¹ Bon akea oon ami kaawa aika a buubura ao bon akea kaain rarikimi aika a na konaa ni buokingkami, ao ae kam bon iangoia naba b'a kam mano ma ngaia ae, I tuangnga b'a e na buaka.

³² Ao i mwiina, a na aki riki ami kaamero ao te nanai n tiibu ae e korakora b'a ami b'ai. Kaain Rereuan Arabia, ane e na oroingkami te kabuanib'ai man taabo nako, ao ane kam na kamaaenakoaki i aon te aonnaba.

³³ Ti taian tiakaore aika a na maiu ike a tei iai ami kaawa aika a uarereke. Bon aei au taeka Ngai ae te Atua.

Ana Taeka Te UEA I bukin Eram

^34-35 E aki maan i mwiin uean Tetekia i aon Iuta, e taku te UEA ae Moan te M'aaka nako iu: Aomatan Eram. Ngai, te UEA ae Moan te M'aaka, N na tiringiia taani katebe ake a kakorakoraa Eram.

³⁶ A na buaka kairiribai man taabo nako, ao kam na kairaki nako b'a taenikai nako ia botannaomatan te aonnaba.

³⁷ Ko na kamanatuaaki ao ko na tiringaki irouia aia taanga ni buaka, ao kam na kaitibo ma te kabuanib'ai are e reke man marakin nanou.

³⁸ Ane a na mate ami uea ma ami mataniwi, ao N na tautaeka n aia tabo. Bon aei au taeka Ngai ae te UEA.

³⁹ Ma I berita b'a n te tai teuana are N na uotiia ami aomata n okira abaia.