Ieremia 46 - Te B'aib'ara

Ana Taeka Te UEA I bukiia Botannaomata

¹ E aki toki n tuangai te UEA te b'ai ae N na taekinna i bukiia botannaomata aika a kakaokoro n te aonnaba.

Ana Taeka Te UEA I bukin Aikubita

² N ana kaaua n ririki ni uea Ieoiakim i aon Iuta, e a taenikai uean Aikubita are Neko i roun Uean B'aburon are Nebukaneta n te buaka n te kaawa are Kakemiti i rarikin te Karaanga are Iuberetiti. Ao aei are E tuangai te UEA b'a N na taekinna i bukin ana taanga ni buaka Aikubita:

³ E a boo tain te nako ni buaka! Ma ngaia are, anai ami otanga,

⁴ tokari ami aoti, ao karaneaneai ami kainiwai. Katokai b'arami ni buaka ao kunnikaimi ni buaka, ao kaei nnemi.

⁵ I konaa n noora te buaka ngkai kam a taenikai ao kam biri nako, n aki manga tatanrikaaki. E otab'aniniingkami te maaku.

⁶ Kam marurung ao kam biri m'aaka, ma kam aki konaa ni biri nako. Kam b'aka n te buaka i rarikin te Karaanga are Iuberetiti.

⁷ Tera te botannaomata aei, ae e teirake kaanga te Karaanga are te Naire

⁸ Bon Aikubita ae e teirake ma te rurunga kaanga te karaanga ae e korakora raangana ao e taku, “N na kaiekaa te aonnaba, n na kamaunai taiani kaawa aika a buubura, ao n na tiringiia kaaina ni kabane.”

⁹ Waaki nako Aikubita ni karaoa ane ko taku. Tuangiia am kaanibuaka ao am taan toka i aoia aoti b'a a na buaka ni kakorakoraia. Tuangiia am taanga ni buaka b'a a na oti nako, ma kaain Itiobia ao kaain Ribia aika a uouoti aia otanga, ao kaain Ritia aika a uakainikatebe ao kanoanikatebe.

¹⁰ Ma E na tokanikai te UEA ae Moan te M'aaka n te buaka aei ao E na katoka nanona irouia aiana. A na kanaki n ana kaabaang ao ma n nimaki raraaia ni karokoa e ngae. Ane a na tiringaki i meaang i rarikin te karaanga are Iuberetiti, b'a te karea nakon te UEA.

¹¹ Aikubita, bon akea te b'atin ae ko na konaa ni marurung iai, e aki konaa naba ni marurung n tangaurin te kun mai Kireata.

¹² A a tia n ongo tangim botannaomata ni kabane; ko b'ainrang, ko a bon ataia. A na b'aka am tautia nako aon te tano, ma ni b'aka temanna i aon temanna.

Te kauring Nakon Aikubita

¹³ E taetae te UEA nako iu, ngke e roko Uean B'aburon ni buakana Aikubita. E taku,

¹⁴ “Ko na taetaekinna i nanon kaawan nako Aikubita, i Miketora, Membiti, ao Tabaneti ni kaangai: katauraoi ni bon tei i bukimi; b'aai ni kabane aika iroumi a na bane n uruaki n te buaka!

¹⁵ I a tia ni kab'aka antim ae e m'aaka are Abiti ma ni kakioa nako.

¹⁶ A b'aka i bon irouia am tautia temanna i aon temanna ao a taku, “Teirake! E na tiringiira ara kairiribai, ti ngkana ti biri nakon oin abara.”

¹⁷ Angan uean Aikubita arana ae e boou, “Te Tia Taetae Ae Akea Nanona”.

¹⁸ Aikubita, bon te Uea ni koaua Ngai, te UEA Ae Moan te M'aaka, ngkai bon iai Ngai a na rietaata i aom kairiribai akana a buakaniko kaanga te Maunga are Tabora i buakon taian tabuki ke te Maunga are Karemera i rarikin taari.

¹⁹ Kam na kairaki nako b'a taenikai, ma ngaia are, kam na booboti b'aai tabeua, aika kam na uoti ma ngkami. E na wene n akea kanoana ma n uruaki atuun kaawan ami tautaeka ae Membiti.

²⁰ Ko na buakanaki irouia, kairiribai mai meang, ngkoe ae Aikubita ae ko tamaroa, kaanga te nango ae e tenaa te kao.

²¹ Ane a na rairaki ni biri, aia tautia ianena aika a kabooaki. Ma a reke n te kabuanib'ai, kaanga taian kao ataei aika a kamarikaaki raoi aika a kairaki nakon te tia tiringa te tiibu.

²² E na biri nako Aikubita, kaanga te naeta ae e katiiti, ngkana a roko aia taanga ni buaka kairiribai. A buakanna ma te tanai, kaanga mm'aane aika a korokai

²³ ma ni kamaunaa te buakonikai ae e matenten

²⁴ A na kab'ainrangaki am aomata ao a na kataenikaiaki irouia kairiribai mai meaang.

²⁵ Bon te UEA Ngai ae Moan te M'aaka, ae Atuaia Iteraera. N na katuaea te anti are Amon are antiia kaain Teebeti ao antin Aikubita ake tabeua, uean Aikubita, ao kaain Aikubita, ao aomata aika a onimakina m'aakan Aikubita.

²⁶ N anga ngaiia nakon te Uea are Nebukaneta ma ana taanga ni buaka. Ma I bon berita b'a a na manga roko boong are a na maeka aomata i Aikubita aika a na manga maeka riki ikai, n aron are mai m'aaina. Bon aei Au taeka Ngai ae te UEA.

Kaokaia Aomata Iroun Te UEA Nakon Mwengaia i Iteraera E taku te UEA nako iu:

²⁷ Iteraera, Ane a na roko boong are N na kaokingkami iai nakoni mwengami mai abaia ianena. Ane kam na maeka ma te rau ngkami ma ami kariki ao akea te b'ai ae kam na maaku iai.

²⁸ Ma ngaia are, kam na aki maaku, e ngae ngke kam riai ni katuaaeaki ngkai ao kam a tia ni kauamaenakoaki i buakoia botannaomata ake tabeua. Ma ngkana I uruaniia, N na kaawakiningkami. Bon aei Au taeka Ngai ae te UEA.