Ieremia 39 - Te B'aib'ara

Kataenikaian Ierutarem Irouia Kaain B'aburon

¹ N te katebwina n nam'akaina n ana karuaiwa n ririki Tetekia ni uea i aon Iuta, ao e roko Uean B'aburon are Nebukaneta ma ana taanga ni buaka ni kabane ao a buakana Ierutarem.

² Ao e b'aka nonon te kaawa ni karuaiwan bongin te nam'akaina are te kaaua n ana katebwi ma teuana n ririki ni uea Tetekia.

³ Ngke e tauaki Ierutarem, a bane n roko ana mataniwi aika a rietaata uean B'aburon n taui aia tabo i nuukan te Mataroa are Nuuka, n reitaki ma Nerekara Tiaretera, Tamkara Nebo, Taretekim, Raba Tarita, ao Nerekara Tiaretera are teuana.

⁴ Ao ngke e a nooria te Uea are Tetekia b'a e a reke Ierutarem, ao a kataia ni biri nako man te kaawa n te tairiki anne. A nakon ana nne n aroka te uea, ao a biri nako man te mataroa are e mena i marenan oona ake uoua ake oon te kaawa ma ni manga kaineta M'aruan te Karaanga are Ioretan.

⁵ Ma a reke irouia ana taanga ni buaka B'aburon i rarikin te kaawa are Ieriko. A katika Tetekia ao a uotia nakon te kaawa are Ribera n te aba are Amata, ike e kabowiaki motikan taekana iai i roun Nebukaneta, ao e reke n te bure

⁶ ao e tua b'a e na katuaaeaki. A tiringaki natin Tetekia ake uoman i bon matana, ao ai uana naba ma taani kairiiri man utu n tautaeka mai Iuta.

⁷ E autaki matana ni kanakoaki, ao e kabaeaki n te taurekereke, b'a e aonga n uaakinaki nako B'aburon.

⁸ Inanon te tai anne, a tia ni kabuoki taian auti ana taanga ni buaka B'aburon i Ierutarem, n reitaki ma ana bareti te uea, ao a tia naba ni kab'akai nonon te kaawa.

⁹ Ao Nebutaratan, te aobitia are e tararuaia taan tei, e kairiia aomata ni kabane man te kaawa b'a taenikai, ao ai uana naba ma koraki ake a tia ni kaaina ana itera Nebukaneta.

¹⁰ Bon ti aomata aika akea abaia ake a tiku i Iuta, ao Nebukaneta e anganiia aia tawaana ma aia nne n aroka ni kureebe.

¹¹ Aikai kaetieti ake e anga Nebukaneta nakon Nebutaratan:

¹² “Kakaaea Ieremia ao kaawakinna raoi. Karaua tararuaia ao karaoi b'aai ni kabane akana e tangiri.”

¹³ Ao Nabutaratan, Nebutiatiban, Nerekara Tiaretera, ao ana aobitia te uea ake tabeman,

¹⁴ a kanakoa te taanga ni buaka b'a a na anaai n aia katawanang taan tei n te bareti. A katukai i aan ana kakaawakin Ketaria are natin Aikam te mm'aane ao a tuangnga b'a e na kairai nakon mwengau. Ai ngaia are I kariaiakaki b'a n na tiku ma aomata ake a tiku i Ierutarem.

Ana Berita Te UEA B'a E Na Kawakina Ebetemereka

¹⁵ Ao E taetae nako iu te UEA ngke I riki b'a te bure n te karabuuti are n aia katawanang taan tei n te bareti n tuangai b'a N na taetae

¹⁶ nakon Ebetemereka are mai Itiobia ni kaangai: Bon te UEA Ngai ae Moan te M'aaka, ae Atuaia Iteraera. I kauringiia aomata ni kabane b'a N na karokoa te kabuanib'ai, ao tiaki te teetekeraoi nakon te kaawa ae e buubura aei. N na karaoa ngkai te b'ai ae I taekinna n te tai ae e waekoa, ao kam na nooria ngkana e koro bukina.

¹⁷ Ma N na kaawakiningkami Ngai ae te UEA, ao kam na aki uotaki nako ia aika kam maakuia.

¹⁸ N na kamanoingkami, ao kam na aki tiringaki. E na reke birinakomi n rawei maiumi i bukina ngkai kam onimakinai. Bon aei Au taeka Ngai ae te UEA.