Ieremia 38 - Te B'aib'ara

Nneakin Ieremia I nanon Te M'anib'a Ae Akea Ranna

¹ N te bong teuana, ao a ongo Teb'atia, Ketaria, Ieukara, ao B'atura ngke I tuangiia kaain Iuta

² Ana taeka te UEA ae e kaangai, “E na mate n te buaka ke n te baki ke te aoraki te aomata ane e tiku i nanon te kaawa. A na bon aki tiringaki koraki aika otinako n taenikai nako ia kaain B'aburon; a na tiringaki ngkana a biri nako n rawei maiuia.”

³ I tuangiia te b'ai are E taekinna te UEA, “N na anga te kaawa nako ia ana taanga ni buaka B'aburon.”

⁴ Ma ngaia are, a m'ananga ni kawara te uea naake aman akekei ao a taku, “E na riai ni tiringaki Ieremia b'a e kab'arai nanoia tautian te kaawa aei ma aomata ni kabane, e kataia ni kakiriwei nanoia aomata.”

⁵ Ao e kaeka te uea are Tetekia ao e taku, “E raoiroi, kam konaa ni karaoa ane kam taku nakoina; I aki konaa ni katoki ngkami.”

⁶ Ao i mwiin anne, a kaokai nakon aia katawanang taan tei n te bareti, ao a nnaai rikaaki n te roobu nako nanon te m'anib'a are ana m'anib'a Marekia, are te natinuea te mm'aane. Bon akea te ran i nanon te m'anib'a arei, ao I a inako i nanon te bokaboka.

⁷ Ma e ongo taekau Ebetemereka are kaain Tiobia ae te iunaki ae e m'akuri n ana bareti te uea, ae a tia n nnaai nako nanon te m'anib'a. Ao n te tai aei, e boni karaoa ana bowi ni kaburebure te uea n te Mataroa are Beniamin.

⁸ Ma ngaia are, e nako ikekei Ebetemereka ao e taku nakon te uea,

⁹ Te uea ae ko karineaki, bon te burabeti Ieremia, ao a karaoa ae e aki raoiroi mm'aane aikai nakoina ngkai a karenakoa nakon te m'anib'a. Ao e na bon mate i nanona ikekei Ieremia ngkana e a bane te am'arake mai Ierutarem.”

¹⁰ Ao e taku Tetekia, “Kairiia teningaun tautia ao katikaraake Ieremia i m'aain ae e nang mate.”

¹¹ Ao e nako Ebetemereka ma tautia nakon te bareti ao a anai taiani kunnikai aika a mangaingai man ana ruunib'ai te uea. Ao a kamanenai b'a taian roobu ni karuoi iai mangaingai ni kunnikai akekei nako nanon te m'anib'a.

¹² Ao i mwiina, e taku, “Kaaki kunnikai akanne i aani baim b'a ko aonga n aki maraki.” Ao i mwiin karaoan arei,

¹³ a katikairake mm'aane ni kaotinakoai man te m'anib'a. Ao mai mwiin te tai anne, I a kawakinaki i nanon aia katawanang taan tei n te bareti.

Ana Titiraki Tetekia Nakon Ieremia

¹⁴ Ao e weteai te uea are Tetekia nakon are bon ana mataroa nakon te Tembora, ao e taku, “N na titirakiniko ngkai, ao I tangiria b'a ko na taekina raoi te koaua.”

¹⁵ Ao I kaeka ni kaangai, “E aera ngkai ko aki ongo? Ao ko tangira b'a N na tiringaki!”

¹⁶ Ao e taku, I tuea n aran te UEA ae E maiu ae te Tia karikib'ai b'a I aki tangiria b'a ko na tiringaki. Bon akea temanna ae e konaa n ongo te b'ai ae ti taekinna, ao akea temanna ae I tuangnga b'a e na tiringko.”

¹⁷ Ao i mwiina, I tuangnga ana taeka te UEA ae e kaangai: “Tetekia, bon te UEA Ngai ae Moan te M'aaka ae Atuaia Iteraera. I berita b'a ngkana ko taenikai irouia ana aobitia Nebukaneta, ao a na aki tiringaki am utu, ao e na aki kabuokaki ni kab'akaaki Ierutarem.

¹⁸ Ma ngkana ko aki taenikai, ao N na karokoa ana taanga ni buaka B'aburon b'a e na taua Ierutarem ma ni kabuokia ni kab'aka, ao ngkoe ko na uotaki nako b'a te taenikai.”

¹⁹ Ao e kaeka Tetekia, “I bon aki konaa n taenikai nako ia kaain B'aburon. I bon rangi ni maakuia taiani Iutaia ake a kaman reitaki ma ngaiia. B'a ane a na anga ngai kaain B'aburon nako ia taiani Iutaia akanne, ao a na bae ni kamarakai.”

²⁰ Ao I taku, “Ti ngkana ko ongotaeka i roun te UEA, ao ane a anga ngkoe kaain B'aburon nako ia taian Iutaia. Ane ko na kamaiuaki, ao a na nako raoi b'aai ni kabane nakoim.

²¹ Ma E a tia n te UEA ni kaotia nako iu b'a ngkana ko rawa n ongotaeka,

²² ao ane a na uotaki nako ainen am bareti b'a taenikai irouia ana mataniwi Nebukaneta. Ao ane a na kaangai aine aikai nakoim: A kairiko nako raoraom aika ko onimakiniia. Ao ngkai ko a m'ane n te bokaboka, ao a tia n rairaki ni kiitaniko raoraom ake ko onimakiniia.

²³ A na anaia buum ma natim kaain B'aburon b'a taenikai, ao ko na anaaki nakon uean B'aburon b'a te taenikai, ao e na kabuokaki ni kab'akaaki Ierutarem.”

²⁴ Ao e taku Tetekia, “Ieremia, ngkana ko tuanga temanna te b'ai ae ko a tia n taekinna, ao ane ko na bon tiringaki.

²⁵ Ao I kakoaua b'a ngkana a ongo ara mataniwi au maroroo ma ngkoe, ao ane a na titirakiniko te b'ai are ti maroroakinna. Ane a na bon iangoa naba kamateakim ngkana ko aki tuangiia.

²⁶ Ma ngaia are, ngkana a titirakiniko ao tuangiia b'a aongkoa ko buubutiai b'a N na aki kaokiko nakon te karabuuti are n ana auti Ionatan, b'a ko na mate ngkana I kaokiko nako ikekei.”

²⁷ Ao a bon roko mataniwi ao a titirakinai mwiin au maroroo ma te uea, ao I tuangiia te b'ai are e tuangai te uea b'a N na taekinna. Ao a aki manga titirakinai taekan ara maroroo, ao bon akea riki ae e ataa arei.

²⁸ Ao I katukaki n aia katawanang taan tei n te bareti ni karokoa te tai are e kataenikaiaki iai Ierutarem.