Ieremia 35 - Te B'aib'ara

Te Reirei Ae E Reke Mairouia Kanoan Rekaba

¹ Ngke e uea Ieoiakim i aon Iuta, E taetae te UEA ni kaangai,

² “Ko na nako nakon te kaainga are Rekaba ao ko na kaoiia b'a a na kawarai n te ruu teuana mai buakon ruun tinanikun rarikin te Tembora. Ko na anganiia te wain b'a a na mooi iai.”

³ Ma ngaia are, I nakon Iaatania are te tia kairiri n te kaainga, ao I kaoa ma m'anen ana kaainga ni kabane.

⁴ I kairiia nakon te Tembora ao I kairiia ni waerake nakon te ruu are i ieta are aia ruu burabeti ake ana reirei Anan are natin Iketaria mm'aane. E mena i rarikin te ruu are aia ruu mataniwi ake tabeman, ao e mena te ruu anne i aon ana ruu Maateia, are temanna mai buakoia ibonga aika a rietaata n te Tembora.

⁵ I kaotinakoi tabeua taian boora aika a on n te wain n reitaki ma tabeua taiani m'angko, ao I mwiina I taku nako ia kanoan Rekaba, “Katoonga te wain!”

⁶ Ma a kaeka ni kaangai: Ti a tau! E karaoa te tua ngkoa ara bakatibu n ara kaainga are Ionataba are natin Rekaba te mm'aane ae ti na ira nanona. E taku. “Kam na aki niinima te wain

⁷ ke ni katei auti ke n ununiki n te uita ma te kureebe. Ma kam na ti mamaeka n te autinrianna ma ni m'am'ananga man te tabo teuana nakon te tabo teuana. Ngkana kam ira nanon te tua aei, ao e na anaanau maiumi.”

⁸ Ti kakaonimaki nakon taiani kaetieti ni kabane ake e anganiira Ionataba. Ti aki konaa n nima te wain, ao a aki nimma naba buura, ao natira mm'aane, ke natira aine.

⁹ Ti bon aki katei auti-ti maeka n taian autinrianna-ao bon akea arokara taian uita ke kureebe, ke taiani koon.

¹⁰ Ti rangi n ongotaeka nakon b'aai ni kabane ake e tuangiira ara bakatibu are Ionataba b'a ti na karaoia.

¹¹ Ma ngke e buakana te aba Nebukaneta, ao ti a iangoia b'a ti nang nakomai nako Ierutarem ni kararoaira mairouia ana taanga ni buaka B'aburon ma Turia.

¹² Ao i mwiina, e tuangai te UEA b'a N na kaangai nako ia kaain Iuta ma Ierutarem:

¹³ I tangiringkami Ngai ae te UEA ae Moan te M'aaka ae Atuaia Iteraera, b'a kam na karekea reireiami

¹⁴ man ana kaainga kanoan Rekaba. E tuangiia ana kariki Ionataba b'a a na aki momooi n te wain, ao a ongotaeka iai ni karokoa te bong aei. Ma I aki toki n taetae nako imi, ao kam aki ongotaeka i Rou!

¹⁵ Kam aki kan ongo irouia Au burabeti, aika a aki toki n taetae nako imi ni kaangai, “Katoka karaoan te m'akuri ae e buakaka ao taromauriaia anti tabem'aang! Moana ongotaekami i roun te UEA ao ane E na kamaiungkami n te aba aei are e anganiia ami bakatibu.”

¹⁶ A a tia n ongotaeka kanoan Rekaba nakon ana tua aia bakatibu are Ionataba, ma kam tuai man ongotaeka i Rou,

¹⁷ Ngai ae Atuami. Bon te UEA Ngai ae Moan te M'aaka, ao I kauringkami ni b'aai aika a kakamaaku aika a na riki nako imi ngkana kam aki ongo i Rou. Kam a tia katinanikuai, ma ngaia are, e a oroiko te kabuanib'ai. Bon aei Au taeka Ngai ae te UEA.

E Karaoa Te Berita Te UEA nako ia Kanoan Rekaba

¹⁸ Ao i mwiina, e tuangai te UEA b'a N na kaangai nakon ana kaainga kanoan Rekaba: Bon te UEA Ngai ae Moan te M'aaka, ae Atuaia Iteraera. Kam a tia n ongotaeka nakon ami bakatibu are Ionataba,

¹⁹ ma ngaia are, I berita b'a a na riki ami kaainga b'a Au tia m'akuri ao a na bon aki mauna nako.