Ieremia 33 - Te B'aib'ara

E berita Te UEA B'a E na Kaoka Te Aba Nakoia Ana Aomata

¹ Ngke I bon mena naba n te karabuuti n aia katawanang taan tei n te bareti, ao e roko ana rongorongo te UEA irou.

² E taetae nako iu te UEA are e karaoa te aonnaba, are e karaoia ma ni katikua ni nnena. Boni Ngai are I aranaki b'a te UEA ao I kaangai,

³ “Weteai ao N na kaekako; N na tuangko b'aai aika a kamimii aika a tamaroa aika ko tuai man atai.

⁴ Bon te UEA Ngai ae Atuaia Iteraera, ae I taekinna b'a e na b'aka ni m'akoroua autin Ierutarem ao ana bareti te uea i Iuta b'a mwiin ewekakina ao buakanakina.

⁵ Iai tabeman aika a na buakana B'aburon, are e na kaon auti nako n taian mate ake aomata ake N nang oroia n uniu ma bononnanou. I tannako man te kaawa ae e buubura aei i bukin m'akuri aika a buakaka aika a tia ni karaoaki irouia kaaina.

⁶ A na roko boong are N na kamaiua iai te tabo aei ma kaaina, ao a na kukurei n te rau ae akea tokina.

⁷ N na manga anga riki te aba aei nako ia Iteraera ma Iuta, ao N na manga kakorakoraia n aroia are rimoa.

⁸ A bure ao a kakaitaraai, ma N na kab'arai aia bure ma ni uoti nako aia kaairua.

⁹ Ngkana e riki anne, ao ane a noori b'aai aika a raoiroi aika I a tia ni karaoi i bukin Ierutarem, botannaomata ni kabane n te aonnaba aei, ma arou ni karekea te rau iai.

¹⁰ Ieremia, ko taku b'a e na rereua te aba aei ao akea aomata ma maan iai, ao n te tai aei, e bon eti are ko taekinna. A akea kaain kaawan Iuta ao e a rereua kawain te kaawa i Ierutarem, ao bon akea aomata ma maan n nooraki n taabo nako. Ma a na roko boong ane ko na manga ongo iai

¹¹ b'anaan te kukurei ao karongoaan taiani bootaki ni kukurei ma taiani baka ni mare. Ao ngkana a rin n au Tembora b'a a na anga karea i bukin kakukureiau, ao ko na ongo ae e kaangai irouia: “Ti neboiko, te UEA ae Moan te M'aaka! Ko karaoa ae e raoiroi nakoira, ao e bon aki konaa ni matebuaka Am tangira.” E na manga okira arona te aba ni kariki uaa.

¹² E taku ana taeka te UEA ae Moan te M'aaka, “N te aba aei are kaanga ai aron te rereua ao akea aomata ma maan ni maiu iai ngkoa, a na manga reke iai taabo n uteute ike a na kairiia aia tiibu taani kaawakintiibu nako iai.

¹³ Ni kaawan aaba ake a tabukibuki, aaba ake a rinano, ao Iuta Maiaki, i abaia kaain Beniamin, ni kaawa ake i rarikin Ierutarem, ao ni kaawan nako Iuta, a na manga warewareki aia tiibu taani kaawakintiibu. Bon aei au taeka Ngai ae te UEA.”

Ana Berita Te UEA Ae E Kamimii

¹⁴ E taku te UEA: I karaoa te berita ae e kamimii nakon Iuta ma Iteraera, ao a na roko boong ake N na kakoroi bukiia iai.

¹⁵ I berita b'a e na roko te bong anne ngkana I rinea te uea man ana utu Tawita, ae te uea ae e na karaoa ae e raoiroi ao e na tautaeka ma te eti.

¹⁶ E na mano Iuta, ni boong akanne; e na mena te rau i aon Ierutarem ao e na aranaki b'a, Te UEA ae E anga te Rau.”

¹⁷ E na nako uean Iteraera man ana kariki Tawita,

¹⁸ ao a teimatoa n reke ibonga man kanoan Rewi aika a na m'akuri n te baonikarea ao a na anga karea i bukin kakukureiau ao karab'aakiu.

¹⁹ Ao i mwiina E taku te UEA nako iu:

²⁰ I a tia Ngai ae te UEA ni karaoa Au boraraoi ma te ngaina ao te bong, b'a a aonga n rooroko raoi n te tai ae e riai. Kam aki konaa n urua te boraraoi ae I a tia ni karaoia ma ngkami,

²¹ ao kam aki konaa n urua te boraraoi ae I a tia ni karaoia ma ana utu Tawita, ibonga man kanoan Rewi ake a m'akuri n te baonikarea. A na tautaeka n taai nako ana kariki Tawita ma ni uea i aon Iteraera,

²² ao a na kam'aitaki riki ana kariki Tawita ao aia kariki ibonga ake kanoan Rewi nakon taiani itoi i karawa ke tanon te bike.

²³ E taku naba te UEA:

²⁴ Ko a tia n ongongo aia taeka ianena ngkana a kamamaaeia Au aomata ni kaangai, E rineia ngkoa Iteraera ma Iuta te UEA, ma ngkai e a katinanikuia, ao a aki manga riki b'a Ana botannaomata.”

²⁵ Ieremia, N na bon aki urua Au boraraoi are I karaoia ma te ngaina ao te bong ke ni kariaia karawa ma aonnaba b'a a nang aki ongotaeka nakon Au tua nako.

²⁶ Ao N na bon karaoa naba aron anne; b'a N na aki katinanikuia naba ana kariki nako Aberaam, Itaaka, ao Iakob'a ke n urua Au berita are a na teimatoa n riki ana kariki Tawita b'a aia Uea. N na akoia Au aomata aika Iteraera, ao a na manga okira aroia n teetekeraoi.