Ieremia 30 - Te B'aib'ara

E Na Kamaiua Iteraera Ao Iuta Te UEA

¹ E taku te UEA ae Atuaia Iteraera

² nako iu: “Ko na koroi ni kabane i aon te boki b'aai ni kabane aika I tuangko,

³ N te bong teuana ao a na oki Au aomata aika uakoraki aika Iteraera ma Iuta nakon abaia are I anganiia aia bakatibu.”

⁴ E taku te UEA nako ia Iteraera ma Iuta:

⁵ “I ongo te tangi ni maaku, tangin te maroaa b'a akea te rau.

⁶ E konaa ni bungia natina te mm'aane? Ao e aera ngkai I nooriia b'a a rangi ni mainarake ma n tautaua birotoia kaanga te aine ae e ariri b'a e nang bung?

⁷ Au aomata, e na rangi ni korakora riki marakimi nakon are mai i m'aaina n te tai ae e aki maan mangkai, ma N na kamaiungkami.

⁸ Kam a riki b'a aia toro ngkai botannaomata ake tekorakina, ma N na motiki aia tiein ao N na urui amoia ake a tautoroningkami.

⁹ Ao i mwiina, kam na riki b'a au tia m'akuri, ao N na rinea te uea maibuakomi man ana utu Tawita.

¹⁰ Iteraera, bon au aomata ngkami, ma ngaia ae kam na aki maaku. Iteraera, kam na aki nim'atoaua. N na kamaiungkami man te aba are e raroa nako, man te aba are kam kataenikaiaki ngkoa iai kam na oki nakon mwengami ao kam na maiu ma te rau; Ane kam na mano raoi, ao akea ae e na konaa ni kakamaakuingkami.

¹¹ N na roko iroumi ni kamaiungkami. N na kamaunaiia botannaomata ni kabane ake I kamaaenakoingkami nako ia, ma N na bon aki urua aromi. N na bon katuaaingkami ngkana I kanakoingkami; ma N na bon katuaaingkami n te aro ae e riai. Bon aei Au taeka Ngai ae te UEA.

¹² E taku te UEA: Au aomata, kam a ikoaki ao kam a kani mate.

¹³ Kam bukinaki ni karaoa te bure ao akea ae e konaa n tei i bukimi, ao kam a onrake n taiani maneka ae akea b'ainaorakiia ae a na mao iai.

¹⁴ A bane ni m'aninga taekami raraomi; a aki manga tabe ma ngkami. I a tia ni buakaningkami kaanga te kairiribai; ao e rangi ni kamaraki katuaaeami i bukina ngkai a m'aiti ami bure ao a rangi ni korakora buakakami.

¹⁵ Katoki ngurenguremi i bukin ikoakimi; bon akea b'ainaorakiami. N na katuaaingkami n aron aei i bukina ngke a m'aiti ami bure ao a rangi ni korakora ami buakaka.

¹⁶ Ma ngkana a kataia ami kairiribai ni kimoaingkami ke ni uruana aromii, ao N na manga kimoaia ma n uruana aroia, ao a na uotaki nako b'a taian taenikai nakon abaia ianena.

¹⁷ Akea ae e tangiria n riki b'a raoraomi ke n tabe n te b'ai ae e riki nako imi. Ma N na kamaoi ikoakimi, ao kam na manga marurung.

E Na Kamaiuia Iteraera Ao Iuta Te UEA

¹⁸ E taku te UEA: Kaain Iteraera, N na akoingkami ma ni kanakoingkami nakoni mwengami. E a wene n uruaki ngkai Iteraera, ma kam na manga kateia, ni katiaa ma te bareti ae e boou.

¹⁹ A na karineingkami ma n neboingkami botannaomata ake tabeua. A na kaonaki mwengami irouia ataei, ao kam na bukamaru, ma n anene n neboai.

²⁰ E na riki kaanga taai ake ngkoa. Ane a na taromauriai ami botannaomata, ao N na katuuaia ni kabane akana a kabuakakaingkami.

²¹ E na riki b'a ami tia tautaeka temanna mai buakoia oin ami aomata. Ao ngkana I kaoa b'a e na roko ni kaaniai n te tabo n taromauri, e na bon karaoa anne. Bon akea ae konaa n roko ni kaaniai ngkana e aki kaoaki.

²² Kam na riki b'a Au aomata, ao Ngai N na riki b'a Atuami. Bon aei Au taeka Ngai ae te UEA.

²³ I rangi n un! N na riki kaanga te angibuaka ae e korakora n oroia aika a karaoa te kaairua.

²⁴ E na bon aki toki uniu ni karokoa e bane raoi te b'ai ae I a tia ni baaireia b'a N na karaoia. N te bong teuana, ao kam na ataa te b'ai ae I nanonna.