Ieremia 29 - Te B'aib'ara

Ana Reta Ieremia Nakoia Kaain Iuta i B'aburon

¹ Ao I korea te reta nako ia ibonga, burabeti, taani kairiiri irouia aomata, ao nako ia ni kabane ake a uotaki nako b'a taenikai i roun Nebukaneta mai Ierutarem nako B'aburon.

² I koreia i mwiin uotakinakoan te uea are Ieoiakin, ma tinana, mataniwiin te bareti, taani kairiiri i Iuta ma Ierutarem, taani karaob'ai, ao taani m'akuri aika a m'aatai b'a taenikai.

³ I anga te reta nakon Erata ao Kemaria, mm'aane ake uoman ake e kanako ia te uea are Tetekia nako Iuta mai B'aburon b'a a na taetae ma Nebukaneta. Ao I korea

⁴ ae te UEA ae Moan te M'aaka ae Atuaia Iteraera i nanon te reta, are E a tia n taekinna ae e kaangai: I a tia n anaingkami mai Ierutarem nako B'aburon. I tuangkami

⁵ b'a kam na maeka ikekei ma ni katei ami auti. Karaoi taian nne n aroka ao am'arake man b'aai ake kam uniki i nanoia.

⁶ Kam na iein ao karikiia natimi, ao i mwiina kam na buokiia natimi mm'aane ni kakaaeia buuia ao buokiia naba natimi aine ni kakaaeia buuia, b'a a aonga ni karikiia naba natiia. I tangiria b'a e na rikirake m'aitimi, e na aki rikirake ni uarereke.

⁷ Kam na tataro i bukin karekean te rau i B'aburon ao m'akuri korakora i bukin karekeani kab'aiami. Rikiraken nakoraoin te botannaomata bon rikiraken maiuraoimi.

⁸ Bon te UEA Ngai ae Atuaia Iteraera, ae I kauringkami b'a kam na aki kam'aneaki irouia burabeti akana a maeka i buakomi ke naake te koraki ake a taku b'a a konaa n taetae ni burabeti i bukin boong aika a na roko. Kam na bon aki tabe ma miia.

⁹ A taetae ni kewe nako imi n arau. I bon aki nako ia. Bon aei Au taeka Ngai ae te UEA.

¹⁰ I mwiin rikin B'aburon b'a te kabanea ni korakora ni botannaomata i nanon itibwi te ririki, ao N na manga akoingkami ma ni kaokingkami nako Ierutarem.

¹¹ N na kakab'aiaingkami ni boong aika a na roko aika a on te kaantaninga; boong n tokanikai, tiaki boong ni karawaawata.

¹² Ane kam na oki nako iu ma ni buubutiai buokami, ao N na kaekai ami tataro.

¹³ Ane kam na taromauriai ma nanomi ni koaua, ao N na raraoningkami

¹⁴ ao N na kariaia ami taromauri. Ao i mwiina, N na bootingkami mairouia botannaomata nako ake I kamaaenakoingkami nako buakoia ngkoa, ao kam na manga okira Ierutarem.

¹⁵ Kam taku b'a kam mano i bukina ngke kam taku b'a I kanako ia taiani burabeti b'a a na taetae i buku i B'aburon.

¹⁶ Ongora nakon te b'ai ae e taekinna te UEA ae taekan te uea ake e tautaekana te abanuea are e tautaekanaki ngkoa i roun Tawita, ao taekaia naba kaain te kaawa ae e buubura aei, ake bon ami koraki ake kam kaai n aki uotaki nako ma ngaiia nakon te kataenikaiaki.

¹⁷ E taku te UEA ae Moan te M'aaka, ‘N na karokoa te buaka, te baki, ao te aoraki i aoia, ao N na karaoia kaanga te biiku aika a rangi ni mori n te aro are a aki konaa ni kanaki.

¹⁸ N na ririmwiia n taiani buaka, te baki, ao taian aoraki, ao a na bane ni maaku botannaomata n te aonnaba n te b'ai ae a nooria. A na tiaoki ma ni maaku aomata nako ake I kamaaenikuniia nako buakoia n te b'ai are e riki nako ia. Ane a na b'ainingareaki irouia aomata ao a na kamanenaaki araia b'a te kamaraia.

¹⁹ E na riki aei nako ia i bukina ngke a aki ongotaeka nakon te rongorongo ae I teimatoa ni kanakoa nako ia rinanoia Au taani m'akuri aika burabeti. A rawa n ongo.

²⁰ Ngkami ni kabane aika I kanakoingkami nakon te kataenikaiaki i B'aburon, ongora nakon te b'ai ae I taekinna Ngai ae te UEA,’

²¹ E a tia n taetae te UEA ae Atuaia Iteraera, i bukin Aaba are natin Koraia te mm'aane ao Tetekia are natin Maateia te mm'aane, are e taetaekina te kewe nako imi n arau. E a tia n taekinna b'a e na anga ngaiia nakon m'aakan te Uea are Nebukaneta are uean B'aburon, are e na kamateia i matami.

²² Ngkana a tangiria ni kamaraiaa temanna aomata ake a uotaki nako b'a taenikai mai Ierutarem nako B'aburon a na taekina ae e kaangai, “Ke e karaoa nakoim te UEA aron are E karaoia naba ngkoa nakon Tetekia ma Aaba, ake e kabuekiia uean B'aburon ngke a bon taratara mataia!”

²³ Bon aei tokiia i bukina ngke a tia ni karaoa te bure ae e rangini buakaka—a tia ni wenenibure ao a tia n taekin taiani kewe n aran te UEA. E bon kaaitaraa nanon te UEA te aro aei, E ataa te b'ai are a tia ni karaoia, ao E bon riki b'a te tia kakoaua ni kaaitaraia. Bon aei au taeka Ngai te UEA.”

Ana Reta Temaia

²⁴ E tuangai te UEA ae Moan te M'aaka, ae Atuaia Iteraera te b'ai are e na riki nakon Temaia, are bon ngaia temanna mai buakoia ara aomata i B'aburon.

²⁵ I mwiin rokon au reta irouia kaain B'aburon, ao e korea ana reta Temaia nako ia kain Ierutarem, n reitaki ma te ibonga are Teb'ania are natin Maateia te mm'aane, ao ibonga ake tabeman. E taku kanoan te reta nakon Teb'ania:

²⁶ I mwiin maten Ieoiata are te ibonga, E rineiko te UEA b'a ko na riki b'a te ibonga are e tararuaia te taanga ni bureitiman i bukin te Tembora. Ko ataia aomata b'a akana a boni baba ma ni bakaaea te riki ni burabeti a riai ni katikaki ma ni kabaeaki n taian tiein ao biiti are kabaean te roroa.

²⁷ E bakaaea te riki ni burabeti Ieremia are mai Anatota i aon Ierutarem, ao e aera ngkai ko aki katuaaea?

²⁸ Ao e boni korea naba te reta nako ia aomata i B'aburon ikai, ma n taku b'a e na tiku ikai n te tai ae e maan. E tuangiira b'a ti na katei mwengara ma ni katei ara nne n aroka ma n uniki oin kanara.

²⁹ Ngke e reke ana reta Temaia i roun Teb'ania, ao e warekia.

³⁰ Ao i mwiina, e a manga tuangai te UEA te b'ai ae N na manga koreia n te kauoua n reta

³¹ nako ia kaain Iuta ake a uotaki nako B'aburon. I koreia i nanon te reta aei te b'ai are e taekinna te UEA: Bon te UEA Ngai ae I aki rinea Temaia b'a e na riki b'a temanna te burabeti, ao e kam'aneingkami ngke e keweingkami n arau.

³² E a tia n taetae nako imi b'a kam na aki ongotaeka nako iu. Ma ngaia are, N na katuaaea Temaia. Ngaia ma ana kariki a na kaai n aki noora te b'ai ae e raoiroi ae N na karaoia nako ia Au aomata. Bon aei Au taeka Ngai ae te UEA.