Ieremia 26 - Te B'aib'ara

Ana Rongorongo Ieremia i Nanon Te Tembora

¹ N te tai ae e aki maan, i mwiin rikin Ieoiakim b'a uean Iuta, ao e taku te UEA:

² Ieremia, iai Au rongorongo nako ia aomata nako aika a roko mai Iuta b'a a na taromauri n au Tembora. Ko na nako nakon katawanangin te Tembora ao taekin b'aai ni kabane ake I taekin nakoim.

³ Tuangiia Au taeka ae e kaangai:

⁴ Kam a tia n rawa n ongo i Rou ma n aki ongotaeka nakon Au tua nako ma Au taeka n reirei nako.

⁵ I aki toki ni kaakanakoia Au burabeti b'a a na kab'arab'ara nako imi, ma kam bon aki kubariia naba. Ao ngkai I a kauringkami b'a ngkana kam aki moana ongotaekami i Rou,

⁶ ao N na urua te Tembora, n arou naba ngke I urua te kaawa are Tiro. Ao i mwiina, ane a na kamanenaa aran “Ierutarem” b'a te taeka ni karereanti nako ia aomata ni kabane i aon te aonnaba.

Katean Ieremia N Te Boowi

⁷ Ao a ongo burabeti, ibonga, ao aomata nako te b'ai are I taekinna n te Tembora,

⁸ ao ngke e a tib'a bane taekinan b'aai nako ake e mwiokoai te UEA b'a N na taekin, ao a tauai ma n takaarua ni kaangai, “Ko na riai n tiringaki i bukin te b'ai ae ko karaoia!

⁹ E aera ngkai ko taetae n aran te UEA b'a e na riki te Tembora aei kaanga Tiro ao e na uruaki te kaawa aei ao a na akea ae na maeka iai?” Ao i mwiin arei, a bootaki aomata ni katobibiai.

¹⁰ Ao a ongo ana aobitia te uea te b'ai are e riki, ao a m'ananga man te bareti nakon mataroan te Tembora b'a a na riki b'a taani motikitaeka n te kateitei n te bowi.

¹¹ Ao ngke a tabe n ongora, ao a roko ibonga ma burabeti ao a taku, “Kam bon bane n ongo ana taetae ni burabeti Ieremia ngke e taku b'a e na uruaki Ierutarem. E bon riai tiringakina.”

¹² Ao I taku, “E kanakoai te UEA b'a N na taekin b'aai ni kabane ake kam ongo mairou ake taekan te Tembora ma te kaawa ae e buubura aei.

¹³ Kam na riai ni bita aroni maiumi ma b'aai aika kam karaoi, ao kam riai n ongotaeka i roun te UEA ae Atuara. Ngkana kam karaoa aei, ao ane E na bita nanona i bukin karokoan te kangaanga are e taekinna b'a e na karokoa i aomi.

¹⁴ Kam riai ni baairea te b'ai ae kam na karaoia ma Ngai. Kam na ti karaoa te b'ai ane kam taku b'a e bon eti.

¹⁵ Ma ngkana kam kamateai, ao a na bane n reke kaain Ierutarem n te bure n tiringa te aomata ae akea ana bure, i bukina b'a bon mai roun te UEA b'aai ni kabane aika I taekin.

¹⁶ A kaangai taani moti ma aomata ake tabeman nako ia ibonga ma burabeti, “Ngkai e a tia n tuangiira Ieremia ana taeka te UEA ae Atuara, ao ti aki iangoia b'a e na riai matena.”

¹⁷ Ao i mwiina, a kerake taani kairiiri man kaawa ake tabeua. Ao e taekinna nako ia aomata b'a n ririki ake ngkoa

¹⁸ ngke e uea ngkoa te uea are Etekia i aon Iuta, ao e roko te burabeti are Mika man te kaawa are Moreteta ao e taku: “Bon aei Au taeka Ngai ae te UEA ae Moan te M'aaka, E na riai ni kamarauaki Ierutarem kaanga te tawaana, ma n tiku ni urubekebeke. E na onrake taiani maunga n taiani kai aika a kateketeke ike e tei iai ngkai te Tembora.

¹⁹ Ao a manga kaeka taani kairiiri ni kaangai: Bon akea ae e tiringa Mika i bukin taekinakin anne. Ma n onean mwiin anne, e tataro Etekia nakon te UEA ma te maaku ao te ruru ao e butiia b'a e na nanoangaia. Ao i mwiin anne, e baaireia te UEA b'a E nang katoka uruan Ierutarem, e ngae ngke a tia n taekina b'a E na karaoia. Kaain Iuta, ngkana kam tiringa Ieremia, ao ti bon karokoa iai te kabuanib'ai ae e kakamaaku nakoira.

²⁰ Iai te aomata temanna ae arana Uria ae natin Temaia mai Kiriata Iearim, ae e taetae n aran te UEA ni kaaitaraa te botannaomata n aron are e karaoia naba Ieremia.

²¹ Ao ngke a ongo te uea are Ieoiakim ma ana tautia ma ana mataniwi ana taeka Uria, ao e iangoia te uea b'a e na tiringaki. Ma e ongo Uria, ao e biri nako Aikubita.

²² Ao te uea are Ieoiakim, e kanakoa Erenatan are natin Akebora te mm'aane ao mm'aane tabeman a nako Aikubita b'a a na anaa Uria.

²³ Ao a kairiia rikaaki nakon te Uea are Ieoiakim, are e a kamatea ao e karenakoaki rab'atana nakon te tabo n taunimate.

²⁴ I a aki uotaki nako ia aomata b'a N na tiringaki i bukina ngke e tei i buku Aikam are natin Tiaban te mm'aane.