Ieremia 25 - Te B'aib'ara

Itibwi Te Ririki Ni Kataenikaiaki

¹ I nanon ana kaaua n ririki n uea Ieoiakim are natin Iotia te mm'aane n uea i aon Iuta, ao e reke irou te rongorongo mai roun te UEA ae taekaia kaain Iuta.

² Ao I taku nako ia kaain Iuta ma Ierutarem,

³ “Ai 23 te ririki ngkai man te moan tai are e uea iai Iotia, ao I a kaman tuangkami te b'ai are e tuangai te UEA. Ma kam tuai mani kan ongo.

⁴ E a tia ni kanako ia burabeti nako imi te UEA man te tai teuana nakon te tai teuana, ma kam rawa n ongo.

⁵ A a tuangkami te b'ai are e taekinna te UEA: Bita maiumi! Ngkana kam katoka karaoan te buakaka, ao N na katikuingkami n te aba aei are I anganiia ami bakatibu n akea tokina.

⁶ I aki tangiria ni kaikoakingkami. Ma ngaia are, kam na aki kaunai n taromauriia bouannanti ao anti tabem'aang.

⁷ Ma kam rawa n ongo irouia burabeti. Ma ngaia are Ngai ae te UEA ae I taekinna b'a kam a tia ni kamaraka nanou n taromauriia bouannanti, ao bon ngkami aika kam maraki n te b'ai are kam karaoia.

⁸ Kam rawa n ongo irou,

⁹ ao ngkai N nang kanako ia botannaomata mai meang b'a a na buakaningkami, bon mai roun au toro are Nebukaneta mai B'aburon. Kam na uruanaki ngkami ma botannaomata akana i rarikimi nako ao kam na tiku n uruaki n aki toki. A na tiaoki aomata akana a noora aron uruakin ami kaawa, ma a na b'ainingarei ngkami.

¹⁰ N nang katoki ami baka ni kukurei ma bootaki ni mare; akea riki ae e na manga kamanta te uita ke ni mena ikai ni kaura te taura n te bong.

¹¹ E na akea kaain te aba aei kaanga te rereua ae akea kaaina, i bukina b'a N na karaoingkami b'a toro i roun uean B'aburon i nanon 70 te ririki.

¹² Ngkana e a roko n tokina te tai anne, N na manga katuaaea te uea ma ana aomata i bukin taiani kairua ni kabane ake a tia ni karaoi, ao N na manga onika te aba nakon te aba ae akea manenana n aki toki.

¹³ E a tia Au toro are Ieremia n tuangkami te b'ai are N na karaoia nakon B'aburon ao nako ia botannaomata ake tabeua, ao e koroi ni kabane taekaia n te boki. N na karaoi b'aai ni kabane ake I a tia n taekini b'a N na karawaawataingkami iai.

¹⁴ N na katuaaia kaain B'aburon i bukin taian kairua ake a tia ni karaoi. E na tauaki B'aburon irouia uea aika a kakannato ma botannaomata ake tabeua ma ni kairoroia b'a a na riki b'a aia toro.

Te M'angko Ae E On N Unin Te Atua

¹⁵ E kaota nako iu te kaotioti te UEA ae Atuaia Iteraera ae e kaangai nanona, “Ieremia, aio te m'angko ae e kanoaaki n wainin uniu. Anaia ao kamooia teutana aomata ni kabane mai iai.

¹⁶ Ane a na mumuta ma n rangirang iai, i bukin te buaka ae e nang karokoa m'angkon uniu aei nako ia.”

¹⁷ Ao I anaa te m'angko arei mai bain te UEA, ao nako ia uean botannaomata ao I kamooia n tatabemaniia nako kaka teutana.

¹⁸ I moanna mai Ierutarem ao kaawan nako Iuta, ao a bane ni keerikaaki man m'aakaia ma te b'ainrang te uea ma ana mataniwi nako. Ao a bane aomata ni manikangare ni kamamaaia i bukiia ma ni karika araia b'a taeka ni kamaraia.

¹⁹ Te kauoua n tabo are I a manga nako iai bon Aikubita, ike a bane ni mooi aomata nako n te m'angko arei, n reitaki ma te uea ma ana mataniwi, ao taani m'akuri n te tautaeka, ao kaain Aikubita ni kabane,

²⁰ ao ianena ni kabane ake a maeka i aon te aba arei. Ao i mwiina, I nako ia uean Uti, ao i mwiina uean Biritia ake aman, ake a tautaekana Atikeron, Kata, Ekeron, ao nikirani b'aai i Atitota.

²¹ Ao i mwiina, I nako ia uean Etom, Moaba, Ammon,

²² ao uean Turo ma Titon, ao aia korone nako ake aaba ake tabeua i taari.

²³ I mwiin aei, I a manga nako nakon uean Tetan,

²⁴ Tema, Buti, barongan Rereuan Arabia,

²⁵ Timri, Eram, Meria,

²⁶ ao aaba ake i meaang, ake a kaan ma aika a raroa. I nakon aaba nako i aon te aonnaba, teuana i mwiin teuana, ao n te kabanea I a roko i B'aburon.

²⁷ E a tia n tuangai ngkoa te UEA b'a N na riai n tuangiia ueea n tatabemaniia nako ni kaangai, “E tuangkami te UEA ae Atuaia Iteraera b'a kam na mooi man m'angkon te wain ae e on n unna. N na kamangingkami ao kam na mumuta. Ao ngkana e kanako ia taani buaka te UEA nako ia botannaomata nako, ao kam na bon konaaki n te kakoaua.”

²⁸ E tuangai te UEA b'a ngkana iai mai buakoia ae e rawa ni mooi man te m'angko aei, ao N na tuangiia Ana taeka ae e kaangai, “Bon te UEA Ngai ae moan te M'aaka ae I tuangkami b'a kam na mooi.

²⁹ Ni moa man oin Au kaawa ae Ierutarem, a na bane aomata nako ni karawawataaki n te buaka. Ma ngaia are, bon akea te kawai ae kam na konaa iai biri nako man te kabuanib'ai.”

³⁰ E taku te UEA nako iu: N na bekorara kaanga te baa man au Tembora, ngkana I kamanatuaia au aomata ma aomata nako kaanga ai aron taiani kureebe.

³¹ E na ongo te aba b'anaau man taabo nako i aon te aonnaba, ngkana I bukiniia botannaomata n aia kaairua ma ni motika taekan te tia bure nakon te mate.

E Na Roko Te Kabuanib'ai:

³² E taku UEA ae Moan te M'aaka: Kam konaa noora te aoraki ngkana e butinako man taabo aika a raroa nako n te aonnaba, man te botannaomata teuana nakon teuana kaanga te angibuaka ae e kakamaaku.

³³ Ngkana e oro, N na tiringiia aomata aika a m'aiti n te aro are a na raea rab'ataia i aon te tano kaanga nakotariia maan. Bon akea temanna ae e na tiku n te aro are e na reke taunakiia ke n tanginiwenei i bukiia.

A na Katuaaeaki Taani Kairiiri Mai Iuta

³⁴ Bon ana nanai te UEA aomata, ao ngkami aika taani kairiiri bon taani kaawakintiibu. Ma ngkai, ai manga ami tai n tiringaki kaanga tiibu. Kam na maaenikun kaanga te b'aata te tano ae e b'aka man te buia. Ma ngaia ae, kam na rabinobino i aon te tano, n tang ma n tanginiwenei.

³⁵ Bon akea te tabo ae kam na biri nako iai, ao akea te tabo ae kam na karabaingkami iai.

³⁶ Kam tanginiwenei ma n tang n takaarua i bukina b'a te UEA e na urua aron ami botannaomata

³⁷ n unna ao ni katuka abami are e rau ma te urubekebeke.

³⁸ E a tia te UEA ni kiitaniia ana aomata kaanga te raian ae e kiitana b'angana. E a tia n onika te aba kakamaakun taiani buaka ma korakoran unin te UEA nakon te rereua.