Ieremia 24 - Te B'aib'ara

Miiakin B'aene Ni Biiku Aika Uoua Iroun Ieremia

¹ E taetae te UEA nako iu n te mii ngke e a tia Nebukaneta are uean B'aburon n roko i Iuta ma n uota nako te uea are Ieoiakin, ana aobitia, ana taani m'akuri aika a m'aatai ni kaokia nako B'aburon. N te mii aei, I noora uoua te b'aene ni biiku i matan ana Tembora te UEA.

² E onrake te b'aene are teuana n taian biiku aika a rangi n raoiroi aika a kaman tawaa, ao te b'aene are teuana e onrake n taian biiku aika a buakaka aika a aki tau n te kanaki.

³ Ao e titiraki te UEA ni kaangai, “Ieremia, tera ane ko nooria?” Ao I taku, “Taiani biiku. Iai aika a raoiroi, ao ake tabeua a buakaka n te aro are a aki konaa ni kanaki.”

⁴ Ma ngaia are, Ko na tuangiia kaain Iuta ni kaangai:

⁵ Kaain Iuta, biiku ake a raoiroi e tei i bukiia tabeman maibuakomi ake I kanako ia nakon te taenikai nako B'aburon,

⁶ ike I tarataraia iai. Ao n te bong teuana N na kaokiia nakon te aba aei. N na unikia, ao N na aki manga taewakaiia, ao N na karikirakeia, ao N na aki manga uruia ni kab'akaia.

⁷ N na anganiia tangiran te kan ataai ao a na riki b'a Au aomata. Ane a na tangirai b'a N na riki b'a Atuaia, ao ane a na rairaki nako iu ma nanoia ni kabane.

⁸ Taian biiku ake a buakaka a tei i bukin uean Iuta are Tetekia, ma ana mataniwi, ao ake tekorakina ni kabaneia ake a uotaki nako B'aburon, e ngae ngke tao a tiku ikai i Iuta ke a tia n nako Aikubita.

⁹ N na katuaaia n te kabuanib'ai ae moan te kamaamate, ao a na maaku kaain aonnaba ni kabane ngkana a ongo taekana. N na kairoroia kaain Iuta b'a a na nako abaia ianena, ike a na kamaraiaaki ma ni kamamaaeaki iai.

¹⁰ A na oreaki n taiani buaka ma te baki ao taian aoraki, ni karokoa a mauna nako man te aba are I anganiia aia bakatibu.