Ieremia 21 - Te B'aib'ara

E Na Buakana Ierutarem Te UEA

¹ Ao e kananako wetean Batura are natin Marekia ao te ibonga are arana Teb'ania are natin Maateia te mm'aane te Uea are Tetekia. are uean Iuta. Ao i mwiina, e tuangai b'a N na tuangiia ni kaangai, “Ko na taetae ma Ieremia i buku.” Ma ngaia are a roko irou ao a taku,

² “E a tia uean B'aburon are Nebukaneta i B'aburon ao ni buakana Iuta. I butiiko b'a ko na butiia te UEA b'a e na karaoa te kakai i bukiia ara aomata, n aron are e karaoia naba ngkoa rimoa, b'a e aonga n nako ni kiitaniira Nebukaneta.”

³ Ao I tuangiia are E tuangai te UEA ae Atuan Iteraera b'a N na taetae nakon te Uea are Tetekia:

⁴ A katobibiia Ierutarem kaain B'aburon ao a tangiria n tiringko ma am aomata. Ko butiai b'a N na kamaiuko, ma ko a tia ni kaunai.

⁵ Ma ngaia are, N na arora baiu ae e korakora ni buakaniko ni bon ti Ngai. A kamanenai taian kainiwai ao kabaang am taani buaka ni buakaniia kaain B'aburon, ma N na karaoa ami b'ainibuaka b'a a na manga bon buakaningkami.

⁶ N na kanakoa te aoraki ae moan te kakamaaku ma e na tiringiia aomata aika a m'aiti ao maan nako i Ierutarem, ao e na akea te b'ai teuana ae e na tiku ae e na konaa ni kanaki.

⁷ Ao n te kabanea n tai, N na kariaia Nebukaneta ma ana taanga ni buaka b'a a na buaka n niniia nako i Ierutarem ma ni kataenikaiia ni kabane taian nikira ni maiu iai, n reitaki ma ngkoe ao am mataniwi nako. Ma e na bon aki konaa n nanoanga Nebukaneta ke n akoa naba temanna—ane e na tiringko! Bon aei au taeka Ngai ae te UEA.

⁸ Ao i mwiina, I tuangiia te b'ai are E taekinna te UEA: Kaain Ierutarem, boni Ngai ae te UEA ae I anganingkami b'a kam na rinea are kam tangiria b'a te maiu ke te mate.

⁹ A tia kaain B'aburon ni katobibia Ierutarem, ma ngaia are, ngkana kam kani maiu ao kam na otinako nako ia n taenikai irouia. Ma ngkana kam tangiria ni mate n te baki, ke te aoraki, ke te buaka, ao kam na tiku ikai i nanon te kaawa.

¹⁰ I a tia n baaireia b'a N na aki kamaiuia Ierutarem. Ma N na kariaia uean B'aburon b'a e na kabuokia ni kamannangnga. Bon aio au taeka Ngai ae te UEA.

Ana Kauring Te UEA Nakoia Uean Iuta

¹¹ Kam na kakauongo raoi, ngkami aika kaain te utu n uea.

¹² Kam riai ni kakoaua raoi b'a kam karaoa te motikitaeka ae eti ni katoa te bong ae e boou, ma ni kamaiuia akana a tia ni kimoaaki. b'a i mwiina ao e na rikirake uran unu kaanga te ai ae e aki konaa n tiringaki.

¹³ Ierutarem, ko taratara nako mai aon tabukin te maunga n taraa aon taian m'arua ao ko taku b'a ko mano. Ma I un Ngai ae te UEA,

¹⁴ ao N na katuaaeko n aron ae ko riai n anganaki. N na kauraa am bareti ao a na bane n urarake b'aai nako akana i rarikim.