Ieremia 2 - Te B'aib'ara

Aia Aki Kakaonimaki Kaain Iteraera

¹ E tuangai te UEA b'a

² n na nako Ierutarem ma n tuangiia aomata nako te b'ai are E a tia n taekinna: Kam tangirai ngkoa ngke kam moan riki b'a au kabae ao kam irai i nanon te rereua ae akea kaina.

³ Bon ti ngkami au b'ai, kaanga moan m'akoron te tai, ao I rangi ni katuaaia koraki aika a karaoa ae e aki raoiroi nako imi.

⁴ Ongora irou Iteraera,

⁵ ao N na taetae Ngai ae te UEA. I aki roko n te karaoa ae e buakaka nako ia ami bakatibu, ma a kiitanai ao a riki n aki manena ngke a iriia bouananti aika akea manenaia.

⁶ A rawa ami bakatibu ni buubutiai buokaia, e ngae ngke I a tia i kamaiuia mai Aikubita ma ni kairiia i nanon te rereua ae e kamaamate ae akea kain aona, ike akea ae maeka iai ke ni kataia ni m'ananga i nanona.

⁷ I uotingkami nako ikai nako abau, ike e tiraua te am'arake iai, ma kam kabuakaka te aba n ami bure.

⁸ A aki kan ataai taian ibonga ake a reireiniia aomata au tua nako. A kakaitaraai ami taani kairiiri; ao ami burabeti a tataekina ana taeka B'aara ao a taromauriia atua ni kewe.

E Bukiniia Ana Aomata Te UEA

⁹ N na kateingkami n te boowi ao ni bukiningkami ma ami kariki

¹⁰ n te bure ae akea te botannaomata teuana ae e a tia ni karaoia mangkoa. Kam na ti titirakiniia aomata nako, n taabo nako, man rereuan nako mainiku nakon taian abam'akoro ake i maeao.

¹¹ ao ane kam na nooria b'a bon akea te botannaomata ae e a tia ni kiitana antina e ngae ngke tiaki atua ni koaua. Bon ti Ngai te Atua ni koaua ae E mimitong, ao kam a tia ni katinanikuai i bukin taromaurian taian bouananti.

¹² Kam na tuangiia taiani karawa b'a a na ruru ni maaku!

¹³ Kam a tia ni bure ngkami aika au aomata ni b'aai aika uoua kam a tia ni katinanikuai, Ngai ae Nen te ran ni kamaiu ao kam kataia n itiia ami ran n taian ni ne n ran aika tabwenaua aika a raran aika a kekenaki i nanon te tano.

¹⁴ Kaain Iteraera, kam aki bungiaki b'a tooro ngkami; ma kam a anaaki b'a taenikai.

¹⁵ A bekorara ami kairiribai kaanga raian ao a urua te aba; a wene n urarake kaawa ma akea kaaia.

¹⁶ A a tia tautian kaawan Aikubita ma Membiti ao Tabaneti n urua tab'anoum.

¹⁷ Bon am bure! Ko katoka iriiraku, Ngai ae te UEA ae te Atua,

¹⁸ kam onimakina m'aakan Aikubita ao Aturia.

¹⁹ Ane a na katuaeko am bure, b'a bon te bure ae moan te buakaka b'a kam kiitanai ao kam aki roko n te maaka te rekenikai. Bon aei Au taeka Ngai ae te UEA ae Moan te M'aaka.

²⁰ Kam kiitanai n taai ake ngkoa ao kam urui taiani kabae ni kabane ake i marenara, kam rawa n riki b'a Au taani m'akuri. Ao ngkai kam a taromaurii anti tabem'aang n aromi ni wene ni bure i aon taian tabuki ke i aan nuuni kaai aika a korakora.

²¹ Bon te kureebe ngkoa ngkami aika kam rineaki, ma ngkai a akea te b'ai ae e na reke iroumi ma ai ti taian kureebe aika a uarereke aika a buakaka.

E Bareka Iteraera N Te Bure

²² E taku te UEA: Kaain Iteraera, kam a barekareka n te bure, ao akea te toobu ke te b'ai ni kanakomemea ae e konaa ni kanakoa.

²³ Kam kakewei ami bure ao kam taku, “Ti itiaki. ti aki taromauria B'aara.” Ma kam na iangoa te b'ai ae kam karaoia n te M'arua are Innom. Ao kam biriaitua kaanga kaamero aika ataei, ni kawaekoaingkami n taromauria te bouananti teuana i mwiin teuana.

²⁴ Bon te aati te aine ngkami are e ikeikena angin te rereua, are e tangiria ni wene ni bure ma temanna n aki akaaka. Kam rangi ni kai reke!

²⁵ A a mangaingai ami kauniwae, e a m'autakataka buami man te biriaitua n aki akaaka i bukin taromauriakiia antiia aika ianena. Ao I takaarua ni kaangai, “Katokia!” ma kam kaeka ni kaangai, “Ti aki! Ti rangi n tangiri taian anti aikai.”

²⁶ Kam rangi ni kamaamaaeaki riki ngkami ma ami taani kairiiri nako ia aomata aika a kimoatoo kam taromauri bouananti aika atiibu ao boua aika a tabu

²⁷ ngkoe ma am uea, am ibonga ma am burabeti b'a kaanga ai aron ae ngaiia ngkoa aika a karikingkami ma n anganingkami te maiu. Kam katinanikuai ma ngkana kam reke n te kangaanga, ao kam tang nako iu i bukin buokami.

²⁸ Naako taang nakon antimi ake kam karaoi! Tao a bon tau m'aitiia ni kamaiungkami, b'a are a rangi n rawa antin Iuta n ai aron m'aitin kaawana nako.

Kaaitaraan Te UEA Iroun Iteraera

²⁹ E taku te UEA: Kam kabuakakaai n taku b'a I aki kamaiungkami, ao kam aki noora aromi ni kakaitaraai.

³⁰ I kataia ni katuaaingkami, ma kam rawa n oki nako iu, ao kam tiringiia au burabeti kanga aroia raian aika a tiritiri.

³¹ Ao ngkai kam na ongo nakon te b'ai ae I taekinna! Iai te tai ae I kiitaningkami iai i nanon te rereua ke I katobibingkami n te rootongitong? Bon au aomata ngkami, ao i rarikin anne kam a tia ni kaangai nako iu, “Ti na karaoa te b'ai ae ti tangiria, ao ti rawa n taromauriko!”

³² E aki konaa n ae na m'aninga ni katoka i aona te b'ai ni katikiraoi ngkana e na nako ni mare te aine ae na mareaki, ma ngkami kam a tia ni m'aninga taekau n te bong teuana ma teuana.

³³ Kam rangi ni wanawana ngkana kam kakaaia ami tangira n te aro are kam konaa n anga ami reirei nakon te aine ae ainen matawa.

³⁴ Kam tiringiia aomata aika akea aia bure n akea bukina raoi. Ao e ngae ngke a konaa n nooraki raraaia i aon ami kunnikai,

³⁵ Kam taku b'a akea ami bure, ao kam tangiria b'a N na aki un iroumi. Ma ngaia are, N na kateingkami n te kabowi, ao ti a nooria b'a antai ae e eti.

³⁶ Ngke a kab'akaingkami kaain Aturia, ao kam biri nako Aikubita, ma e aki reke buokami ikekei,

³⁷ ao kam na katukaki ma te nanokawaki ae moan te korakora. N na aki karekea buokam mairouia aika ko onimakiniia.