Ieremia 13 - Te B'aib'ara

Ana Kawaerake Ieremia Aika A kororo

¹ E taku te UEA nako iu, “Ko na nako ni kabooa am kawaerake te kororo. Ao ko na karinna ni b'ainna n te tai ae e uarereke, ma ko na aki uatiia.”

² Ma ngaia are, I kabooa au kawaerake te kororo arei ao I karinna i aou.

³ Ao E taku te UEA nako iu.

⁴ “Buuta am kawaerake te kororo. Ao naako nakon Baara ao ko na karabaa am kawaerake te kororo ni b'angab'angan taiani b'a aika a buubura.”

⁵ Ao anne te b'ai are I karaoia.

⁶ Ao tabeua te tai i mwiina, ao e taku te UEA nako iu, “Ko na nako n oki n anaa am kawaerake te kororo.”

⁷ Ao I oki n anaa au kawaerake te kororo man te tabo are I karabaa iai, ma e a mka, ao e a buakaka te kawaerake arei.

⁸ E taku te UEA nako iu:

⁹ Ieremia, N na kamanenaa B'aburon ni kamaunaa aia kainikatonga kaain Iuta ao kaain Ierutarem iai.

¹⁰ A buakaka kaain Iuta ao a taningabono. Ma ngaia are, ngkai a aki kakauongo i Rou, ma a karaoi b'aai aika a bon tangiria, ao a bon taromauri naba anti tabem'aang. Ngkana e tia te b'ai ae N na karaoia nako ia aomata aikai, ao a na riki b'a te b'ai ae akea manenana, a na riki b'a kaanga te kawaerake te kororo aei.

¹¹ E rangi n nim ni matoa te kawaerake aei i aon koream, ao bon anne arou n taua taian abanuea aika Iteraera ma Iuta. I tangiria b'a a na riki b'a au aomata. I tangiria b'a a na riki b'a aomata aika a tanoata taekaia, n te aro b'a a aonga n neboai ma ni karineai botannaomata ake tabeua, ma a rawa n ongotaeka i Rou.

Te Tiaeki Ni Wain E taku te UEA:

¹² Ieremia, tuangiia kaain Iuta ni kaangai, “E anga ana taeka te UEA ae Atuaia Iteraera b'a kam na kanoai ami tiaeki ni wain n taian wain.” A a taku, “Eng ti na kanoai ara tiaeki ni wain n taian wain! E aera ngkai ko na tuangiira te b'ai ae ti a kaman ataia?”

¹³ Ao i mwiina, e taku nako ia: Bon te UEA Ngai, ao te b'ai ae N nang karaoia bon te b'ai ae e na karikiia kaain Iuta ma Ierutarem b'a aomata aika a onrake n te wain. Aika a na rangi ni buakaka riki mai buakoia bon taian uea ake kanoan Tawita ao ibonga ma burabeti.

¹⁴ Ao N na kaaioroia i bon irouia kaanga taian tiaeki. N na bon aki nanoangaa ae e uarereke ma ae a kara, a na bane n tiringaki. Bon aei au taeka Ngai ae te UEA.

A Na Uotaki Nako Kaain Iuta

¹⁵ Kaain Iuta, ko na aki rangi ni kainikatonga ngkana ko ongora nakon te b'ai ae e taekinna te UEA.

¹⁶ Ko kaantaningaa te oota, ma e na kanakoa te roo te UEA. E a kaman mena nuun te tairiki i aon taian tabuki. Ma ngaia are, kam na oki nakon te Atua ao kam na kaoti ami bure nakoina i m'aain ae a bae waemi ma ni b'aka.

¹⁷ Ngkana kam rangi ni kamoamoa ni kakauongo, ao N na tanginiwenei n ti Ngai. A na raanga nako rannimata mai matau ngkana a uotaki nako ana aomata te UEA b'a taenikai.

¹⁸ E tuangai te UEA b'a N na tuangko b'a a na riai n anga aia kaintokanuea ami uea ma tinana ao ni kanakoi aia baunuea.

¹⁹ A a katobibiaki kaawan nako Rereuan Maiaki; ao bon akea temanna ae e kona n rin ke n otinako. A na uotaki nako kaain Iuta ni kabane.

²⁰ Ierutarem, ko tautaekaniia kaain Iuta ma te kainikatonga ae moan te korakora. Ma a ngaa ngkai?

²¹ Kam onimakiniia ngkoa n te tai teuana b'a a na buokingkami ma ngkai N na karaoia b'a a na tautaekaningkami. Tera ami taeka i bukin anne? Kam na maraki kaanga te aine ae e ariri ni bung.

²² Kam ataia b'a aera ngkai a raeraeaki ami kunnikai ao ma ni kabuakakaki? B'a bon i bukin ami bure aika a rangi ni buakaka.

²³ Kam aki konaa ni bitaki ni karaoa ae e raoiroi? A konaa aomata ni bita kuniia, ke e konaa ni kanakoi matamatan kunin te reb'ari? Ngkana e konaa, ao tao kam na konaa naba ni bitaki ao n reireiningkami karaoan ae e raoiroi.

²⁴ N na kamaaenakoingkami, kaanga aron angin te rereua ngkana e uka nako kunin te uita ni kakibarakea nako eta.

²⁵ N na bon aki bita nanou. Bon aio au taeka Ngai ae te UEA. Kam katinanikuai ao kam taromauriia anti ni kewe.

²⁶ Kam mareaki ma Ngai, ma kam aki kakaonimaki. Kam riki naba b'a ainen mataawa n aromi n taromauri anti aika a ribaaki i aon taian tabuki ma tawaana.

²⁷ N na buuta kunnikaimi ma ni kabebekaningkami ao ni kamamaaingkami b'a a na nooringkami aomata nako. Kam a reke n te kabuanib'ai! Kam konaa ni karaoa ae e raoiroi ni manga taromauriai riki?