Ieremia 12 - Te B'aib'ara

Ngurenguren Ieremia Nakon Te UEA

¹ Ngkana I ngurengure nakoim te UEA Ko bon karaoa ae e raoiroi n taai nako. Ma iai au titiraki n te tai aei i bukin te motikitaeka ae eti. E aera ngkai a maiu raoi aomata aika taani bure? E aera ngkai e naanako raoi aia waaki?

² Ko unikia kaanga aroka; ao Ko kariaia b'a a na maiu raoi ma ni kariki uaa. Ao ngkana a neboiko ao bon akea nanoia iai.

³ Ma ko ataia te UEA, b'a e kaanga ngkoa aron au kakaonimaki, e ngae naba ngkana bon inanou. Ma ngaia are, Ko na katikitikiia nako au kairiribai ma n tiringnga kaanga te tiibu!

⁴ A na maanra riki te tai ae e na tiku iai te tano ni m'auteretere ao ni b'atakataka taabo n uteute? Ane a na mate mannikiba ma maan nako ao a aki manga oki. Ao a bane n riki baikai ni kabane i bukin aia bure Iteraera. A boni kakaniko naba ni kaangai, “E aki noora te bure ae ti karaoia te Atua.”

Ana Kaeka Te UEA Nakon Ieremia

⁵ Ieremia, ngkana ko a kua ni kabo birim'aaka ma aomata, ao ko nang kangaa riki ni kabo birim'aaka ma taian aoti? Ngkana ko b'aka i nanon taabo aika a katawanang, ao tera ngkanne te b'ai ae e na riki nakon te buakonikai are i mataniwiin te Karaanga are te Ioretan?

⁶ E ngae naba ngkana bon am koraki ane a na manga kaaitarako. A na taraa n ae bon taian rao ni koaua ma ko na aki onimakiniia. Bon bukin m'anangaia b'a a na kam'aneko, ao ai aroia aomata ni kabane.

Marakin Nanon Te UEA Irouia Ana Aomata

⁷ I tangiriia Au aomata ao I rineia b'a bon Au b'ai ni koaua. Ma ngkai N nang katinanikuia ma n anga ngaiia nako ia aia kairiribai nako.

⁸ A manga rairaki ni kaaitaraai Au aomata ao a bekorara nako iu kaanga raian. Bon anne te b'ai ae I ribaia.

⁹ Ti te bo au aomata ma kaanga te aoki ae e otab'aniniaki ma ni buakanaki irouia taian aoki ake tekorakina. Tuangiia maan aika a aki manana b'a a na roko ni katoka nanoia n am'arake.

¹⁰ E a urubekebeke abau ae moan te tamaroa kaanga te tawaana ke te nne n aroka ni kureebe ae e kamanatuaaki irouia te nanai n tiibu ma ni kaboraaki aona irouia te nanai ni kao.

¹¹ A bane n akea kain taian tawaana aika I noori ao akea temanna ae e tabe iai.

¹² A m'ananga n te kawai are e ri rarikin mataniwiin te rereua tautia ake taan tiritiri ao a buaka n taabo nako. Bon au kabaang ngaiia aika a tiritiri; ao bon akea temanna ae e konaa ni maiu irouia.

¹³ Au aomata, kam unika te uita, ma kam boboti taian uteute; a tia ni m'akuri korakora, ma bon akea ae a karekea. I bukin uniu ae korakora ao a mate aia ununiki!

Ana berita te UEA nako ia raon Iteraera.

¹⁴ E taku te UEA, “Bon iai te b'ai ae N na taekinna nako ia raon Iteraera ake a tia ni kurib'aia te aba ake I a tia n anganiia Iteraera. I anga te aba aei nako ia au aomata, ma e a otab'aniniaki irouia kairiribai ma ni buakanaki ma ni kurib'aiaki. Ma ngaia ae, N na koutiia nako man abaia n aron naba ngkoa are I karaoia nako ia kaain Iuta mai abaia.

¹⁵ Ma N na manga nanoangaiia botannaomata aikai n te tai teuana ma ni manga kaokiia nako oin abaia nako.

¹⁶ A reireiniia au aomata ngkoa aron taromaurian B'aara. Ma ngkana a kakoaua b'a bon te Atua ni koaua Ngai, ao ngkana a kariaia au aomata b'a a na reireinaki irouia aron taromauriau, ao a na manga riki botannaomata aikai b'a Au aomata.

¹⁷ Ma ngkana a aki kan ongo i Rou, N na koutiia nako man abaia ma n tiringiia ni kabane. Bon aio au taeka Ngai ae te UEA.