Iakobo 4 - Te B'aib'ara

Te I-Raorao ma te Aonnaba

¹ A riki maia taiani buaka, ao a riki maia taian un i buakomi? Tiaki a riki man naano n aonnaba aika kume ni buaka i nanoni b'ain rab'atami?

² Kam tangiri b'aai, ao a aki reke iroumi; ma ngaia ae kam kamateia aomata. Kam bakantang, ao a aki kona n reke ami b'ai, ma ngaia ae kam un ao kam buaka. A aki reke ami b'ai b'a kioina ngkai kam aki bubuti.

³ Kam bubuti, ao kam aki anganaki, b'a kioina ngkai kam bubuti n te aro ae aki riai, b'a kam na bakataei ami b'ai i bukin nanomi aika naano n aonnaba.

⁴ Ngkami aika kanga ainenum'a aika taani wene ni bure, kam aki ataia b'a te iraorao ma b'ain te maiu aei bon ribaan te Atua? Ma ngaia aei, b'a ane kan i raorao ma b'ain te maiu aei, ao e riki b'a ana kairiribai te Atua.

⁵ Kam taku b'a akea manenan ana taeka te B'aib'ara are kaangai, “E rangi ni korakora nanon te Tamnei n tangirira, are E kamaekaa te Atua i nanora.

⁶ Ma E kabatia te akoi n anga; ao anne bukin are e kaangai te B'aib'ara.” “E rawa nakoia akana kainikatonga te Atua; Ma E angania akana nanorinano te akoaki.”

⁷ Ma ngaia ae kam na irira nanon te Atua; ao kam na rarawa nakon te riaboro, ao ane e na biri nako mai roumi iai.

⁸ Kam na kaania te Atua, ao ane E na kaaningkami. Kam na kaitiaki baimi, ngkami aika taani bure; ao kam na kaitiaki nanomi, ngkami akana kam nanououa.

⁹ Kam bon riai n nanokawaki ma n tang ni korakai. Ke e oneaki ngarengaremi nakon te tang ni korakai, ao ami kim'areirei nakon te mata ni kananoanga.

¹⁰ Kam na nanorinano i matan te Uea, ao ane E na karietataingkami.

Motikan Taekaia Tem'angina

¹¹ Taari, kam na tai kabuakaka. Ane kabuakaka tarina, ke ane motika taekan tarina, ao e kabuakaka te Tua, ke e motika taekan te Tua; ngkana ko motika taekan te Tua, ao tiaki te tia toua mwin te Tua ngkoe, ma bon te tia motiki-taeka iai ngkoe.

¹² Ti temanna te tia karaoa te Tua, ao te tia motiki-taeka, ae e kona te kakamaiu ma te kamamate; ma antai ngkoe ngkai ko motika taekan raom?

E na Tarataraia te Aomata b'a E na Aki Kamoamoa

¹³ Ongora ngkai, ngkami akana kam kaangai, “N te bong aei ke ningabong, ao ti na nako n te kaawa arei b'a ti na tiku iai teuana te ririki ni wakina ara bitineti iai, ao ti na karekei rakan ara b'ai.”

¹⁴ Ao kam bon aki ataia b'a tera aroni maiumi ningabong. B'a kanga ai aron te mabubu ngkami, ae kaoti teutana ao rimwi e mauna.

¹⁵ Ma te bae kam riai n atongnga, e kaangai, “Ngkana nanon te Uea, ao ti na maiu, ao ti na karaoa te baei ke te baerei.”

¹⁶ Ma ngkai, kam kamoamoaingkami n ami kainikatonga. Kamoamoa ni kabane aika ai aron aikai a bane ni bubuaka.

¹⁷ Ma ngaia aei, b'a ane ata aroni karaoan ae riai, ma n aki karaoia, ao e boni bure iai.