Etita 6 - Te B'aib'ara

Karinean Moretekai iroun te Uea.

¹ Ao e aki reke matuun te uea n te tairiki arei. Ma ngaia are, e tuatua b'a a na uotaki bokin te tautaeka aika a kakaawaki nakoina, ao a warekaki nakoina.

² Ao ngke e warekaki te m'akoro are e mena iai taekan Moretekai ngke e kaota iangoan tiringakin te uea, are a baaireia Biketan ma Tereti, ake iunaki ake taani kaawakina ana ru te uea,

³ ao e titiraki te uea, ao e taku, Tera ngkoa karinean, ao kaniwangan Moretekai ae ti karaoia i bukin ana m'akuri aei? Ao a taku ana toro, Bon akea te b'ai ae e karaoaki nakoina.

⁴ Ao n te tai aei, ao e a tia n rin Aaman b'a e na butia te uea b'a e na kabaeaki roroan Moretekai i aon te kainikabaeroroa are e a tauraoi.

⁵ Ma ngaia are, e taku te toro nakon te uea, E a roko Aaman b'a e na kawariko. Ao e taku te uea, Karinna.

⁶ Ma ngaia are, e a rin Aaman, ao e taku te uea nakoina, Boni iai te aomata temanna ae I tangiria n anganna te karineaki ae e ab'ab'aki, ma ngaia are, tera ngkai ae N na karaoia nakon te aomata aei? Ao e taku Aaman i nanona, Antai te aomata ae e rangi n tangiria te uea b'a e na karinea? I taku b'a boni ngai.

⁷ Ma ngaia are, e taku nakon te uea,

⁸ Angan te aomata anne taian niiniira n uea, niiniira ake ko kukunnikainiko iai. Ao anganna naba am aoti b'a e na toka i aona, ao am baunuea are e tikiraoi.

⁹ Ao i mwiina, ko tuanga temanna am aomata ae e rangi ni kakannato, b'a e na karin niiniiraia b'aakuaku aikai i aon te aomata anne ma, ni kairiia ni katokaa i aon te aoti, ao ni kairiia nako nuukan te kaawa. Ao tuanga te aomata are e kakannato arei, b'a e na takaarua ni kaangai, Ani bon taraa aron te uea ni karinea te aomata ae e kukurei i rouna.

¹⁰ Ao e taku te uea nakon Aaman, Kawaekoako anai niiniira ni b'aakuaku ma te aoti, ao katauraoi baikanne i bukin Moretekai are te I-Iutaia. Karaoi b'aai ni kabane nakoina n aron are ko a tia n taekinna. Naako nooria i mataroan te bareti.

¹¹ Ma ngaia are, e anai niiniiraia b'aakuaku Aaman ma te aoti, ao e angan Moretekai. Ao e toka Moretekai i aon te aoti ao e kunnikainna n niiniiran te b'aakuaku, ao e kairaki iroun Aaman i nuukan te kaawa, ma ni kakatanoata n kaangai nakoia aomata ngke a tabe ni m'ananga, “Ani bon taraa aron te uea ni karinea te aomata ae e kukurei i rouna.”

¹² Ao e a manga okira te bareti Moretekai, ao Aaman e kawaekoa n okira ana auti, ao e karabai matana ni baina b'a e mamaa.

¹³ Ao e tuanga buuna ma raoraona te b'ai are e riki nakoina. Ao a taku raoraona ma buuna nakoina, Bon te Iutaia Morotekai ao e tabe n anaa korakoram, ao ko bon aki kona n tokanikai i aona. E na boni konako.

Tiringakin Aaman.

¹⁴ Ao ngke a bon tabe n taetae, ao e roko iunakin te bareti temanna n anaa Aaman ma te kawaekoa nakon ana baka n am'arake Nei Etita.