Etira 3 - Te B'aib'ara

Te Moan Angab'ai N te Baonikarea Ae E Boou

¹ I nanon te kaitiua n nam'akaina n te ririki, ao a m'ananga nako Ierutarem Iteraera ake a tia n tekateka n aia kaawa nako.

² Ao ibonga ake Iotua are natin Iotataka te m'aane ao Terub'abera are natin Tearetiera te m'aane, ao ana koraki nako a manga karaoa te baonikarea i bukin Atuan Iteraera. B'a a aonga ni manga konaa iai n anga aia karea ikekei ma n iri taiani kaetieti n aron are e a tia n anga te Atua nakon Moote.

³ Ao a karaoa te baonikarea n te tabo are e bon tei iai mai m'aaina, e ngae ngke a maakuia aomata ake a kaman maeka ikekei i rarikiia. Ao i mwiina, a katoa ingabong ao tairiki ni kabuoki taiani karea ma angab'ai nakon te UEA.

⁴ Aomata a irii tuua i bukin kauringaan te Toa ae M'anganikaai, ao a anga taiani karea aika a tangiraki ni katoa bong.

⁵ A anga taiani karea i bukin kakukureian te UEA, ake karea ni katoa te Toa ae Moan Otin Nam'akaina ma taiani karea ake nikiran nako ana toa te UEA. A bane taian angab'ai ake a uoti aomata n anganaki te UEA.

⁶ E ngae ngke e tuai waaki te m'akuri i aon te Tembora, ma e boni waakinaki te angakarea i aon ana baonikarea te UEA ni moani bongin te kaitiua n nam'akaina n te ririki arei.

Manga Katean te Tembora

⁷ E a tia n taku ngkoa uean Botia are Tairati, b'a a konaa Iteraera n anai taian kai ake tiira mai Reb'anon ni karokoa Ioba ni katiki ri taari. Ma ngaia are, a kanakoi taiani uita, wain, ao b'aan te oriwa nakoni kaawa aika a buubura ake Turo ao Titon b'a boon kaai, ao a anga taiani m'ane nako ia taani m'akuri n te atiibu ao taani kabenta.

⁸ I nanon te kauoua n nam'akaina n te kauoua n ririki i mwiin okiia aomata mai B'aburon, ao a moana manga karaoan ana Tembora te UEA. A moana m'akuriia Terub'abera are natin Tearetiera te m'aane, Iotua are natin Tatoka te m'aane, ibonga, kanoan Rewi, ao aomata ni kabane ake a oki. Ni kabane kanoan Rewi ake a raka aia ririki ni maiu i aon uabwi, a anganaki tib'angaia tararuakin tabeua m'akoron te m'akuri.

⁹ Ao kanoan Rewi ake a tararua te m'akuri ni kabane bon Iotua ma natina m'aane, ana koraki, ao Katemiera ma natina m'aane man te utu are Otawia. Ao e m'akuri naba ma ngaiia ana utu Enatata.

¹⁰ Ngke e a bane kawenean aan te Tembora irouia taani kateitei, ao a karin niniiraia n ibonga taian ibonga ao a katang taiani bu b'a karinean te UEA, ngke a tabe n anene kanoan Rewi ake man ana utu Ataba n neboa te Atua n taian timbara. A bane aomata n irii taiani kaetieti man ririki aika a b'aka nako ake mairoun Tawita are te uea.

¹¹ A neboa te UEA, ao a anga aia kaaitau n aia anene tekorakina i mwiin tekorakina: E raoiroi te UEA, E teimatoa n aki toki Ana tangira nakon Iteraera. Ao a bane n takaarua aomata ni kabane ma n neboneboa te UEA i bukina ngkai e a moanaki te m'akuri i aon aan te Tembora.

¹² Ao a tang n takaarua ibonga ake a kara, ao kanoan Rewi, ao atuun taian utu nako i bukina ngke a uringa taraan ngkoa te moan Tembora n ririki ake ngkoa. Ma a rangi ni kukurei tekorakina n te aro are a bukamarua te bootaki ma b'anaaia aika a bane takaaruaia.

¹³ Ao e a rangi ni karongoaa tangiia ma takaaruaia n te aro are kaanga ai ti teuana b'anaaia, ao e a konaa n ongo te aba man te tabo are e raroa nako.