Etekiera 5 - Te B'aib'ara

Rokon Uruakan Ierutarem E taku te UEA:

¹ Etekiera, ae natin te aomata, anaa te kabaang ae e kakang ao kamanenaa ni korea iai iram ma buaim. Tauu rawaawatan iram ao tib'aia nakon tenua te b'ariko aika a booraoi buuburaia.

² Ngkana ko tia ni buakana te buriki are e tei i bukin Ierutarem, ko na kauraa te b'ariko teuana are iram i aon te buriki. Ko na korokorea te kauoua ni b'ariko ao kab'akab'aka m'akorokoron nako iram ni katobibia te buriki. Ko na karenakoa te katenua ni b'ariko i nanon te ang, ao N na oroia n oin Au kabaang.

³ Taui tabeua iram ao niiri i nanon rabin am kunnikai.

⁴ Ao i mwiina, ko na buuti tabeua taian ira ao karenakoi nako nanon te ai, b'a a na bue. Aio te ai are e na rakanako, ni kamaunaia kaain Ierutarem ni kabane.

⁵ Bon te UEA ae te Atua Ngai, ao I a tia ni karaoa Ierutarem b'a te tabo ae te kabanea ni kakannato n te aonnaba, ao a na bane ni mimiakinna botannaomata nako.

⁶ Ma a kakaitaraai kaain Ierutarem ao a rawa n ongotaeka irou. A katinanikuia au tua nako ao a tia n korakora riki aia bure nakoia botannaomata nako akana i rarikina.

⁷ Ma ngaia are, ko na tuangiia kaain Ierutarem ni kaangai: Bon te UEA Ngai ae te Atua! Kam a tia n rawa n ongotaeka nakon au Tua nako ma Au taeka n reirei nako, ma kam a manga ongotaeka nakon aia tua nako botannaomata akana i rarikim. Kam a tia n rangi ni kamangao riki nakoia! Bon te UEA Ngai ae te Atua! Kam a tia n rawa n ongotaeka nakon au tua nako ma au taeka n reirei, ma kam ongotaeka riki nakon aia tua botannaomata akana i rarikimi nako. Kam a tia n rangi ni kamangao riki nakoia!

⁸ Ngkai a na mataku botannaomata aikai ngkana I a kaaitaraingkami ni katuaaingkami

⁹ i bukin ami bure. N na katuaaingkami n te tuua ae I tuai man kaakaraoia mangkoa ao te tuua naba ae N na aki manga karaoia riki rimwi.

¹⁰ A na rangi ni kainanoa kanaia kaaro ma tiina n te aro are a na bon kang natiia, ao naati ana kana tamaia ma tinaia. Ao koraki akana a reke maiuia man te b'ai ae e kakamaaku aei a kamaaeaki nako n aki akaaka.

¹¹ E a tia ami bure aika a rangi n ribaaki ni karika au Tembora b'a te tabo ae e aki tau i bukin taromauriakiu. Ma ngaia ae, I tuea i bon i Rou b'a N na tannako mairoumi ao N na aki manga nanoangaingkami.

¹² A na mate katenim'akoromi i nanon Ierutarem ikai n te aoraki ke te baki. Katenim'akoromi a na mate n te buaka. Ao N na kamaaenakoia kabanean katenim'akoromi n aki akaaka, ao i mwiina, N na manga rimwi ngkami n tiringkami.

¹³ Kam na namakina korakoran uniu ni karokoa tian raoi au karekekai. Ao i mwiin anne, kam na ataia b'a I un Ngai ae te UEA i bukin ami aki ongotaeka.

¹⁴ A na bane ni ngare aika a rirarikimi n te urub'ai ae e riki nakoimi. Ane a na kamamaaeingkami

¹⁵ botannaomata ianena ma ni b'ainingareingkami, ma a na bon tiaoki naba ao ni maaku n te b'ai are I karaoia n uniu.

¹⁶ N na urui arokami ni karokoa kam mate ni baki, ao e na oroingkami taiani kabuanib'ai kaanga taian kanoanikatebe.

¹⁷ A na tiringaki natimi n te baki ao irouia maan aika a aki manana. N na katuaaingkami n taian aoraki aika a kakamaaku, ao a na oroingkami kairiribai ni kab'akaingkami n aia kabaang. Bon aei au taeka Ngai ae te UEA.