Etekiera 48 - Te B'aib'ara

Tib'aakin Te Aba Nakoia Baronga Ake i Meaang E taku te UEA:

¹ A riai ni bane n reke tib'aia baronga nako n te m'akoro n aba are e biri man tian Iteraera maeao are mai mainiku nakon Taari are Mereterenian.

² Tian Iteraera are i meaang e na biri ri rarikin te kaawa are Eteron ao Rebo Amata,

³ ao e na toki Atara Enon, are e mena i aon te tia

⁴ i marenan taian abanuea ake Tamateko ao Amata.

⁵ A na reke abaia baronga n aron aei, mai meaang nako maiaki:

⁶ Taan, Atera, Nabetari,

⁷ Manate, Eberaim, Reuben, ao Iuta.

Te M'akoro N Aba Ae E Kaokoroaki E taku te UEA:

⁸ E na riki maiakin te aba are Iuta maiaki b'a te m'akoro n aba ae e kaokoroaki. E na riai n reke ab'akina ae 12.5 te miita, ao rababana e na biri man tian Iteraera maeao are i mainiku nakon Taari are Mereterenian. E na riai ni mena au Tembora n te m'akoro n aba aei.

⁹ Au b'ai nuukan te tabo aei. E na riai n 12 te kiromiita ab'akina ao 10 te kiromiita rababana.

¹⁰ Ngai ae te UEA ae I anga iteran abau are e tabu nakoia ibonga. Tibaia bon 12.5 te kiromiita ab'akina ao 5 te kiromiita rababana, ao e na mena raoi au Tembora i nuuka.

¹¹ Bon ti ibonga ake ana kariki Tatoka aika e na reke nakoia tib'angaia man te aba ae e tabu aei, i bukina ngke a teimatoa ni kakaonimaki nako iu ao angiia kanoan Rewi ma Iteraera a tia ni moana maiuakinan te bure.

¹² Te aba are aia b'ai ibonga boni ngaia te kabanea n tabo ae e tabu man taabo nako aika a tabu ao e na riai ni mena i maiakin te tabo are e b'ainaki irouia kanoan Rewi.

¹³ N anaa iteran te aba are e tabu nakoia kanoan Rewi. Bon 12.5 naba te kiromiita ab'akin abaia ao 5 te kiromiita rababana,

¹⁴ Ao a na bon aki kabooi nako ke n iokinib'aia te aba aei; boni ngaia te kabanea n raoiroi n aba ao bon aia b'ai.

¹⁵ Ao maiakin abau are e tabu e na riki b'a te m'akoro ae 12.5 te kiromiita ab'akina ao 3 te kiromiita rababana. E na bon aki tabu, ma e na b'ainaki irouia Iteraera ao e na reitaki naba te kaawa are Ierutarem, n reitaki naba ma autina nako ma ana tabo n uteute.

¹⁶ E na riai ni boraoi ab'akin ma raraban te kaawa, b'a 2 te kiromiita iterana teuana,

¹⁷ ao te tabo ae e uki ae 125 te miita rababana ni katobibia te kaawa.

¹⁸ A na riki b'a taian tabo n ununiki i bukiia aomatan Ierutarem aaba ake i mainikun ao maeaon nako tian te kaawa; a na riai ni kaai n reke 5 te kiromiita ab'akiia ao 3 te kiromiita rababaia.

¹⁹ A na unika te aba aomata man te kaawa, e aki akaaka b'a te baronga raa are e nako mai iai.

²⁰ Ao e na riki nuukan te aba ae e kaokoroaki aei b'a abau ae e tabu, ai uana naba ma te kaawa ma b'aina nako. E na riai n reke 12.5 te kiromiita ab'akina ma rababana n iterana nako.

²¹ E na b'ainaki aono ake i mainiku ao i maeao n te aba ae tikuea aei irouia taan tautaeka i Iteraera. E b'ainna naba ni biri rake nako mainikun te Karaanga are te Ioretan ao maeaon Taari are te Mereterenian. E na mena raoi abau ae e tabu ao ai uana naba ma au Tembora i nuukan raoi ana b'ai ma abana,

²² n reitaki ma te tib'anga are aia b'ai kanoan Rewi ao te kaawa are Ierutarem. E na b'ainaki tian meaangin aia b'ai taan tautaeka iroun Iuta, ao tiana maiaki e na b'ainaki iroun Beniamin.

Tib'aakin Te Aba Nakoia Baronga ake i Maiaki

²³ E na abanaki maiakin te m'akoro ae e kaokoro aei irouia nikiraia barongan Iteraera.

²⁴ A na bane taiani baronga n reke irouia m'akoron te aba

²⁵ are e biri man tian Iteraera are mai mainiku are i maeaon Taari are Mate.

²⁶ A na riai tib'aia te aba taian baronga n aron aei:

²⁷ Beniamin, Timeon, Itakara, Teburun, ao kata.

²⁸ Tian aban Kata are mai maiaki bon ti te bo naba ma tian aban Iteraera are mai maiaki. E na moa man te kaawa are Tama, ao i mwiina, e a manga biri ni wairio nakoaiaki nakon te koburake n ran are i rarikin Merib'ata Kateti. Ao e na manga reiti nako n iraanako tabwenan marenan maungan Aikubita ao e toki n Taari are Mate.

²⁹ Ai anne ngkanne aron tib'akin te aba are Iteraera i marenaia taiani baronga ake tengaun ma uabaronga. Bon aei Au taeka Ngai ae te UEA ae te Atua.

Mataroan Ierutarem E taku te UEA:

³⁰ E na riai n reke tebwi ma uoua mataroan te kaawa are Ierutarem,

³¹ A na aranaki taian mataroa aikai n araia barongan Iteraera ake tengaun ma uoman.

³² Mataroa ake Reuben, Iuta, ao Rewi a na mena mai meaang;

³³ Ioteb'a, Beniamin, ao Taan a na mena mai mainiku. Timeon, Itakara, ao Teburun, a na mena mai maiaki;

³⁴ Kata, Atera, ao Nabetari a na mena mai maeao. A na bane ni kaka uoua te kiromiita ab'akin iteran nako oon te kaawa,

³⁵ Ao aran te kaawa ae e boou bon “E mena ikai te UEA.”