Etekiera 46 - Te B'aib'ara

Tuua Tabeua I bukiia Taan Tautaeka Ao Aomata.

¹ E taku te UEA: E na riai ni kainiinaki mataroan te katawanang are i nanoaa, are mataroana are mai mainiku i nanon bongi ni m'akuri ake onobong n te wiiki koraki. Ma e na riai ni kaukaki n te Taabati ao n te Toa ae Moan Otin Nam'akaina.

² A na nako taan tautaeka man te katawanang are mai tinaniku nakon ruun te mataroa n rin n te mataroa aei ao a na tei i matan te mataroa ngkana a tabe ibonga n anga taiani karea i bukin te buubuti Au kakab'aia ao taian karea i bukin kakukureiau. E na riai ni boobaraaki te tia tautaeka ni kabooa matana ma te tano n taromauriai. Ao i mwiina, e na nako, ao e na tiku n uki te mataroa.

³ A na riai naba n roko Iteraera man te mataroa are mai mainiku ma n taromauriai ni katoa Taabati ao ni katoa te Toa ae Moan Otin Nam'akaina.

⁴ E na uoti onoman taian tiibuteteei ao temanna te tia tautaeka n te Taabati ma n anga b'a te karea are kakukureiau. A na riai n akea toabuakan maan aikai.

⁵ E na anga naba b'a raon te tiibu te m'aane, 9 te kirokuraem te uita, ao e konaa naba n anga ma te tiibu m'aane n tatabemaniia nako n aron are e taku b'a e bon tangiria. E na riai naba n anga 3 te riita b'aan te oriwa ni katoa 9 te kirokuraem te uita.

⁶ E na riai te tia tautaeka n uoti onoman te tiibu m'aane, te kaom'aane, ao te tiibu m'aane b'a e na kareanaki n te Toa ae Moan Otin Nam'akaina. A na riai n akea toabuakan maan aikai.

⁷ E raona te kaom'aane ma te tiibu te m'aane, n anga naba 9 te kirokuraem te uita, ao e konaa n anga ma taian tiibu m'aane aikai n tatabemaniia nako te b'ai are e bon tangiria n anga. E na riai naba n anga 3 te riita b'aan te oriwa ma 9 te kirokuraem te uita ni kabane.

⁸ E na riai n rin te tia tautaeka man ruun te kawai n rin are n te mataroa are i mainiku ao e na otinako naba mai ikanne.

⁹ Ngkana a roko n taromauriai Au aomata i nanon taian toa nako, a na riai n otinako n taai nako n te mataroa are e kaaitaraa ma are a rin mai iai: akana a rin mai meaang, a na otinako man te mataroa are i maiaki, ao akana a rin man te mataroa are maiaki, a na otinako man te mataroa are i meaang.

¹⁰ A na kaai n rin aia taan tautaeka n te tai naba are a rin iai ao a na otinako naba n te tai are a otinako iai.

¹¹ E na riai ni kareanaki 9 te kirokuraem te uita ma te kaom'aane, ao 9 te kirokuraem e na kareanaki ma te tiibum'aane. A konaa n anga taan taromauri te m'aiti n uita are a bon tangiria ni kaairaki ma te tiibu n tatabemaniia. E na kareanaki 3 te riita b'aan te oriwa ma 9 te kirokuraem te uita.

¹² Ngkana e anganano te tia tautaeka n te karea are kakukureiau ke te karea are te buubuti Au kakab'aia, ao e na kaukaki nakoina mataroan te katawanang are inanoa are mataroana are mai mainiku. E na anga te karea n aron are e karaoia naba ni katoa Taabati; ao i mwiina, e nako, ao e na kainaki te mataroa.

¹³ E na kaakareanaki te tiibuteteei ae ai tib'a teuana ana ririki ni maiu ae akea toabuakan rab'atana b'a te karea are kakukureiau.

¹⁴ Ao raona bon uoua te kirokuraem te buraawa ae e mte ao b'aan te oriwa are a na kareanaki b'a karea are te uita. E na aki bibitaki te tua

¹⁵ b'a e na kaakareanaki te tiibuteteei, te buraawa, ao b'aan te oriwa nako iu ni katoa ingabong n taai nako.

Tuan Abaia Taan Tautaeka

¹⁶ E taku te UEA: Ngkana arona b'a e anga abana temanna te tia tautaeka i Iteraera nakon natina temanna, ao e na riai n nakon natin te tia tautaeka anne b'a b'ain ana utu.

¹⁷ Ma ngkana e anga abana te tia tautaeka nakon temanna ana tia m'akuri, ao e na b'aina te aba anne te tia m'akuri anne ni karokoa Ririkin te Kaokib'ai ike e na manga kaokaki iai nakon te tia tautaeka.

¹⁸ E na aki riai te tia tautaeka ni kabuakakaia Au aomata n anaa te aba mairouia. E na riai ni bon oin abana te aba are e na anga nakon natina.

Taian Ruu ni kuuka Aika a Tabu

¹⁹ E a manga uotaki te m'aane are e kaota te Tembora nako iu, E a manga kairai ni kaokai nakon te katawanang are i nanoaa. Ti nakonako i maiakin te katawanang ao ti toki n te mataroa nakon taian ruu ake a tabu ake aia b'ai ibonga. E kaoti nako iu ruu riki tabeua ake mangeen te katawanang are mai maeao

²⁰ ao E taku, “Aikai taian ruu ni kuuka ike a na kaburoa iai te iriko ni man are a na anga ibonga b'a te karea are i bukin kaetan b'aai. A na kam'ai naba taian uita n taian ruu ni kuuka aikai. Aei are e a katoka te kangaanga are uotakin taian angab'ai aika a tabu ri nanon te katawanang are i tinaniku, b'a e kaawa n ae e a ti rina naba ni bo ma temanna n tiaki nanona, ao e na reke n te kangaanga.

²¹ Ti nako n oki nakon te katawanang are mai tinaniku ao ti rirarikin taiani koona ake aua.

²² Ao I noora te katawanang ae e uarereke ni katoa taian koona, aika 25 te miita ab'akina ao 15 te miita rababana n teuana.

²³ Ni katobibia nanon taian katawanang aikai bon te oo ae te atiibu ae e rinano, ao taian tabo ni kauraura aika a nim ma te oo.

²⁴ E taku te m'aane arei, “Aikai taian ruu ni kuuka ake a na kaburoaki iai taian iriko ake a anga taan taromauri b'a taian karea ake a kaburoaki irouia taan m'akuri n te Tembora.”