Etekiera 40 - Te B'aib'ara

Noorakin Tamnein Te Tembora Ae E Na Tei Rimwi Iroun Etekiera

¹ Boni katebwinan bongin te ririki ae e boou, are bon te kauabwi ma nimaua n ririki i mwiin anaakira b'a taenikai ngaira ao te katebwi ma aua n ririki i mwiin tauan Ierutarem. E niniai m'aakan te UEA n te bong anne, ao E kairai nako.

² I nanoni miiu E kairai te UEA nako abaia Iteraera ao e uotai nakon te maunga ae moan te rietaata. I noori i matau taian auti aika a m'aiti ae kaanga ai aron te kaawa ae e buubura.

³ E uotai ni kaaniai riki ao I noora te m'aane ae e raitiiti kaanga te buraonti ae e karaneaneaaki. E tei te aomata arei i rarikin teuana mai buakon taian mataroa ao e taua baairean te anaanau ni baina are teuana ao te kai ni baina are teaina.

⁴ E taku te m'aane arei, “Etekiera, ae natin te aomata, karekea raoi matam ni b'aai nako aika N na kaoti nakoim, bon anne bukina ngkai ko kairaki nako ikai. Kakauongo raoi, i bukina b'a ko na manga tuangiia aomata te b'ai ae ko nooria.

Te Mataroa Are i Mainiku

⁵ Te moan b'ai are I nooria bon te oo are mai tinaniku are e katobibia ni kabane rarikin te Tembora. E anaa ana kai ni baaire te m'aane arei, are tenua te miita ab'akina, ao e baairea iai te oo; ao bon tenua te miita rietana ao tenua te miita matenna.

⁶ Ao i mwiina, e a manga nakon te mataroa are e kaaitaraa mainiku. E waerake n te kainararake, ao e baairea te kawai n rin, ao bon tenua te miita nanona.

⁷ I akuun riki anne, bon iai te kawai ae e iriraki, ae iai kakatenua taian ruu n tei n iterana ake uoua. Ti te bo rababan ma ab'akin ruu akekei n tatabeua nako b'a tenua te miita n te ruu teuana, ao matenin taian oo ake i marenaia bon uoua ma te iterana te miita. I akuun riki ruu akanne bon iai te kawai ae e irariki ae tenua te miita ab'akina ae e nakon ruun te mataroa n rin are e kaaitaraa te Tembora.

⁸ E anaa ab'akin te ruu aei, ao bon aua te miita man te kawai n rin nakon te oo are e n iterana are teuana,

⁹ ao raroan te mataroa n rin nakon te oo ake n iterana ake uoua bon teuana te miita.

¹⁰ Ti te bo buuburan te ruu n tei are n iteran te kawai are teuana ma te ruu n tei are n iterana are teuana, ao te oo are e kaokoroia bon ti te bo naba matenna.

¹¹ I mwiin anne, e anaa raababan te kawai ao bon onoua ma te iterana te miita, ma bon ti nimaua te miita warebwen taiani mataroa ake uoua.

¹² I matan taian ruu n tei ake kaka tenua te miita rababaia ma anauia bon te marena ae e kaaniia nimabwi te tientemiita rietaatana ao nimabwi te tientemiita raababana.

¹³ Ao e anaa marangana man te oo are mai buki man teuana mai buakon taian ruu akekei ni karokoa te tabo naba ai aron arei n te ruu are teuana n are n iteran te kawai are e irariki arei, ao bon tebwi ma uoua ma te iterana te miita raroana.

¹⁴ E anaa ab'akin te kawai n rin man tokin te kawai are e irariki, ao bon tebwiina te miita ab'akina.

¹⁵ Ni kabaneana, e a manga anaa bootan ab'akin te kawai are e irariki arei, man te oo are mai tinaniku nakon ruun te kawai n rin, ao bon uabwi ma nimaua ab'akina.

¹⁶ Bon iai winto aika a uarereke n oon taian ruu n tei ake tenua, kaanga ai aron are teuana are n ruun te kawai n rin. A katamaroaaki oon te kawai are e irariki ni bannan taian baam.

Te Oo Are Mai Tinaniku

¹⁷ Ao e kairaki te m'aane arei i nanon te kawai are e irariki arei ni karokoa tinanikun katawanangin oon te Tembora, ike I noori iai tenibwi taian ruu aika a kateaki ni katobibia katawanangin oon te Tembora. A nim taian ruu aikai ma oon tinaniku, ao iai te tabo ae e rabunaki aona n taian bonobono aika a raababa ae e katobibia katawanangin oon te Tembora.

¹⁸ E aranaki te tabo aei b'a te tabo ae e rabunaki aona n atiibu aika a raababa i nano, ao warebwena bon uabwi ma nimaua te miita.

¹⁹ Ao I noora te mataroa n rin nakon katawanangin te Tembora ake a rietaata riki nakon taian mataroa nakon katawanangin oon te Tembora. E baairea marenan te mataroa are mai tinaniku ma te mataroa are mai nanona, ao bon nimabwi te miita raroaia.

Mataroa Ake mai Meaang

²⁰ I mwiin arei, e a manga baairea te mataroa are i meaang are te mataroa nakon katawanangin oon te Tembora.

²¹ Bon tenua naba aia ruu taan tei iai n iteran te kawai ae e irariki ake uaitera. Bon ti te bo raoi baairean taian ruu aikai, taian oo ake i marenaia, ao ruun te kawai n rin are i tabon te kawai ae e irariki ma baairean taian mataroa ake i mainiku. Mataroan meaang bon uabwi ma nimaua te miita ab'akina ao tebwi ma uoua ma te iterana te miita rababana,

²² ao taiani winto, ruun te kawai n rin ao bannan taian baam bon ti te bo raoi ma ake ni mataroan mainiku. E kaitaraa naba katawanangin te Tembora ao iai kaintam'arakena aika itiua m'anekana ni waerake.

²³ Bon iai te mataroa nakon katawanangin te Tembora ae e kaaitaraa raoi katawanangin oon te Tembora, kaanga ai aron raoi are n te mataroa are i mainiku. E anaa baairean te raroa i marenan te mataroa are i tinaniku ma te mataroa are mai i nanona, ao bon nimabwi te miita ab'akina.

Mataroan Maiaki

²⁴ E kairai te m'aane arei nakon te mataroa are i maiaki. E anaa ab'akin taian oo ao ruun kawai n rin n te mataroa arei, ao bon ti te bo baaireana ma taiani mataroa ake uoua.

²⁵ Bon iai taiani mataroa n taian ruu n tei n te mataroa aei n ruun te mataroa, n ai aron ake tabeua, ao bon uabwi ma nimaua te miita ab'akina ao te itera ni miita rababana.

²⁶ Itiua te kaintam'arake ni waerake nakon te mataroa; ao e mena ruun te kawai n rin n tabon te kawai are irariki are e raroa ao e kaaitaraa katawanangin te Tembora. E katamaroaaki n taian oo ake i rarikin te kawai are e irariki ni bannan taian baam.

²⁷ Ao n iteran raoi katawanangin oon te Tembora bon te mataroa are e mena i maiakin katawanangin te Tembora. Ao te m'aane arei, e anaa raroan katawanangin oon te Tembora ma katawanangin te Tembora, ao bon nimabwi te miita.

Te Mataroa Nakon Katawanangin Te Tembora

²⁸ Ao i mwiina, ti nako n rin nakon katawanangin te Tembora, ri nanon te mataroa are i maiakin te Tembora. E anaa buuburan te mataroa, ao ti te bo buuburana ma taiani mataroa ake n oona i tinaniku.

²⁹ Ni koauana raoi, bon ti te bo b'aai ni kabane ake n te kawai are e irariki, n reitaki ma aia ruu taan tei, taian oo ake i nuukaia, ruun kawai n rin ake i tabona are e raroa, ao taian winto.

³⁰ Ti te bo te mataroa aei ma ake tabeua, b'a uabwi ma nimaua te miita ab'akina ao tebwi ma uoua te miita rababana.

³¹ Ruun te kawai n rin n te mataroa aei, e kaaitaraa katawanangin oon te Tembora, a katamaroaaki oon te kawai are irariki ni bannan taiani baam. Wanua kaintam'arakena nakon te mataroa aei.

³² I mwiina, ti m'ananga ri nanon te mataroa are i mainiku nakon katawanangin te Tembora. E anaa ab'akin te mataroa te m'aane arei, ao ti te bo arona ma ake tabeua.

³³ Ti te bo naba baairean taian ruu n tei, ma taian oo ake i marenaia, ao ruun te kawai n rin ma taian mataroa ake tabeua. Bon iai naba wintoon aia ruu taan tei ao ruun te kawai n rin, ao ab'akin te mataroa bon uabwi ma nimaua te miita ao rababana bon tebwi ma uoua ma te itera ni miita.

³⁴ E kaaitaraa katawanangin oon te Tembora ruun te kawai n rin, ao a katamaroaaki oon kawaina are e irariki ni bannan aroka aika taian baam. Bon iai naba kaintam'arakena aika wanua aika a tam'arake nakon te mataroa aei.

³⁵ Ao i mwiina, e kairai nakon mataroan meaang. E anaa baaireana ao bon ti te bo ma ake tabeua,

³⁶ n reitaki ma taian ruu n tei, taian oo ake i marenaia, ao ruun te kawai n rin. Ao bon iai naba taian winto n te mataroa aei. Ab'akina bon uabwi ma nimaua te miita ao tebwi ma uoua te iterana te miita rababana,

³⁷ ao ti te bo ma mataroan nanona ake tabeua, are e bon kaaitaraa naba katawanangin oon te Tembora ruun te kawai n rin, ao a katamaroaaki oona nako ni bannan aroka aika taian baam. Wanua kaintam'arakena are e waerake nakon te mataroa aei.

³⁸ Iai te auti ae e uarereke ae e nim ma te mataroa are mai meaang. E uki nakon ruun te kawai n rin are e kaaitaraa katawanangin oon te Tembora, ao a kaitiaki iai maan ake a tiringaki b'a a na kabuokaki b'a te karea are kakukureian te UEA.

³⁹ Bon iai taibora aika aua, uoua n iteran te ruu teuana. Bon te taibora aei are a titiringaki iai maan ake a na kareanaki, b'a te karea are kakukureian te UEA ke te karea i bukin kaetan b'aai.

⁴⁰ Iai riki aua taibora ni katawanangin oon te Tembora, uoua n iteran te kaintam'arake are e waerake nakon ruun te kawai n rin, ao uoua n iteran naba te kaintam'arake anne are te iterana.

⁴¹ Ma ngaia are, bootan taian taibora bon wanua, aai i nanona, ao aai i tinaniku, ike a tiringaki iai maan,

⁴² Bon taian atiibu aika a koreaki taian taibora ake aai ake n te ruu are e uarereke ake a kamanenaaki i bukin katauraoan taiani karea ake kakukureian te UEA. Ab'akiia bon nimabwi te tientemiita rietaia, ao taboia bon uabwi ma nimaua te tientemiita rababaia ma ab'akiia. A bane ni kaawakinaki b'aai ni kabane ake kamanenaaki i bukin tiringakin maan ake a na kareanaki i aon taian taibora aikai.

⁴³ Iai mataniwiin taibora aikai ae e rine nako ae rababana bon itibwi ma nimaua te mirimiita ni katobibia mataniwiin taian taibora aikai. A bane ni kaawakinaki taian iriko ni man ake a na kareanaki i aon taian taibora aikai.

⁴⁴ E kairai te m'aane arei nakon katawanangin te Tembora, ike I a noori iai uoua taian kateitei, teuana i rarikin mataroan nanona are e mena i meaang ao are teuana i rarikin mataroan nanona are i maiaki.

⁴⁵ E taku, “Aia b'ai ibonga ake a m'akuri n te Tembora te kateitei are i rarikin mataroan meaang,

⁴⁶ ao te kateitei are i rarikin te mataroa are i maiaki bon aia b'ai ibonga ake a m'akuri n te baonikarea. Kanoan Tatoka ngaiia ni kabane bon ti ngaiia kanoan Rewi aika a kariaiakaki b'a a na riki b'a ana ibonga te UEA.

⁴⁷ Ao n te tai aei, e anaa baairean katawanangin te Tembora te m'aane arei; ao bon nimabwi te raababa ma te anaanau. Ao I noora naba te baonikarea i matan te Tembora.

⁴⁸ Ao ti nakonako nakon kamanin te Tembora, ao te m'aane arei, e anaa baairean te kaman: ao bon itiua te miita ab'akina, ao uoua ma te iterana te miita rababana, ao te raroa man te mataroa n rin nakon te oo n iterana ake uoua bon teuana ma te iterana te miita.

⁴⁹ Buuburan te kaman n ti ngaia bon tebwiina te miita ab'akina ao onoua te miita rababana, ma taiani kaintam'arake aika a waerake nako iai. Bon kakateaina te boua n iteran taian kaintam'arake ake uoua.