Etekiera 39 - Te B'aib'ara

Konaakin Koka E taku te UEA:

¹ Etekiera ae natin te aomata, ko na kabuakakaa Koka ao tuangnga ni kaangai: Bon te tia tautaeka ngkoe i Meteka ao Tubara, ma I a riki b'a am kairiribai Ngai ae te UEA!

² N na manga karairakiko rikaaki ma n uaakiniko mai meaang ni karokoa ko roko ni maungan Iteraera.

³ N na orea nako te kai ni katebe mai baim te angamaing ao taiani kanoa ni katebe mai baim te angaatai,

⁴ ao ko na kaai ni mate ma koraki akana i aon taiani maunga. Ao mannikiba ma maan aika a aki manana a na roko ni kang

⁵ rab'atamii aika a mate aika a tiku ni wene i nanon taian rereua aika a tangaina. Bon aei Au taeka Ngai ae te UEA.

⁶ N na kaurarakea te aba are Mokoka ao nakoia botannaomata ake a mena i mataniwiin taari ake a taku b'a a rangi mano raoi, ma a na ataia b'a bon te UEA Ngai.

⁷ A na ataai Au aomata aika Iteraera, ao a na aki manga oki ni kamatauningaa Arau. A na bane aomata ni kabane aika i aon te aonnaba n ataai b'a bon te UEA Ngai ae Atuaia Iteraera ae I tabu.

⁸ A na roko boong are a nang koro iai bukin baikai, n aron are I a tia ni berita iai.

⁹ A na bane aomata i nanon kaawan nako Iteraera n rikoi aia b'ai ni buaka aia kairiribai ake a mate. A na kamanenai otanga akanne, ma kainikatebe ma kanoanikatebe, ma kainiwai, ao taian kai n oro b'a taian aia, ao e na bon nikirana n aki bane i nanon itiua te ririki.

¹⁰ A na kabuoki taian b'ai ni buaka aikai n onea mwiin te kai ke kaai ake a na korokoroi man aroka ake a na kab'akai. Ao anne aroia Iteraera ni katae aia kai irouia ake a aki toki ni kikimoaia ma ni kabuakakaia. Bon aei Au taeka Ngai ae te UEA.

Taunakin Koka E taku te UEA:

¹¹ Ngke e a tia ni kamaunaaki Koka, N na taunna ma ana taanga ni buaka i Iteraera, n te M'arua are Taani M'am'ananga, i mainikun Taari are Mate. E na bon rangi ni buubura te tabo n taunimate anne n te aro are e na tuuka kawaia aomata ake a kataia n nakonako i nanon te m'arua, are e na ataaki n arana ae M'aruan Ana Taanga ni buaka Koka.

¹² A na kabanea itiua te nam'akaina Iteraera n tauniia maate ao ni kaitiaka aon te aba.

¹³ A na bane aomata ni buobuoki n tauniia maate, ao a na karineaki i bukin te baei n te bong are e na nooraki iai raneanean mimitongiu.

¹⁴ I mwiin nam'akaina aika itiua aikai, ao a na rineia aomata ake a na kakaei taian mate aika a tuai taunaki. E na karaoaki aei i nanon itiua te nam'akaina b'a e na kakoauaaki raoi b'a e a aki kam'araa aon te aba.

¹⁵ Ngkana a boo ma riin te aomata, ao a na katea te kanikina i rarikina. Ao ana roko taan kenrua n taunna ni “M'aruan ana taanga ni buaka Koka”

¹⁶ i rarikin te kaawa are “ana taanga ni buaka Koka.” Ao i mwiin, anne e na manga okira arona n itiaki aon te aba.

¹⁷ Etekiera ae natin te aomata, N nang karaoa te baka n am'arake i aoni maungan nako Iteraera ma n anga te karea ikekei. Ma ngaia ae ko na kaoiia maanikiba ni kabane ma maan aika kawakawa ni kabane man taabo nako b'a a na am'arake n irikon te karea ao nima te raraa. A na am'arake mannikiba nako ma maan aika kawakawa nako

¹⁸ n rab'ataia taan buaka ao taan tautaeka ma ianena ake N na kareaniia kaanga te tiibu, ke taian kooti, ke taiani kao.

¹⁹ I tangiriia mannikiba nako ma maan aika kawakawa nako b'a a na am'arake ni karokoa a ngae ke ni mooi ni karokoa a koro.

²⁰ A na roko nakon Au taibora ao a na kaonia n irikon taian aoti ma taani buaka n aekaia nako. Bon aei Au taeka Ngai ae te UEA.

E Na Manga Kaokaki Aron Iteraera E taku te UEA:

²¹ A na noora ootan mimitongiu bootanaomata n te aonnaba n tatabemaniia nako ngkana I katuaaia.

²² A na ataia man te tai aei Iteraera b'a bon te UEA Ngai ae Atuaia.

²³ A na ataia botannaomata aika ianena b'a a kairoroaki Iteraera b'a a na kiitana oin abaia i bukina ngkai a bure nako iu. I tannako mairouia Au aomata ao I kariaia taiani kairiribai b'a a na buakaniia ma n tiringiia.

²⁴ A rangi ni buakaka ma ni buretoroia, ma ngaia are a riai ni katuaaeaki.

²⁵ Ngkai N nang kaota Au nanoanga nakoia Iteraera ma ni kaokiia mairouia ianena ake a maeka i buakoia. Bon kanoan Iakob'a ngaiia, ma ngaia ae, N na kakab'aiaia ma ni kaotia b'a I tabu.

²⁶ A na maeka ma te rau n oin abaia, ma a na mamaa ngkana a uring aia m'akuri aika a buakaka ma aroia ni kamamaaeai.

²⁷ Ane a na mataku botannaomata aika ianena ngkana I anaia Iteraera mai abaia kairiribai ma ni kaokiia nakon mwengaia, ao a na nooria botannaomata aikai b'a I bon tabu.

²⁸ A na ataia Au aomata b'a bon Ngai ae te UEA ae Atuaia ae I kanakoia b'a taenikai ao ngkai N nang kaokiia rikaaki nako oin abaia.

²⁹ N na aki manga tannako mairouia Au aomata aika Iteraera, ao E na maeka Tamneiu i nanoia. Bon aei Au taeka Ngai ae te UEA.