Etekiera 36 - Te B'aib'ara

Rongorongo I bukin Maungan Nako Iteraera

¹ E taku te UEA: Etekiera ae natin te aomata, ko na tuangiia maungan nako Iteraera

² b'a boni Ngai ae te UEA ae te Atua ae I taekina ae e kaangai: A na b'ainingareai ngkai ami kairiribai ao a na taku b'a aia b'ai ngkami aika maunga.

³ A uruaningkami ma ni kamanatuaingkami man itera ni kabane, ao a kataenikaingkami aia botannaomata ianena ao a b'ainingareingkami.

⁴ Ma ngaia ae kam na bane n ongora ngkami aika maunga ao tabuki, raanga n ran ma m'arua, nakon te b'ai ae I karaoia. A na wene n uruaki ami kaawa nako, ao a na bae ni ngare ma ni kamamaaingkami botannaomata nako.

⁵ Ma N na rairaki nakoia botannaomata aikai ma uniu ae e korakora, ai moara ra riki ake a oom'aaka ngareia ni ngareakiniko ma n taui ami tabo n uteute nako.

⁶ E a bati n tau rawawatami, ao I rangi n un Ngai ae te UEA ae te Atua! A tia ni kamamaaeko botannaomata,

⁷ ma ngaia ae ngkai N na kamamaaia ma ni kab'ainrangiia. Bon anne au berita ae e matoa.

⁸ A na rikirake aroka i aon maungan nako Iteraera ao a na kariki uaa i bukiia Au aomata, b'a a nang okira mwengaia n te tai ae aki maan.

⁹ N na tararuaingkami ni kamaraua te tano ao n uniki taiani uita ni karaabeen ami maunga aika maiu reirei.

¹⁰ A na oki Iteraera ma ni manga katea ami kaawa aika a urubekebeke ma ni maeka iai.

¹¹ A na bungiaki naati, ao a na bungi natiia naba maan. Ko na aki manga kiitanaki n arom ngkai, ma ko na onrake irouia aomata ao e na karaoaki ae e raoiroi nakoim nakon ake mai m'aaina. Ao ane ko na ataia iai b'a bon te UEA Ngai.

¹² N na kaokiia Au aomata nakon mwengaia, ao a na maeka i aon taiani maunga, i bukina b'a aia b'ai ngkoe, ao e na aki manga tare kanaia ake a reereke man karaabeen am maunga.

¹³ E boni koaua ae ko bukinaki b'a ko aki karekei am'arake aika a tau i bukiia am aomata ao ko kabakiia am aomata.

¹⁴ I berita b'a ma n te tai aei, ko nang karekei kanaia aomata ngkoe ae te aba ao ko na aki manga kabakiia. Bon aei au taeka Ngai ae te UEA.

¹⁵ Ko na aki manga ongo b'anaaia botannaomata ake tabeua ni ngareakiniko ma ni mata ni kakaniko riki nakoim. Bon aei au taeka Ngai ae te UEA ae te Atua.

E Na Riai Ni Karineaki Te UEA

¹⁶ E taku te UEA:

¹⁷ Etekiera ae natin te aomata, ngke a maeka ngkoa Iteraera n oin abaia, a kabaarekaa te aba n aroia ake a karaoi, n aron kam'araan te aine ae e aoraki n aine.

¹⁸ A tiritiri ao a taromauri bouannanti, ake a kabuakaka aon te aba. Ma ngaia are, I katuaaia Au aomata ni marakin nanou

¹⁹ ao I kauamaae nakoia nako ia botannaomata ake tabeua, n aron ae a bon uaa korona.

²⁰ E kamatauningaaki arau n taabo nako ake a nako iai, i bukina b'a a kab'ainrangiia Au aomata ianena n aia taeka are a taku b'a I a tia ni kairoroia Au aomata b'a a na kiitana oin abaia.

²¹ E tabe nanou n aia taeka ianena i buku,

²² ma ngaia are, ko na tuangiia Iteraera Au taeka ae e kaangai: Kam a tia ni kamatauningaa arau ae e tabu i buakoia botannaomata nako ake kam maeka i buakoia ngkai. Ma ngaia ae, e bon riai n aki reke nakoimi te b'ai ae n nang karaoia ngkai nakoimi. N na kaokingkami nakon mwengami ti i bukin karinean arau

²³ ao ni kaotia naba nakoia ianena b'a I tabu. Ao ane a na ataai iai b'a bon te UEA Ngai ae te Atua. Bon aei au taeka.

²⁴ N anaingkami man aia botannaomata nako ianena ma ni bootingkami ma ni kaokingkami nakon mwengami.

²⁵ N na tatauringkami n te ran ae e itiaki, ao kam na riki n tau i buku. N na teboki ni kanakoi b'aai ni kabane akana a kabaarekaingkami, ao N na kanakoi ami bouannanti aika a rangi n ribaaki.

²⁶ N na kanakoi nanomi aika a matoatoa ao N na anganingkami nanomi aika a boou ao n tangira te kakaonimaki. E na ti reke iroumi te iango aika a itiaki,

²⁷ i bukina b'a N na karina Tamneiu i nanomi ao ni karikingkami b'a kam na rangi ni kan ongotaeka nakon au Tua ma au Reirei nako.

²⁸ Kam na manga maeka riki n te aba are I anganiia ami bakatibu; kam na riki b'a Au aomata, ao Ngai N na riki b'a Atuami.

²⁹ N na kaawakiningkami mani b'aai aika kam na kam'araa iai. E na taonako ami tawaana n taiani uita, ao akea ae e na manga baki.

³⁰ A na onrake arokami n taiani uaa, ao a na rikirake taiani uita n ami tawaana nako, n te aro are kam na aki manga mamaa i bukin aki taun kanami.

³¹ Kam riai n uring aromi aika a buakaka ao kam riai n ribaingkami i bon iroumi n te b'ai ae kam a tia ni karaoia.

³² Kaain Iteraera, I aki karaoi aikai i bukimi. Kam aki toki ni bubure nako iu, ao kam bon riai ni kamaamaaeaki ao ni kab'ainrangaki n te b'ai ae kam a tia ni karaoia. Bon aei au taeka Ngai ae te UEA ae te Atua.

³³ Ngkana I tia ni kaitiakingkami, N na manga karaoingkami b'a kam na katea ami kaawa akana a urubekebeke ma ni kamaekaingkami iai.

³⁴ E na manga kamarauaki tanon abami, ao akea ae e na manga oki n nooria b'a te aba ae akea kain aona.

³⁵ Ma, a na taetaekinna b'a ti te bo tikiraoina ma te nne n aroka are Eten. A na aki manga noori taian kaawa aika a wene n uruaki, ma a na noori ami kaawa aika a korakora aika a onrake irouia aomata.

³⁶ Ao ane a na ataia botannaomata akana nikira ni maiu akana i rarikimi b'a bon Ngai ae I a manga katei taabo ake a uruaki ao ni manga uniki taian tawaana aika akea kain aoia. Bon aei au taeka Ngai ae te UEA ae I karaoa te berita aei.

³⁷ N na manga kaeka riki ami tataro nako, ao N na karikirakea ami botannaomata kaanga te nanai n tiibu ae e korakora.

³⁸ A na manga kaonaki taiani kaawa aika a wene n uruaki n taian aomata, n aron Ierutarem ngkoa ngke e onrake n taian tiibu ake a na kareanaki i bukin te toa. Ao ane kam na ataia iai b'a bon te UEA Ngai.