Etekiera 33 - Te B'aib'ara

Rinean Etekiera Iroun Te UEA B'a E Na Taratara

¹ E taku te UEA:

² Etekiera ae natin te aomata, ko na kauringiia am aomata ni kaangai: N na bae ni kanakoa te kairiribai n te bong teuana b'a e na buakana abami. Ao kaanga aongkoa kam rinea temanna b'a e na taratara

³ ma ni katanga te buu b'a te kanikina ngkana e noora te kairiribai n roko.

⁴ Ngkana e ongo temanna ma n aki tabe iai ao e a roko te kairiribai n tiritiri, ao e akea ae e na bukinna i bukin matena.

⁵ Bon ana kaairua i bon i rouna, b'a e aki tabe ma te kauring, ao e aki birinako.

⁶ Ao ngkana e noora rokon te kairiribai te tia taratara ao e aki katanga te kanikina, ao e na roko te kairiribai n tiringiia koraki aika akea aia bure, ma N na kataua te tia taratara are e bukintaeka ni mateia aomata.

⁷ I a tia n rineiko Etekiera b'a kona taratara i bukiia Iteraera. Ma ngaia ae ko na kakauongo nakon te b'ai ae I taekinna, ao i mwiina, ko na kauringiia i buku.

⁸ Ngkana I tuangiia aomata aika a buakaka b'a a na mate i bukin aia bure, ao ngkoe ko na kauringiia b'a a na rairaki nako man aia m'akuri aika a bure. Ma ngkana ko rawa ni kauringiia, ao ko na bukintaeka ni mateia.

⁹ Ma ngkana ko bon kauringiia, ma a bon teimatoa naba ni kaakaraoa te bure, ao a na mate i bukin aia bure ao ngkoe akea am bure iai.

E raoiroi man eti n taai nako Te UEA

¹⁰ E taku te UEA: Etekiera ae natin te aomata, a ngurengure Iteraera b'a a taku b'a e a rangi ni korakora riki katuaeakiia nakon ae a konaa ni kaaitaraa. A akea kaantaningaan te maiu irouia, ao a bukinai iai.

¹¹ Ko na tuangiia b'a ngkai I bon maiu Ngai ae te UEA ae Atuam ao I bon aki kariaia b'a N tarataraia aomata aika a buakaka ngkana a mate. I tangiria b'a a na rairaki man aia bure ma ni maiu. Ma ngaia ae ngkana a tangiria ni maiu Iteraera, ao a riai ni katoka karaoan te bure ma n rairaki nako iu.

¹² Ko na tuangiia b'a ngkana kam a manga moana karaoan te bure ngkami aika kam raoiroi, ao a na bon aki konaa ni kamaiuaki man aia raoiroi ake a tia ni karaoi n taai ake ngkoa ngkana a katuaaeaki. Ko na kauringiia b'a ngkana a katoka karaoan te bure aomata aika a buakaka, ao e na kab'araaki aia bure ake ngkoa, ao a na aki katuaaeaki.

¹³ Ngkana tao I berita nakoia aomata aika a raoiroi b'a a na maiu, ao tabeua te tai i mwiina, a manga moana karaoan te bure ma n iangoia b'a a na kamaiuaki n te raoiroi are a tia ni karaoia ngkoa. A na bon tiringaki aomata aikai i bukin aia bure. E na m'anuokinaki taekan aia m'akuri ake a raoiroi ngkoa.

¹⁴ Ngkana tao I kauringiia aomata aika a buakaka b'a a na mate i bukin aia bure nako, ao a katoka karaoan te bure ni karaoa ae e raoiroi.

¹⁵ Te katoto n ai aron aei, a tangiria ni kaoka te b'ai are a tia n anaia b'a te kakoaua i bukin te roun ao b'aai ake a tia ni kimoai. Ao i mwiina, a katoka karaoan te bure ao a manga moana te ongotaeka nakon au Tua, a na bon maiu.

¹⁶ A na kab'araaki buren aia kairua ake ngkoa, ao a na maiu b'a a tia ni karaoa ae raoiroi.

¹⁷ Etekiera, a bukinai am aomata b'a e aki eti ae I karaoia. Ma bon ngaiia aika a karaoa ae e aki eti.

¹⁸ Ngkana a manga moana karaoan te buakaka aomata aika a raoiroi, ao a na bon tiringaki i bukin aia bure.

¹⁹ Ao ngkana a manga katoka karaoan te bure aomata aika a buakaka, ao a bon kamaiuia iai man te katuaaeaki.

²⁰ Ma a bon teimatoa naba n taku Iteraera b'a e aki eti ae I karaoia. Ma ngaia ae ko na kauringiia b'a a na bon katuaaeaki i bukin te b'ai ae a tia ni karaoia.

Rongorongon B'akan Iteraera

²¹ Tebwi ma uoua te ririki i mwiin anaakin te Uea are Ieoiakin ma nikiraia ara koraki b'a taenikai nako B'aburon, ao e roko irou temanna ae e biri nako mai Ierutarem n nimaua bongin te katebwina n nam'akaina. E kaongoai b'a e a tia ni b'aka te kaawa.

²² E niniai te UEA n te tairiki are i m'aain rokon te aomata aei n au auti. Ma ngaia are ngke e roko te m'aane aei irou n te ingabong are i mwiina, ao I a manga konaa n taetae.

Tera ae na riki nako ia nikira ake i aon Iteraera?

²³ Ao i mwiina, e taku te UEA:

²⁴ Etekiera ae natin te aomata, a taku aomata ake a maeka ni kaawan Iteraera ake a uruaki, “Bon ti Aberaam ae e anganna te UEA te aba ae Iteraera ni kabane. Ti a rangi ni m'aiti n aomata ngkai ao bon taani b'aib'ai ngaira n te aba aei.”

²⁵ Ma ngaia are, ko na tuangiia te b'ai ae I taekinna ni kaangai: Kam na kangaa n taku b'a bon abami naba ngkai te aba aei? Kam am'arake ma te raraa iai ao kam taromauri taiani bouannanti. Kam tiriaomata

²⁶ ao kam kaona te aba ni kabuta n te tiritiri. A bane ni buakaka b'aai ni kabane aika kam karaoi; ao kam bon aki kakaonimaki naba nakon ami berita ni mare. Ao kam a manga taekinna b'a abami te aba aei!

²⁷ Ngkai bon te UEA Ngai ae e maiu ae te Atua, ao kam na bane ni mate ngkami akana kam maeka ni kaawa aika a uruaki. Ngkami akana kam maeka i tinanikun te kaawa kam na kanaki irouia maan aika a aki manana, ao akana a karabaia i nanon taian nangananga ao taabo aika a katati kam na mate n te aoraki ae e kamaamate.

²⁸ N na karika te aba ni kabuta b'a te aba ae akea manenana ao ni kamaunaa te m'aaka are kam kainikatonga iai. A na akea naba arokan aon taiani maunga, ao bon akea ae e na kataia n riaoi.

²⁹ N na katuaaeko i bukin am bure nako, ao N na onika am botannaomata nakon te rereua ae akea kain aona. Ao ane ko na ataia iai b'a bon te UEA Ngai.

A ongo aomata ma a aki bitaki E taku te UEA:

³⁰ Etekiera ae natin te aomata, a tataekiniko kaain B'aburon ngkana a kabowi i rarikin oon te kaawa ke ni mataroan aia auti. A taku, “Ti na titirakina Etekiera b'a tera ana taeka te UEA n te bong aei.”

³¹ Ma ngaia are, a bane n roko n ongora irou, ma a rawa ni karaoa te b'ai are I tuangiia. A taku b'a a bon kakaonimaki, ma a bon teimatoa ni kataia ni baabakanikawai aia m'ane aomata tabem'aang.

³² Ti te bo ma ko anenea te anene n tangira ke ko tangitang irouia. A ongora, ma akea te b'ai teuana ae a karaoia are ko taekinna.

³³ A na katuaaeaki n te tai ae e aki maan, n aron are ko a tia ni kauringiia iai, ao a na riai n ataia b'a e mena te burabeti i buakoia.