Etekiera 21 - Te B'aib'ara

E Na Katuaaea Ierutarem Te UEA

¹ E taku te UEA:

² Etekiera ae natin te aomata, ko na kabuakaka Ierutarem are a taromauri iai aomata. Kauringiia aomata ni kabane i Ierutarem

³ b'a N nang katuaaia. N na kaotinakoa Au kabang ao I a tauraoi n tiringiia aomata nako, aika a raoiroi ma aika a buakaka.

⁴ A na mate aomata mai maiaki ni karokoa meaang,

⁵ ao a na ataia b'a N na bon aki kanakoa Au kabaang.

⁶ Etekiera, ko na ngirangira n nanokawaki ao ni korakai n te aro are a na ongo aomata tangitangim.

⁷ Ngkana a titirakiniko b'a bukin tera ngkai ko ngirangira, ao tuangiia b'a iai te rongorongo ae e na tong iai ma n ruru ni maaku iai ao a na bua ninikoriami. A na riki baikai n te tai ae e aki maan. Boni Ngai ae te UEA ae I karaoa te berita aei!

E A Tauraoi Te Kabaang Ni Buakana Iteraera

⁸ E taku te UEA:

⁹ Etekiera ae natin te aomata, ko na tuangiia kaain Ierutarem: Iai Au kabaang ae e kakang ae raneanea.

¹⁰ E kakang n tiritiri, e raneanea n oota kaanga te iti. Akea te bootaki ni kukurei ae e na karaoaki, i bukina ngkai a tia Au aomata n aki tabe ma Au kauring ma Au katuua.

¹¹ E a tia ni karaneaneaaki Au kabaang; e kakang ao e tauraoi n tiritiri.

¹² Ngirangira n nanokawaki Etekiera; e kab'akaaki te kabaang i aoia Au aomata ma aia taani kairiiri. A na mate! Ma ngaia ae ko na kab'araa nanom man am kaantaninga ni kabane.

¹³ I kataia Au aomata, ao akea te b'ai ae a karaoia ni katokai. Bon aei Au taeka Ngai ae te UEA.

¹⁴ Etekiera, ko na kauringiia aomata, ao i mwiina, ko na kaota kukureim n Au tokanikai n ubouboi baim. E na okioki ni buaka Au kabaang ae e mamanibuaka n tiringiia Au aomata ni kabane oron te kabaang.

¹⁵ Ane a na mauna ninikoriaia ao a na b'aka ni maaku. E tataninga Au kabaang iai mataroa ni kabane, n raneanea ma n tauraoi nakon tiritiri.

¹⁶ E na korokoro nakon te atai ao te maing, n taabo nako ike e roko iai wiin te kabaang.

¹⁷ Ao i mwiin anne, e a tib'a toki uniu, ao N na uboi baiu n tokanikai. Bon aei Au taeka Ngai ae te UEA.

Ana Kabaang Uean B'aburon

¹⁸ E taku te UEA:

¹⁹ Etekiera ae natin te aomata, kanikinaai uoua kawai i bukin uean B'aburon are e na irii ngkana e roko ma ana kabaang. E na ti teuana te tabo ike a moanaki mai iai kawai akanne, ma ko na aki m'aninga ni katei taian kaetieti ike a raure nako iai kawai akanne nakon taabo aika a kakaokoro.

²⁰ Kaota raoi te tabo ike a nako iai kawai akanne. Teaina e nako Raba ao teaina e nako Ammon, ao teaina e nako Ierutarem, ana kaawa n tua Iuta are e nonoaki.

²¹ Ngkana e tei uean B'aburon n te kaetieti, ao e na rineia b'a e nga ae e na nako iai ngkana e ioioa te kainikoto, titirakiniia antina, ao ngkana e karaua n taraa marakin nuukan te man are e kareanaki.

²² E na kanakoa baina are te atai ni kanakoa te kainikoto are e koreaki iai ae kaangai “Ierutarem”. Ao e na waekoa n anga te kanikina ae na kanakoa i bukin te takaakaa ni buaka, ma ni kateaki taian tabuki i bukin tam'arakean oon te kaawa, b'a e na uruakaki oona ni kab'akaaki ma ana mataroa n taian b'ai n uru mataroa aika boua aika a korakora, ma n tiringaki aomata.

²³ A tia ni berita aomata ni kabane i Ierutarem b'a a na kakaonimaki nakon uean B'aburon, ma ngaia are, bon akea ae kaantaningaia b'a e na riki aei. Ma e na kauringiia uean B'aburon aron maiuia aika a rangi ni bure ma ni kauringiia rokoia b'a taenikai ngaiia.

²⁴ Etekiera, ko na tuangiia kaain Ierutarem ma aia taani kairiiri te b'ai ae I taekinna Ngai ae te UEA ae te Atua ae e kaangai: A bane ni buakaka b'aai ni kabane akana kam karaoi ao a bon kaotaki iai buakakami. Kam bure iai ao kam na uotaki nako b'a taenikai.

²⁵ E a roko ngkai bongin kabanean katuaaeakimi ikai.

²⁶ Boni Ngai ae te UEA ae te Atua ae I tuangkami b'a kam na kanakoi m'aita ni uea ma ami baunuea, b'a a na bane ni bitaki b'aai ni kabane. A na manga mwiokoaki koraki ake akea m'aakaia ngkoa, ao ake a tautaeka ngkai a na manga riki n akea aroia.

²⁷ N na katuka Ierutarem b'a e na urubekebeke ngkana e roko teuare e rineaki b'a e na katuaaea te kaawa aei.

Te Motikitaeka I bukin Ammon

²⁸ E taku te UEA ae te Atua: Etekiera ae natin te aomata, a kab'ainranga Iteraera kaain Ammon, ma ngaia ae ko na kabuakakaia ma n tuangiia ni kaangai: E a b'aka te kabaang, e tauraoi n tiritiri; e karaneaneaaki ao e katauraoaki nakon te tiritiri ae e biri m'aaka n aron te iti.

²⁹ Ngkami aika kaain Ammon aika kam buakaka kam noori taian kaotioti ao kam kakoauai rongorongo aika aki koaua. Ma e a kaan bongin katuaaeakimi, ao e na tiringngkami Au kabaang!

³⁰ A toki ami bong ni katuaaeaki, ma ngaia ae kam na kaaki ami kabaang. Kam na katuaaeaki n te aba are kam bungiaki iai.

³¹ E na kab'atataingkami uniu n ai aron te ai, ao N na anga ngkami nakoia m'aane aika a iowawa aika a bane aroia n te tiritiri.

³² Kam na bue ao kam na mate n oin abami. Ao e na m'aninga te aba taekami n aki toki. Bon aei Au taeka Ngai ae te UEA.