Etekiera 17 - Te B'aib'ara

Rongorongoia Ikare Aika Uoman Ao Te Kai Te Kureebe

¹ E taku te UEA:

² Etekiera ae natin te aomata, ko na karakina te karaki aei nakoia Iteraera,

³ b'a a aonga n ataa te b'ai ae I taekinna nakoia: N te tai teuana ao e a kiba i aon Reb'anon te ikare ae e korakora baina ni kiba ma n tamaroa buraena. E otea taberan te kai ae te tiira,

⁴ ao i mwiina, e a uotia nakon abaia taani kabob'ai ao e katikua n aia kaawa teuana ae e buubura.

⁵ E bon anaa naba te koraa mai Iteraera ao e unikia n te aba ae e maiu ae e m'aiti iai te ran, kaanga te kai ae te wiiro ae e mena i rarikin te raanga n ran.

⁶ E teberake te ati ao e rikirake b'a te kureebe ae e tababaa nako i aon te tano. A m'aiti baana ma wakaana aika a korakora aika a nene rikaaki, ao e riki rake m'aangana ni waerake nakon te ikare.

⁷ Ao iai riki te ikare temanna ae iai baina ni kiba aika a korakora ao buraena ae e matenten. A waekoa n rairaki wakaan te kureebe nakon te ikare aei, ma ni kaantaningaa karokoan te ran nakon te tano.

⁸ Ma e bon maiu te kureebe i aon te tano ae e maiu reirei, ike e m'aiti iai te ran ma ni karekei taiani baa aika a manguroroo ao taiani uaa aika a buubura.

⁹ Ko na tuangai ngkai, Etekiera, n am iango e na maiu te kureebe aei? Ke e na katikia rake te moan ikare man wakaana man anai uaana kureebe ma n tiring baana aika a boou. E konaa te ikare n tiringnga ngkana akea ana i buobuoki te taanga ni buaka ae e korakora.

¹⁰ E maiu raoi te kureebe ao e maiu reirei, ma e waekoa n rai ngkana e kare te ang man te rereua ae e kabuebue.

Kab'arab'araan Te Kaikonaki

¹¹ E taku te UEA:

¹² Etekiera, ko na titirakiniia Iteraera aika taani kamangao b'a tera nanon te karaki. Tuangiia b'a e roko ngkoa uean B'aburon i Ierutarem, ao i mwiina, e taua uean Iuta ma ana mataniwi, ao e uotiia ni kaokiia nako B'aburon b'a taian taenikai.

¹³ E rineia temanna mai buakoia ana utu Iuta ao e tiaainaa te boraraoi n raoi ma ngaia, ao i mwiina, e tuangnga b'a e na tuea b'a e na kakaonimaki. E bon kairiia nako ake tekorakina b'a a na riki b'a kaain te aba aika a kakaawaki,

¹⁴ b'a aonga n ongotaeka nikiraia kaain Iuta ma n ongotaeka i rouna n ti ngaia ao e na aki manga reke ae a na manga bon taua riki aron abaia.

¹⁵ Ma e a manga kamangao uean Iuta ae e boou aei nakon B'aburon ao e kanakoia mataniwi nako B'aburon b'a a na anai taian aoti ao taian taanga ni buaka. E na nakoraoi ana iango te uea aei ngkai e urua ana boraraoi n raoi ma B'aburon? Ke e na riai ni katuaaeaki i bukin te b'ai ae e a tia ni karaoia?

¹⁶ Ngkai bon te UEA Ngai ae te Atua, ao I tuea b'a e na mate uean Iuta i B'aburon, i bukina ngke e urua te boraraoi n raoi ma uean B'aburon, are e bon rineia b'a e na uea.

¹⁷ E ngae ngke e na akea manenan uean Aikubita ma ana taanga ni buaka ae e korakora nakon Iuta ngkana e buaka B'aburon ma n katei taian tano i bukin ninian kaawan nako Iuta ma n tiringiia kaaina.

¹⁸ E urua oin ana berita uean Iuta ao e katinanikua te boraraoi ma B'aburon. Ma ngaia are, e riai ni katuaaeaki!

¹⁹ E karaoa te berita n arau ao e tuea b'a e na karinea te boraraoi. Ma ngkai e a tia n urua te berita, ao e a kamatauningaaki arau. E na riai n okiraki n te b'ai ae e a tia ni karaoia.

²⁰ N na taakina te karaun ni kam'anea. Ao i mwiina, N na uaakinna nako B'aburon ma n nooria raoi b'a e bon katuaaeaki i bukin ana aki kakaonimaki nako iu.

²¹ A na tiringaki ana taanga ni buaka ake a bane aroia n te buaka, ao a na maaenako akana a reke maiuia n aki akaaka. Bon aei au taeka Ngai ae te UEA.

²² Aio ana taeka te UEA ae moan te M'aaka: N na anai taberan taian tiira ake kabanea n rietaata ma n urui taberana aika maraurau; N na kabwebwea i aon te kabanea n rietaata ni maunga,

²³ i aon maungan Iteraera are te kabanea n rietaata. E na kariki m'aangana ma ni kariki koraana ao e na riki b'a te tiira ae te kabanea ni kakannato. A na bane ni maeka iai mannikiba n aekaia nako ma ni karekea katanaia i aan nuuna.

²⁴ A na bane kain te buakonikai n ataia b'a I konaa Ngai te UEA ni karuoi aroka aika a rietaata ma ni manga buokia aika a uarereke b'a a na riki rake. I kam'autereterei aroka aika a mawaawa ao ni manga kamawawai aroka aika m'auteretere. Bon aei au taeka Ngai ae te UEA, ao N na bon kakoroa bukin au taeka.