Ebera 1 - Te B'aib'ara

E a Tia n Taetae te Atua nako Ira iroun Natina

¹ N taai ake ngkoangkoa ao te Atua E taetae nakoia ara bakatibu irouia burabeti n te tai teuana ma teuana, ao n aaro aika bati;

² ao ni boong aikai aika kabaneani boong, E taetae nako ira iroun Natina, are E a tia n rineia b'a te tia b'aib'ai ni b'aai ni kabane, ao are E karaoa te aonnaba ae b'anin i Rouna;

³ Ngaia raneaneani mimitongin te Atua, ao katotongan arona ni koaua; ao E kateimatoai b'aai ni kabane aika karikaki b'a a na waki n aroia n ana taeka ae m'aka. Ngke E a tia ni kaitiaki buure, ao E tekateka i angaatain te Atua are M'aka i eta;

⁴ ngkae E a tia n riki ni kakannato riki nakoia anera n ai aron arana are E b'ainna ngkae e rine riki nakon araia.

E Kakannato Riki Natin te Atua nakoia Anera

⁵ B'a te anera ra ae E kangai te Atua nako ina ngkoa, “Bon Natiu Ngkoe n te bong aei ao bon tamam ngai.” Ke ni kangai, “N na riki b'a Tamana Ngai ao Ngaia E na riki b'a Natiu.”

⁶ Ma ngke E nang kanakoa ana moa n Nati te Atua nako aon te aba, ao E kangai, “Ao a bane ana anera te Atua n taromauria.”

⁷ Ao E taekinia anera te Atua ni kangai: “E karaoia ana anera b'a aang, ao ana tia m'akuri b'a uran te ai.”

⁸ Ma E taekina Natina ni kangai: “Ueam, te Atua, e na teimatoa n aki totoki; ao Ko na tautaeka ma te eti i aoia am aomata.

⁹ Ko tangira karaoan nanon te Atua, ao Ko riba riaoakin nanona. Ma ngaia ae E kabiriko te Atua, ae Atuam, ni b'an te kim'areirei b'a Ko aonga ni kim'areirei riki i aoia raom.”

¹⁰ Ao E kangai naba, “Ngkoe, te Uea, Ko kawenea aan aonnaba i m'ain rikini b'aai, ao Ko karaoa karawa ni baim.

¹¹ A na mauna, ma Ko tei matoa; A na bane ni mane n ai aron te kunnikai.

¹² Ao ane ko na rukum n ai aron te ninira, ao a na onikaki naba n ai aron te kunnikai: Ma ai uauam nako naba Ngkoe, ao a na akea tokin am ririki.”

¹³ Ao te anera ra ae E kangai te Atua nako ina n te tai teuana, “Ko na tekateka i angaataiu, ni karokoa I kakiia am kairiribai b'a neni katokaani waem.”

¹⁴ Tiaki bon tamnei ni kabaneia anera, aika taani m'akuri aika kanakoaki b'a a na buokiia te koraki akana nang karekea te kamaiuaki?