Biremon 1 - Te B'aib'ara

¹ Mairouni B'auro, ae kabureaki i bukini Kristo Iesu, ao mairoun Timoteo ae tarira; nakoni Biremon ae tangiraki ae raora ni m'akuri,

² ao nakon te ekaretia ane a bobotaki kaaina i nanon am auti, ao nakon Abebia ae m'anera ma Arekibo ae raora n tautia:

³ Ami b'ai te akoaki ma te raoi mairoun te Atua ae Tamara ma te Uea are Iesu Kristo.

Ana Tangira ma ana Onimaki Biremon

⁴ I aki toki ni m'anea aram ngkana I tataro, ao I kaaitaua te Atua,

⁵ ngkai I ongo taekan am tangira nakoia ake a itiaki ni kabaneia, ma onimakinan te Uea are Iesu i roum.

⁶ Bon au tataro b'a arom n iraorao ma aomata i bukin am onimaki e na karika i rouia ataakin raoi baika raraoi ni kabane aika iai i roura, aika a kairira nakoni Kristo.

⁷ B'a e bati au kim'areirei ma kabebetean nanou n am tangira, tariu, b'a a kamaiuaki nanoia ake a itiaki i roum.

Te Bubuti i bukin Onetimo

⁸ Ma ngaia aei, b'a bon iai au ninikoria ae bati, ngkai ti uaia n reitaki ma Kristo, n tuangko te bae ko riai ni karaoia.

⁹ Ma i bukin te tangira, ao e a raoiroi riki i rou b'a N na butiko, ngai ae B'auro, ae te tia ua-rongorongo ae I kabureaki naba ngkai i bukini Kristo Iesu,

¹⁰ I butiko i bukin Onetimo ae riki b'a natiu i nanoni Kristo; b'a i nanon au tai ni kabureaki, ao I a tia n riki b'a kanga tamana ngai.

¹¹ Akea manenana i roum ngkoa, ma iai ngkai manenana nako im ao nako iu naba;

¹² ae I a manga kaokia nako im, ma nanou ae bane i rouna.

¹³ I kan taua b'a e na mena i rou, b'a e na bonota mwim n akoai ngkai I kabaeaki i bukin te euangkerio.

¹⁴ Ma I aki kani karaoa te b'ai teuana, ngkana ko tuai ni kataua; b'a e kawa n riki akoakiu i roum b'a te bae ko tebonaki iai, ao tiaki te bae nako mai nanom.

¹⁵ B'a tao e a tia n nako Onetimo mai roum i nanon te tai ae aki maan, b'a e aonga ni manga reke i roum ao n tiku i roum n aki toki;

¹⁶ b'a kanga ai tiaki am toro, ma e raka riki arona i aon te toro: bon te tari ae tangiraki, ai moa ra i rou, ma e a moamoa riki nako im n te aro ni maiu i aon te aba ao n reitaki ma te Uea.

¹⁷ Ma ngaia aei, ngkana ko taku b'a raom ngai, ao ko na m'aneia n akoia b'a kanga ngai.

¹⁸ Ao ngkana tao e a tia ni karaoa ae kairua nako im ngkoa n te b'ai teuana, ke tao e tarau i roum, ao ko na taua mwina i aan arau.

¹⁹ I a korea aei n tabonibaiu: Ngai ae B'auro, N na kaboa mwina nako im. Tiaki te b'ai ae riai i rou b'a N na taekina nako im ae ko bae i rou i bukini maium ni Kristian.

²⁰ Eng, tariu, I bia buokaki i roum i bukin te Uea: ko na kamaiua nanou ngkai ko reitaki ma Kristo.

²¹ I koroboki nako im ma te aki nanokokoraki b'a ko na boni karaoi baika I taekin, ao I ataiko b'a ko na boni karaoa ae bati riki nakon ae I tuangko.

²² Ao i rarikin naba aei, ko na katauraoa te tabo ae N na mena iai: b'a I kaantaninga ae kam na anganaki ngai b'a kaekaan ami tataro.

Kabanea n Taeka ni Kamauri

²³ E kamauriko Eb'abera, ae raou ni kabaeaki i bukini Kristo Iesu;

²⁴ ao a kamauriko naba Mareko, ma Arititareko, ma Tema, ma Ruka, aika raou ni m'akuri.

²⁵ E na mena ana akoi ara Uea are Iesu Kristo irouia tamneimi. Amen.