Ana Anene Toromon 4 - Te B'aib'ara

Te Tia Iein Te Aine Ae E Botonaine E taku Teuarei:

¹ Raou ae e tangiraki, ko rangi ni kantangiraki irou, i aon te taatangiraki ngkana I taratara mai aan rabunan matam, ao ti te bo matam ma matan te taobe. A tiotio iran atuum kaanga kakateken taiani kooti aika a roko mai Kireata.

² A mainaina riki wiim nakon te tiibu ae e a tib'a tia n tebokaki; a tab'anin raoi akea teuana ae e waraa.

³ Riam kaanga taiani karai aika a toka urauraia, e tei raoi wiim; ao a raba i aan rabunan matam tabam aika tamaroan taian rooti.

⁴ E rangi ni kakateke riki roroam nakon ana taua Tawita, ae e unekenekeaki n aia otanga tautia aika ngaa.

⁵ A rangi n tamaroa mmamam; kaanga taian ria aika a bwebwee aika a am'arake i buakon taiani kiebu.

⁶ N na ienikuriai nakon taian tabuki aikai aika a bururuaki aoia n te boiarara ao N na tiku ikekei ni karokoa otin taai.

⁷ Raou ae e tangiraki, ko rangi ni kantangiraki n arom ni kabane.

⁸ Au kainrou, Ti na kaai ni kiitana Reb'anon! ti na kaangai ti a boo nakon te Maunga are Amana, Tenira, ao Oman, ike a mamaeka iai raian ma reeb'ari i nanon taian nangananga ni b'a.

⁹ Au kainrou, ae bon ti au b'ai, ko a tia n iraea nanou! N ti teuana iraean taarau iroum, ao raitiitin m'aen roroam, ko a tia n iraea nanou.

¹⁰ E karewerewe riki am tangira nakon te wain; E boiarara riki kabiram nakon taiani b'ai ni kaboiarara.

¹¹ Riam kaanga ngaon te manibeeru are iai ana karewe; e raanga nako te miriki ma ana karewe te manibeeru man newem. E boiarara kunnikaim ni boiararan te kai te tiira mai Reb'anon.

¹² Au kainrou, ae bon ti au b'ai, bon te nnenaroka ngkoe, te koburake n ran ae e kainaki nakoia tem'angina.

¹³ Bon taian kureebe anganibaim ae e onrake ni uaana aika kangkang ao aekaki ni boiarara nako aika enna, naaro,

¹⁴ taberon, karemati, tinnamon, riibano, muura, ao te aroe b'ai ni kaboiarara aika a rangi n tamaroa.

¹⁵ Bon te koburake n ran ngkoe i nanon te nnenaroka, te koburake n ran ae e buubura ae e itiaki, ao te raanga n ran ae e kamarurung man Maungan Reb'anon.

E taku Neierei:

¹⁶ Ke e wai te ang meang, ao te ang maiaki naba! Ke a kakianakoa boiararan au nnenaroka, b'a e aonga n rin teuae I tangiria ma ni katoong uaana aika a kangkang.