Ana Anene Toromon 3 - Te B'aib'ara

Mii Aika A Tamaroa E taku Neierei:

¹ I aenako ni kakaaea teuare I tangiria i aon te kainiwene n te bong ma nanou ni koaua. I kakaaea ma bon akea ikekei.

² Ma ngaia are, I kakaaea i nanon te kaawa teuare I tangiria. I tarataraia i nanon te kawai, ma bon akea naba ikekei.

³ I bon titirakiniia naba taan tei ake a tararua te kaawa ni kaangai, “Kam noora teuare I rangi n tangiria?”

⁴ Bon i mwiin anne, ao e a reke irou. I taumatoaia ao I aki manga kanakoa, ao I kairiia ni karokoa ti roko n ana auti tinau.

⁵ Ataeinainen Ierutarem, kam na berita nako iu ni m'aakan te ria ma te anterobe, b'a e na aki kauta te tangira i m'aain tauraoina.

Te Tia Tararuaia Aoti Ao Te Bootaki Ni Mare A taku Raoraona:

⁶ Tera ae ti nooria ae e tabe n roko man te rereua kaanga te maabubu n nang? Ao iriana boiararan b'aai ni kaboiarara, ma te muura ao te riibano.

⁷ Bon te uea are Toromon ae e uotaki i aon ana kaintokanuea, ao e katobibiaki irouia onongaun ana tautia Iteraera aika a bane aroia.

⁸ A toa ni kabaang n tatabemaniia. A bane aroia n te buaka, a rangi ni b'aati ni buaka i nanon te roo.

⁹ E karaoaki te kaintokanuea man kain Reb'anon.

¹⁰ Taian tirewa bouana ao te koora akuuna, ao e rabunaki aona n te kunnikai ae e beebo ke uraroo. Ngkami aika ainen Ierutarem are kam a tia n rangi n tararuaa nanoaan te kaintokanuea.

¹¹ Nakomai ngkai noora te baunuea ae e anganaki Toromon iroun tinana i nanon ana bong ni mare ae e kakukurei.